काठमाडौं– राष्ट्रिय जनता पार्टी (राजपा) का वरिष्ठ उपाध्यक्ष, उपाध्यक्ष र महासचिवले सुटुक्क सरकारमा जाने तयारी गरेको भन्दै अध्यक्ष मण्डलप्रति खबरदारी गरेका छन्। सरकारमा सहभागी हुने समाचार प्राप्त हुनुका साथै गतिविधिबाट पुष्टि भएको भन्दै उनीहरुले अध्यक्ष मण्डलाई तीन बुँदे पत्र बुझाएका छन्।
पार्टीको निर्णय गरेर मात्रै अघि बढ्न माग गर्दै उनीहरुले मंगलबार पत्र बुझाएका हुन्।
अध्यक्षमण्डलका सदस्यद्वय महन्थ ठाकुर र राजेन्द्र महतोको मिलेमतोमा पार्टीका अन्य नेतालाई जानकारी नदिइ निर्णय भइरहेको उनीहरुको आशंका छ।
राजपा वरिष्ठ उपाध्यक्षहरु सर्वेन्द्रनाथ शुक्ल र वृषेशचन्द्र लाल, उपाध्यक्षद्वय गोविन्द चौधरी र रमेशप्रसाद यादव तथा महासचिव विजयकुमार सिंहले अध्यक्ष मण्डलका संयोजकलाई खबरदारीस्वरुप पत्र बुझाएका हुन् ।
पत्रमा भनिएको छ– केही दिनदेखि राजपा सरकारमा जाँदैछ भन्ने समाचार आइरहेका छन्। यस बीचमा भएका भेटघाटका समाचारहरुले यसको पुष्टि गर्छन्।’
संविधान संशोधन, थारु, आदिवासी जनजाति, मुस्लिमलगायतका मागको सम्बोधन र रेशम चौधरीको मुद्दा फिर्ता नलिउन्जेल सरकारमा सहभागी हुँदा आफ्नो संघर्षको अपमान हुने उनीहरुको ठहर छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
