काठमाडौं- नेपाली कांग्रेस केन्द्रीय कार्यालयमा नेपाल विद्यार्थी संघका दुई समूहबीच झडप भएको छ। नेपाल विद्यार्थी संघका नेता कुन्दन काफ्ले निकट विद्यार्थीहरूले सोमबार केन्द्रीय कार्यालयमा पार्टी सभापति देउवाविरुद्ध नाराबाजी सुरु गरेपछि दुई पक्षबीच झडप भएको हो।
विधानविपरीत नेविसंघको कार्य समितिमा ३२ वर्ष माथिका व्यक्ति नेतृत्वमा ल्याउन लागिएको भन्दै काफ्ले निकट विद्यार्थीहरूले आमरण अनसन सुरु गरेका थिए। सो अनशनमा उनीहरूले पार्टी नेतृत्वविरुद्ध नाराबाजी गरेका थिए।
पार्टी सभापति विरुद्ध नाराबाजी सुरु भएको भन्दै अर्को पक्षका नेताहरूले नाराबाजी गर्दै अनसन सुरु गरेका विद्यार्थीमाथि आक्रमण सुरु गरेपछि स्थिति असामान्य बनेको थियो।
केन्द्रीय कार्यालयमा काफ्ले निकट नेविसंघ पूर्व केन्द्रीय सदस्य नवराज त्रिपाठीसहितका नेताहरू आमरण अनशन सुरु गरेका थिए।
झडपमा परी महेन्द्र रत्न क्याम्पस ताहचलका नेविसंघ नेता कमल पन्त घाइते भएका छन्। विद्यार्थीहरूबीच गमला र इट्टा हानाहान भएको थियो।
आमरण अनसन बसेको टोली माथि पार्टी सभापति देउवा निकटका विद्यार्थी समूहले हस्तक्षेप गरेको अनशन बस्ने पक्षको दाबी छ।
अनशन बसिरहेको अवस्थामा पार्टी सभापति देउवालाई स्कर्टिङ गरी भित्र प्रवेश गराएपछि दोहोरो झडप सुरु भएको थियो।
नेविसंघका नेताहरुले गरेको अनशनमा पार्टीका नेता अर्जुननरसिंह केसीले भने समर्थन गरेका छन्।
'विधानअनुसार ३२ वर्ष उमेरहद कार्यान्वयन गरिनुपर्छ। उमेरहद कायम नगर्ने सहमति भए पनि यो सहमतिसँग म सहमत छैन,' उनले भने।
पार्टी केन्द्रीय समितिको बैठक १ बजे बोलाइएको भए पनि यो समाचार तयार पार्दासम्म सुरु हुन सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778155080.jpg)
-1764146706.png)
