काठमाडौं– नेपाल प्रहरीले तिहारको अवसरमा देशभरका ४३ जुवा अखडामा छापा मारेको छ । सो क्रममा तीन महिलासहित ४ सय ६५ जना पक्राउ परेको प्रहरी प्रधान कार्यालयले जनाएको छ।
चाडपर्वको अवसरमा हुने यस्ता जुवा अखडालाई मध्यनजर गर्दै प्रहरीले विशेष अपरेशन नै सञ्चालन नै गरेको थियो । यसक्रममा प्रहरीले ३ करोड ३० लाख रुपैयाँ बरामद गरेको छ। हारजितका रुपमा खेलिन यसप्रकारका खेलहरु गैरकानूनी भएकाले प्रहरीले जुवा विरुद्ध अपरेशन चलाउँदै आएको छ।
यसक्रममा महानगरीय प्रहरी वृत्त महाराजगञ्जले गत शनिबारमात्रै २ करोड ६७ लाखसहित २५ जुवाडेलाई पक्राउ गरेको थियो । यति ठूलो रकमसहित जुवाडे पक्राउ परेको यो पहिलो घटना हो।
त्यसैगरी हरेकवर्ष जुवाडेहरु पक्राउ पर्ने संख्या पनि बढ्दै गएको छ । आर्थिक वर्ष २०७३०७४ मा प्रहरीले जुवा सम्बन्धी २ सय ६ वटा मुद्दा दर्ता गरेको थियो । त्यसबेला १ हजार ५ सय ४ जना जुवाडे पक्राउ परेका थिए भने १५ जना फरार भएका थिए । त्यस्तै आर्थिक वर्ष २०७४०७५ मा ३ सय ५९ मुद्दा दर्ता भएका थिए । सो क्रममा दुईहजार ८ सय २४ जना जुवाडेहरु पक्राउ परेका थिए भने ३२ जना फरार भएका थिए।
त्यस्तै गत आर्थिक वर्षमा प्रहरीले ३ सय ९१ वटा जुवाका मुद्दा दर्ता गरेर कारबाही गरेको छ। जसक्रममा २ हजार ८ सय ६९ जना पक्राउ परेका थिए।
मुलुकी अपराध संहिता २०७४ लागू हुनुभन्दा पहिला जुवा ऐन अनुसार कारबाही हुने व्यवस्था थियो । गत वर्षदेखि अपराध संहिता लागू भएसँगै संहिताको परिच्छेद –५ को सार्वजनिक हित, स्वास्थ्य, सुरक्षा, सुविधा र नैतिकता बिरुद्धका कसूरमा कारबाही हुँदै आएको छ।
परिच्छेद ५ को दफा १२५ मा जुवा खेल्न वा सट्टाबाजी गर्नु नहुने उल्लेख छ।
१२५ को उपदफा १ मा कसैले जुवा खेल्नु वा खेलाउनु नहुने बताइएको छ। जुवा खेल्ने र खेलाउने गरेको पाइएमा पहिलोपटक जुवा खेल्ने वा खेलाउनेलाई तीन महिनासम्म कैद वा तीसहजार रुपैयाँसम्म जरिबाना हुने व्यवस्था छ।
दोस्रो पटकदेखि जुवा खेल्ने वा खेलाउनेलाई एक वर्षसम्म कैद र पचास हजार रुपैयाँसम्म जरिवाना र त्यसपछिको कसुरमा पटकैपिच्छे थप तीन महिनासम्म कैद र दश हजार रुपैयाँसम्म जरि हुने उल्लेख छ।
त्यस्तै, जुवा खेल्न प्रयोग भएको साधन र जुवाबाट प्राप्त सम्पूर्ण चलअचल सम्पत्ति जफत हुनेछ। तर, जुवा खेलेको घर, कोठा, ठाउँ वा सवारी साधन जफत नहुने संहितामा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
