उम्मेदवारी दर्ता गर्न कास्कीस्थित निर्वाचन अधिकृतको कार्यालयमा पुगेका नेकपा उम्मेदवार भट्टराई र साझा पार्टी उम्मेदवार केसी।
काठमाडौं– निर्वाचन आयोगले तय गरेको प्रतिनिधिसभा र प्रदेशसभाको उपनिर्वाचनका लागि प्रमुख राजनीतिक पार्टीसहित स्वतन्त्रका तर्फबाट कूल ६५ जनाले उम्मेदवारी दर्ता गराएका छन्। निर्वाचन आयोगका अनुसार प्रतिनिधिसभा र प्रदेशसभाका लागि उम्मेदवारी दर्ता गराउने कार्यक्रम बिहीबारका लागि तय गरिएको थियो।
प्रतिनिधिसभातर्फ कास्की क्षेत्र नं २, प्रदेशसभातर्फ भक्तपुर क्षेत्र नं १ को १, दाङ निर्वाचन क्षेत्र नं ३ को २ र बागलुङ क्षेत्र नं २ को २ का लागि उम्मेदवारी दर्ता गराइएको हो। कास्की क्षेत्र नं २ मा तत्कालीन संस्कृति, पर्यटन तथा नागरिक उड्डयनमन्त्रीसमेत रहेका सत्तारुढ नेपाल कम्युनिस्ट पार्टी (नेकपा)का सांसद रवीन्द्रप्रसाद अधिकारीको हेलिकोप्टर दुर्घटनामा परी निधन भएपछि रिक्त भएको पदका लागि आगामी मंसिर १४ गते उपनिर्वाचन हुन लागेको हो।
आयोगका अनुसार उक्त निर्वाचन क्षेत्रमा नेकपाका तर्फबाट रवीन्द्र पत्नी विद्या भट्टराईले उम्मेदवारी दर्ता गराएकी छिन्। यस्तै, नेपाली कांग्रेसबाट खेमराज पौडेलले उम्मेदवारी दर्ता गराएका छन्। सो निर्वाचन क्षेत्रमा कूल २२ जनाले उम्मेदवारी दर्ता गराएका कास्कीस्थित निर्वाचन अधिकृतको कार्यालयले जनाएको छ। आयोगका अनुसार स्वतन्त्रबाट कमल जंग, जमुना शर्मा, सुनिलबहादुर कोइराला, उमानाथ गौतम, दीपक रेग्मी, रनबहादुर दमै, नवराज बास्तोला, पुरुषोत्तम खनाल, लक्ष्मीकुमारी भुजेल, सुनिल भुसालले उम्मेदवारी दर्ता गराएका छन्।
यस्तै कांग्रेस (बिपी)का चन्द्रबहादुर रानाभाट, साझा पार्टीकी रजनी केसी, नेकपा (माले)का टेकनाथ भण्डारी, मङ्गोल नेसनल अर्गनाइजेसनका रियाज गुरुङ, समाजवादी पार्टीका धर्मराज गुरुङ, राष्ट्रिय प्रजातन्त्र पार्टी (संयुक्त)की श्रीमती गङ्गा मल्ल, राष्ट्रिय प्रजातन्त्र पार्टीका रोमबहादुर भण्डारीले उम्मेदवारी दर्ता गराएका मुख्य निर्वाचन अधिकृतको कार्यालय कास्कीले जनाएको छ। कूल २२ जनाको उम्मेदवारी परे पनि सत्तारुढ नेकपा र प्रमुख प्रतिपक्षी कांग्रेसका उम्मेदवारबीच नै प्रमुख प्रतिस्पर्धा हुने देखिएको छ।
यस्तै भक्तपुर निर्वाचन क्षेत्र नं १ 'क' मा प्रमुख राजनीतिक दलसहित स्वतन्त्र उम्मेदवारले समेत उम्मेद्वारी दर्ता गराएका छन्। आयोगका अनुसार नेकपाका तर्फबाट देवीप्रसाद ढकाल, कांग्रेसका कृष्णलाल भँडेल, नेपाल मजदुर किसान पार्टीका नीरज लवजूले उम्मेदारी दर्ता गराएका छन्। यस्तै, कृष्णप्रसाद ह्योगो, जीवन नेपाली, कृष्णराम पोतामाहा, अर्जुन कोजु, उत्तम साखकर्मी, राकेश सुवाल, सुमना कार्की, सङ्गीता पौडेल, जीवनचन्द्र अधिकारीले स्वतन्त्र उम्मेदवारी दिएका छन्।
समाजवादी पार्टीका सुदर्शन मुनकर्मी, नेकपा (माले)का सुदर्शन लामिछाने, संघीय लोकतान्त्रिक राष्ट्रिय मञ्चका मिङ्मार लामा, कांग्रेस (बिपी)का मधुसुदन न्यौपाने गरी कूल १९ जना उम्मेदवारले उम्मेदवारी दर्ता गराएका निर्वाचन आयोगले जनाएको छ।
यस्तै बागलुङको प्रतिनिधिसभा क्षेत्र नं २ 'ख' का लागि कूल १० जनाले उम्मेदवारी दर्ता गराएका छन्। वाम गठबन्धनको साझा उम्मेदवारको रुपमा राष्ट्रिय जनमोर्चाका खिमविक्रम शाही, कांग्रेसका जितबहादुर शेरचन, राप्रपा (संयुक्त)का निमबहादुर भण्डारी, समाजवादी पार्टीका अशोककुमार विक, राष्ट्रिय प्रजातन्त्र पार्टीका गणेशबहादुर कुँवर, सन्तोष भण्डारीले स्वतन्त्र रुपमा उम्मेदवारी दिएका छन्।
संघीय लोकतान्त्रिक राष्ट्रिय मञ्चका अनिलकुमार राई, राष्ट्रिय जनमुक्ति पार्टीका यामबहादुर आले, शेरमान घर्ती स्वतन्त्र र मङ्गोल नेसनल अर्गनाइजेसनका तर्फबाट मित्रबहादुर मगरले उम्मेदवारी दिएका छन्।
उता दाङको निर्वाचन क्षेत्र नं ३ 'ख' का लागि प्रमुख राजनीतिक दलसहित स्वतन्त्र गरी कूल १४ जनाले उम्मेदवारी दर्ता गराएका छन्। सो निर्वाचन क्षेत्रमा नेकपाका तर्फबाट विमलाकुमारी ओली, कांग्रेका केशवराज शर्माले उम्मेदवारी दिएका छन्। यस्तै राष्ट्रिय जनमुक्ति पार्टीका धनराज विकले उम्मेदवारी दर्ता गराएका छन्।
नेपाल मजदूर किसान पार्टीका सुरेश परियार, राष्ट्रिय प्रजातन्त्र पार्टी (संयुक्त)का छोटीलाल थारु, नेपाल कम्युनिस्ट पार्टीका हरिप्रसाद डागी, समाजवादी पार्टीका डिल्लीबहादुर डाँगी, राष्ट्रिय प्रजातन्त्र पार्टीका भुपाल रावत, मङ्गोल नेसनल अर्गनाइजेसनका घनश्याम चौधरी, नेपाल लोकतान्त्रिकका झरेन्द्रबहादुर खत्री, कांग्रेस (बिपी)का दीपकुमार धितालले उम्मेदवारी दिएका छन्।
टीकाराम आचार्य, गोविन्द केसीले स्वतन्त्र उम्मेदवारी दर्ता गराएका छन्। आयोगका सहसचिव एवं प्रवक्ता राजकुमार श्रेष्ठका अनुसार कास्की, भक्तपुर, बागलुङ र दाङमा मनोनयनपत्र दर्ता गराउने कार्य शान्तिपूर्ण रुपमा सम्पन्न भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
