धनगढी– सुदूरपश्चिम प्रदेश सरकारको निशान छाप (लोगो)मा प्रयोग भइरहेको नक्सामा गम्भीर त्रुटि भएको पाइएको छ। प्रदेश सभाको प्रथम अधिवेशनबाट पारित भएको प्रदेश लोगोमा प्रयोग भएको नक्साको केही भाग चीनको तिब्बत र केही भाग कर्णाली प्रदेशमा गाँभेको पाइएको हो।
दार्चुलाको कालापानीलाई प्रदेशभित्रै रहेको देखाए पनि अपि–सैपाल हिमालको केही भाग तिब्बत र बाजुराको केही भाग कर्णाली प्रदेशको जुम्लामा गाभिएको देखिएको भुगोलविद्को भनाइ छ।
भूमि व्यवस्था, सहकारी तथा गरिबी निवारण मन्त्रालयले नेपाल सरकारको आधिकारिक नक्सालाई मात्र प्रयोग गर्न सरकारी कार्यालय तथा सरोकारवाला निकायलाई आग्रह गरेको थियो। तर, सुदूरपश्चिम प्रदेश सभाको लोगो बनाउँदा प्रयोग भएको नक्साबारे नेपाल सरकारको आधिकारिक नक्सा प्रयोग नभएको आरोप लागेको छ।
‘नेपाल सरकारको छाप वा लोगोमा प्रदेशको नक्सा राख्दा नेपाल सरकारको आधिकारिक नक्सा वा विज्ञहरुको राय सल्लाह सुझावमा प्रयोग गर्नुपर्ने हुन्छ,’ कैलाली बहुमुखी क्याम्पसका प्राध्यापक डाक्टर लोकबहादुर विष्टले भने, ‘यो नक्सा बनाउँदा त्यस्तो गरिएको देखिँदैन।’
ठाउँ वा स्थान विशेषलाई चिनाउन तथा त्यसको अवस्थिति, क्षेत्रफल पहिचान गर्नका लागि नक्साको प्रयोग गर्ने गरिन्छ। ‘असंख्य सूचनालाई केही पेजमा नक्साद्वारा प्रस्तुति गर्न सकिन्छ’ उनले भने, ‘नक्सामा ठाउँ अभावका कारण विभिन्न कुराहरु देखाउन संकेतको प्रयोग गरिएको हुन्छ। लोगोमा प्रयोग गर्दा केही सानो भएपनि मूल रेखालाई तोडमोड भने गरिनु हुँदैन।’
प्रदेश सभाले लोगो छनौट गर्न प्रदेश सभाका सदस्यहरु रहेको लागो निर्धारण समिति बनाएको थियो। नमूना लोगो बनाउने प्रतिस्पर्धामा प्रदेशका पाँचजनाले भाग लिएका थिए। तीमध्ये डोटीको शिखर नगरपालिका–११ का टेकबहादुर किमाडीले बनाएको लोगो छानिएकाे थियाे।
सुदूरपश्चिम प्रदेशको २०७४ साल चैत २६ गतेको प्रथम अधिवेशनको ११ औं बैठकले सो लोगोलाई अनुमोदन गरेको थियो। प्रदेश सभाको पहिलो अधिवेशनको मुख्य उपलब्धिमा ‘लोगो निर्धारण मस्यौदा समिति गठन भइ प्रदेश सभाको लोगो निर्धारण भएको’ उल्लेख छ।
प्रदेशको रातो किताव तथा मन्त्रालयहरुको ऐन, कानुन, निर्णय वा परिपत्र गर्नुपर्दा सोही लोगो प्रयोग गर्ने गरेका छन्। किमाडीले भने, ‘नेपालको आधिकारिक नक्साकाे प्रयोग गरेर कम्प्युटरबाट नक्सा बनाएकाे हुँ।’ उनले आफूले निकै मेहनत गरेर लोगो बनाएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
