एजेन्सी- फिल्म 'वार' का साथ पहिलो पटक ३ सय करोड क्लबमा हृतिक रोशन र टाइगर स्राफको फिल्मले इन्ट्री मारेका छन्। 

पहिलो पटक उनीहरुको फिल्म धनीहरुको यो क्लबमा सहभागी भएको हो।

यो क्लबमा ५ वर्ष पहिले नै अमिर खानको 'पिके' समावेश भएको थियो। सलमान खानका धेरै फिल्म यो क्लबमा रहेका छन्। 

यो क्लबमा परेका केही फिल्महरु यस्ता छन्।

पिके (२०१४)
निर्देशक राजकुमार हिरानी र अमिर खानको पिके पहिलो यस्तो फिल्म थियो, जो ३ सय करोड क्लबमा समावेश हुन सफल भएको थियो।

आमिरको यस फिल्मले बक्स अफिसमा ३ सय ४० करोड कमाएको थियो। आमिर र हिरानीको यो जोडीले पहिलो पटक २ सय करोडको आँकडा फिल्म 'थ्री इडियट्स' बाट पार गरेको थियो।

बजरंगी भाइजान (२०१५)
कबिर खानद्वारा निर्देशित बजरंगी भाइजान सलमान खाानको क्यारियरको पहिलो फिल्म थियो, जसले ३ सय करोडको आँकडा पार गरेको थियो।

यो फिल्ममा सलमानसँगै नवाजुद्दिन सिद्दिकीको पनि अभिनय रहेको थियो। फिल्ममा हर्षाली मलहोत्राको पनि अभिनय रहेको थियो। यो फिल्मले बक्स अफिसमा ३ सय २० करोड कमाउन सफल भएको थियो।

सुल्तान (२०१६)
सलमान खानको यो दोस्रो फिल्म थियो जसले सय करोडको आँकडा पार गरेको थियो। २०१६ मा रिलिज भएको यो फिल्ममा उनी एक रेस्लरको भूमिकामा देखिएका थिए।

अली अब्बास जफरद्वारा निर्देशित यो फिल्मले ३ सय ४५ करोड कारोबार गर्न सफल भएको थियो।

यो फिल्म अभिनेत्री अनुष्का शर्माको दोस्रो ३ सय करोड कमाइ गर्ने फिल्म थियो। पिकेपछि यो फिल्म पनि अनुष्काको सफल फिल्म थियो।

टाइगर जिन्दा है (२०१७)
सलमान खान स्टारर टाइगर जिन्दा है पनि ३ सय करोड क्लबमा सहभागी हुन सफल भयो। यो उनको तेस्रो फिल्म हो।

यो फिल्मले ३ सय ४० करोड कमाइ गर्न सफल भएको थियो। यो फिल्मपछि सलमान मात्र यस्ता हिरो भए जसको तीन वटा फिल्म लगातार बक्स अफिसमा धुम मच्चाउन सफल भयो।

३ सय करोड कमाएर हरेक वर्ष सफलता दिनेतर्फ सलमानको साथै निर्माता र निर्देशकको पनि मन जित्न सफल भयो ।

दंगल (२०१६)
२०१६ मा ३ सय करोड क्लबमा सहभागी हुने अर्को फिल्म आमिर खानको दंगल थियो।

आमिरको क्यारियरको अर्को सफल फिल्मको रुपमा दंगलले बक्स अफिसमा आर्थिक संकलन गर्न सफल भयो।

यो फिल्मले भारतमा मात्र नभई चीनमा पनि धेरै राम्रो प्रर्दशन गरेको थियो। यो फिल्मले ३ सय ८७.३८ करोड कमाउन सफल भएको थियो।

चीन र विश्वमा हेर्ने हो भने लगभग २ हजार करोड कमाउन सफल भएको थियो यो फिल्म।

बाहुबली-२ हिन्दी संस्करण (२०१७)
एसएस राजमौलीद्वारा निर्माण र निर्देशन गरिएको बाहुबली २ मा दर्शकहरुको जबरजस्त क्रेज देखिएको थियो।

बाहुबली १ लाई हेरेर दर्शकहरु दोस्रोको प्रतीक्षामा थिए।

यो फिल्मले बक्स अफिसमा ५ सय करोड जम्मा गर्न सफल भएको थियो। यो फिल्मले ५ सय १० करोड कमाएको थियो।

पद्मावत (२०१८)
पद्मावतसँगै शहिद कपुर,रणवीर सिंह र दीपिका पादुकोण ३ सय करोड क्लबमा पहिलो पटक इन्ट्री भएका थिए।

सञ्जय लिला भन्सालीको फिल्म लामो विवादपछि प्रर्दशनमा आएको थियो। यो फिल्मले अदालतदेखि राजनीतिक आलोचनासम्म खेप्नु परेको थियो।

यो फिल्मले बक्स अफिसमा ३ सय २.१५ करोड कमाइ गर्न सफल भएको थियो। 

सन्जु (२०१८)
एक सुपरहित फिल्मको खोजीमा रहेका रणवीर कपुरलाई सन्जुले त्यसको पूर्ति गरेको थियो।

राजकुमार हिरानीले रणवीरलाई जीवनदान दिएका हुन्।

सञ्जय दत्तको जीवनमाथि बनेको यो चलचित्र रणवीरका लागि पहिलो भए पनि हिरानीको हकमा दोस्रो थियो।

यो फिल्मले बक्स अफिसमा ३ सय ४२.५३ करोड कमाइ गर्न सफल भएको थियो।