काठमाडौं– नेपाल टेलिकमले ग्राहकको रुचीलाई ध्यानमा राखी भ्वाइस तथा डाटा सेवा सस्तो मूल्यमा उपहारस्वरुप प्रदान गर्न सकिने योजना ल्याएको छ। टेलिकमले निश्चित दिनका लागि भ्वाइस वा डाटा सेवा साथीभाइ वा आफन्तलाई उपहारका रुपमा प्रदान गर्न सक्ने योजना ल्याएको हो।
यसका लागि सर्वप्रथम नेपाल टेलिकमको ‘नेपाल टेलिकम’ एप आफ्नो मोबाइलमा डाउनलोड गर्नुपर्दछ। एन्ड्रोइड मोबाइल प्रयोगकर्ताले प्ले स्टोरमा र आइफोन प्रयोगकर्ताले एप स्टोरमा गई नेपाल टेलिकमको लोगो अंकित एप डाउनलोड गर्न सक्छन्। डाउनलोड गरेपछि ‘रजिष्टर’मा क्लिक गर्नुपर्दछ। एपमा मागिएबमोजिम प्रयोगकर्ताको नाम, मोबाइल नम्बर, पासवर्डलगायत विवरण राखेपछि लग इन हुन्छ । यसपश्चात मोबाइलमा तत्कालै सन्देशका रुपमा एक पटकका लागि कोड नम्बर आउँछ । सो कोड नम्बर इन्ट्री गरी कम्पनीको एप प्रयोग गर्न सकिन्छ।
यही एपमार्फत आफन्त वा साथीभाइसँग कुराकानी गर्ने वा इन्टरनेट चलाउने समय उपहारका रुपमा प्राप्त गर्न सकिन्छ। इन्टरनेट चलाउने डाटा सेवा उपहारस्वरुप दिन चाहेको अवस्थामा भने एप खोली गिफ्ट प्याकेज्समा क्लिक गर्नुपर्दछ । त्यसपछि डाटा लेखिएको एपमा गएर जम्मा १२ रुपैयाँमा २४ घन्टासम्म २८ एमबी डाटा चलाउन सकिने टेलिकमले जनाएको छ।
यसैगरी, ३० रुपैयाँ मा ३ दिन चलाउन मिल्ने ९० एमबी, ६० रुपैयाँमा ७ दिनको १९० एमबी र १ सय १०० को ५०० एमबी तथा २ सय ४० को २८ दिन चलाउन सकिने १५०० एमबी डाटा गिफ्ट पाउने टेलिकमले जनाएको छ।
कति एमबीको डाटा उपहार दिइने हो निश्चित गरेपछि क्लिक टु सब्सक्राइब लेखिएको स्थानमा क्लिक गरी दिन चाहेको मोबाइल नम्बर लेखी ओके गर्नुपर्दछ। प्रिपेड तथा पोस्टपेड मोबाइलका प्रयोगकर्ताले यो सुविधा उपभोग गर्न सक्नेछन्।
यसैगरी यही एपको गिफ्ट प्याकेज्समा गई भ्वाइस क्लिक गरी २५ रुपैयाँमा ४० मिनेट कुरा गर्न सकिने एकदिने प्याकेज उपहार लिन सकिन्छ । सात दिनसम्म १९० मिनेट कुरा गर्न सकिने प्याकेज उपहार दिने हो भने जम्मा १ सय मात्र लाग्दछ । यसैगरी २ सय ४० मा २८ दिनसम्म ४९० मिनेट कुरा गर्न सकिने प्याकेज पनि उपहार प्रदान गर्न सकिने छ । साथै ५ सयमा ४२ दिनसम्म प्रयोग गर्न सकिने ११ सय मिनेट उपहार दिन सकिन्छ । यसैगरी ‘अफर डट एनटिसी डट नेट डट एनपी’ मा गएर पनि आफूले चाहे बमोजिमका प्याकेज साथीभाइ र आफन्तलाई उपहारका रुपमा प्रदान गर्न सक्ने टेलिकमले जनाएको छ। यस योजनामा जसले गिफ्ट दिने हो उसकै मोबाइल व्यालेन्सबाट रकम काटिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
