राजविराज– सप्तरीका एक नेकपा नेताले छोरीको जन्मदिनमा एक दलित विद्यार्थीलाई १० कक्षासम्म पढाउने जिम्मा लिएका छन्।
नेकपाका जिल्ला कमिटी सदस्यसमेत रहेका छिन्नमस्ता गाउँपालिका ४ निवासी जयप्रकाश यादवले मंगलबार आफ्नी छोरी प्रिया यादवको दशौं जन्मदिनका अवसरमा यस्तो घोषणा गरेका हुन्।
यादवले स्थानीय दलित बालक ५ वर्षीय दुर्गेश सदाको अभिभावकत्व ग्रहण गरेका हुन्।
उनले मंगलबारै बालकलाई छिन्नमस्ता गाउँपालिका-३ स्थित त्रिमूर्ति सेकेन्डरी स्कुलको कक्षा १ मा भर्ना गराएका छन्।
बालकको कक्षा १० सम्मको सम्पूर्ण पढाई खर्च आफूले व्यहोर्ने यादवको भनाई छ।
छोराको अभिभावकत्व ग्रहण गर्दै पढाई खर्च व्यहोर्ने जयप्रकाशको घोषणाले बालकका बाबुआमा अर्जुन/रम्भादेवीले खुसी व्यक्त गरेका छन्।
खर्च अभावमा छोरालाई विद्यालय भर्ना गराउनै नसकिरहेका बेला सम्पूर्ण खर्च व्यहोर्ने बताएपछि आफूहरुले सहमति जनाएको अर्जुनले बताए।
छिन्नमस्ता ०७६ कात्तिक १ गते नै ‘पूर्ण विद्यालय भर्ना’ घोषणा भएको गाउँपालिका हो। घोषणाअनुसार ५ देखि १२ वर्ष उमेर समूहका कुनै पनि बालबालिका विद्यालयबाहिर छैनन्।
शतप्रतिशत बालबालिका विद्यालय भर्ना भएको तथ्यांकसहित जिल्ला समन्वय समिति सप्तरीका संयोजक प्रभाकर यादव र छिन्नमस्ता गाउँपालिकाका अध्यक्ष सूर्यनारायण मण्डल ‘कुडुर’ले छिन्नमस्तालाई ‘पूर्ण विद्यालय भर्ना’ गाउँपालिका घोषणा गरेका थिए।
अभियान अन्तर्गत छिन्नमस्ताका ७ वटै वडाका २ हजार ३० बालबालिकालाई १९ वटा विद्यालयमा भर्ना गरिएको तथ्यांक छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769055728.png)
-1764146706.png)
