इटहरी- धरान उपमहानगरपालिकालाई नेकपाले कम्युनिस्ट विरासतको रुपमा लिँदै आएको छ। २०४७ देखि २०७४ सम्म कम्युनिस्ट पार्टीले लगातार जित निकाल्दै आएको धरानलाई नेकपाले गढ मान्ने गरेको छ।
नेकपाले पनि पहिलाजस्तो सहज नभए पनि आफूहरुको विजय निश्चित भएको दाबी गर्दै आएका छन्। कम्युनिस्टले विगतदेखि पटकपटक चुनाव जितेको धरानमा पराजित हुनु लज्जास्पद हुने भन्दै नेकपाले कार्यकर्ताको परिचालन तीव्र बनाएको छ। पार्टीका १८ विभाग र त्यस मातहतका कमिटी र तिनमा आबद्ध कार्यकर्तालाई निर्वाचनमा पार्टी हारे कारबाही गर्ने चेतावनी दिएका छन्।
अनेरास्ववियू महेन्द्र बहुमुखी क्याम्पस अध्यक्ष सुजन खत्रीका अनुसार पार्टी पराजयको जिम्मा कार्यकर्ताले लिनुपर्ने भन्दै नेताहरुले चेनावनी दिएका हुन्। धरानको चुनाव नेकपाको प्रतिष्ठासँग जोडिएकाले जुनसुकै हातलमा विजयी गराउन लाग्नुपर्ने दबाब बढेको उनी बताउँछन्।
वडा नम्बर १२ का वडाध्यक्ष टंक राईले पनि पार्टी नेतृत्वले चुनाव जित्नै पर्ने दबाब दिएको बताउँछन्। तर केन्द्र सरकारले जनअपेक्षा अनुसार काम गर्न नसकेका कारण अफ्ठेरो परेको उनको बुझाइ छ। ‘जनतालाई कसरी 'कन्भिन्स' गराउने भन्नेमा समस्या छ,’ उनी भन्छन्, ‘हुन त यो कम्युनिस्टको गढ नै हो। तर पनि यसपाला अलिक बढी कसरत गुर्नपर्ला जस्तो छ।’
नेकपा धरान नगर सदस्य भूवन हाङ्कामको बुझाइ पनि वडाध्यक्ष राईसँग मिल्दोजुल्दो छ। अहिलेसम्म गरेका काममा परीक्षा लिने समय पनि भएको उनको बुझाइ छ। पूर्व एमाले र पूर्व माओवादीबीचमा केही असन्तुष्टि रहे पनि त्यसले चुनावमा ठुलो असर नपार्ने उनको दाबी छ। 'त्यसलाई विस्तारै मिलाएर जानुपर्छ,' उनले भने, 'यसले चुनावमा असर पार्दैन।'
अहिलेसम्म नेपाली कांग्रेसले खाता खोल्न नसकेको सुनसरी क्षेत्र नम्बर १ र धरान उपमहानगरपालिकाकामा यसपटक भने आशालाग्दो अवस्था देखिएको कांग्रेसका नेताहरूको दाबी छ। तिनै तहमा नेकपाको सरकार रहेको र सरकारको आलोचना पनि भइरहेकाले निर्वाचनमा मत काटिन सक्ने र आफ्नो पक्षमा मत आउने कांग्रेसका नेताहरूको आँकलन छ। यही बेला कलापानी र लिपुलेकमा सीमा मिचिएको र सरकारले यसलाई गम्भीर रूपमा नलिएको भन्दै विरोध हुँदै आएकाले पनि मत विभाजन हुन सक्ने बुझाइ कांग्रेसको छ।
२०४७ साल देखिनै धरानलाई कम्युनिस्टको लालकिल्ला मानिएको धरानमा यसपालि भने लालकिल्ला भत्काउने दाउमा कांग्रेस लागिपरेको छ। त्यसको लागि उम्मेदवार छनौट पनि सर्वसम्मत गरेको र पार्टी भित्रको असन्तुष्टि पनि निमिट्यान्न पारेको धरान कांग्रेसका पूर्वसभापति किशोर राई बताउँछन्। यसअघिको निर्वाचनमा उनी आफू पनि मेयरको दाबेदार थिए। तर यसपटक भने पार्टीलाई विजय गराउन भन्दै आफ्नै पहलमा सर्वसम्मत उम्मेदवार छनौट गरिएको उनको भनाइ छ।
धरान मेयरका लागि कांग्रेस उम्मेदवार तिलक राई र नेकपा उम्मेदवार प्रकाश राई अंकमाल गर्दै।
कांग्रेसमा देखिएको एकता र नेकपाभित्रको आन्तरिक विवादले धरानको सत्ता समीकरण परिवर्तन हुने सक्ने कांग्रेसका स्थानीय नेताको आँकलन छ। नेकपाको तर्फबाट मेयरमा आकांक्षीहरु धेरै देखिएको र आन्तरिक किचलो समाधान भइनसकेकाले आफूहरुलाई फाइदा हुने कांग्रेस नेताको भनाइ छ। दुई पार्टी एक भएपनि पूर्व एमाले र पूर्व माओवादीकै हिसाबमा व्यवहार भएकोले त्यसले चुनावी परिणाममा नेकपालाई असर पार्न सक्छ।
निवर्तमान मेयर तारा सुब्बाकी पत्नीले उम्मेदवारी दिने कुराले पनि नेकपाभित्र ठूलै हलचल मच्चिएको थियो। तारा सुब्बाका दाजु घनेन्द्र सुब्बाले तारा सुब्बाकी पत्नी इन्दु सुब्बा राईलाई मेयर पदमा उम्मेदवार बनाइदिन निवेदन गरेका थिए। मदन भण्डारीको मृत्युपछि विद्या भण्डारी र रवीन्द्र अधिकारीको मृत्युपछि विद्या अधिकारीले टिकट पाएजस्तै इन्दुले पनि टिकट पाउनुपर्ने माग स्थानीय स्तरमा उठेको पनि थियो।
पार्टी भित्रकै एउटा समूह स्वतन्त्र उम्मेदवार भए पनि उठाउने दाउमा लागेको थियो। तर आन्तरिक छलफलपछि त्यो विषयलाई सामसुम बनाइएको छ।
'विरासत' जोगाउने दाउमा लागेको नेकपा र इतिहास रच्ने दौडमा रहेको कांग्रेसबीच धरानको चुनावमा तीव्र प्रतिस्पर्धा छ। कांग्रेसले धरानमा आफूहरूलाई 'टेस्ट' गर्न अनुरोध गर्दै मत मागिरहेको छ। धरान उपमहानगरपालिकाभित्रका भ्रष्टाचार अन्त्य गर्ने भन्दै कांग्रेसले धरान सुकुम्बासी समस्या समाधान गर्ने प्रतिबद्धता जनाएको छ। हाल धरानमा ४५ प्रतिशतसम्म करवृद्धि भएको भन्दै कर घटाउने र सुकुम्बासीको घर नम्बरिङ बापतको पैसा छुट गरिदिने कांग्रेसको योजना छ।
उता नेकपाले भने आफूहरुले पहिला सुरु गरेका कामलाई पूर्णता दिने र तारा सुब्बाको समृद्ध धरानको नारालाई साकार बनाउने बताउँदै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
