जनकपुर- गौशाला नगरपालिका-१० स्थित थापाटोलकी २२ वर्षीया गोरकी भनिने शर्मिला सिंह दनुवारको बिभत्स हत्या भएको छ।
जन्मजात सुस्त-मनस्थितिकी शर्मिलाको शव बिहीबार बिहान गाउँदेखि पूर्व मडाहा खोला नजिक नत्थु आलेको बाँझो खेतमा फेला परेको प्रहरीले जनाएको छ।
राम्रोसँग बोल्न र आफ्नो कपडासमेत लगाउन नसक्ने सुस्त-मनस्थितिकी शर्मिलाको हत्या भएको हो।
इलाका प्रहरी कार्यालय गौशालाका प्रहरी निरीक्षक किशोर आचार्यकाअनुसार शवको प्रकृति हेर्दा बलात्कारपश्चात् हत्या भएको हो।
निरीक्षक आचार्यले शर्मिलाको शव हात, मुख र घाँटी बाधिएको अवस्थामा नग्न अवस्थामा फेला परेको बताए।
अपराधीले शर्मिलालाई सर्वाङ्ग पारेर उनैले लगाएकै कपडा च्यातेर हातमुख बाँधेको र हत्याअघि उनीमाथि कुटपीट पनि भएको हुनसक्ने आशंका गरिएको छ।
शवको प्रकृति हेर्दा उनलाई अति यातना दिई हत्या गरेर त्यहाँ ल्याई फालेको हुन सक्ने प्रहरीको अनुमान छ।
घटनाको दिन बुधबार उनी बाख्रा चराएर साँझपख घर फर्केकी थिइन्। रातको खाना खाएपछि घरदेखि केही दुरीमा रहेको छिमेकीको घरमा नाचगान हेर्न गएकी थिइन्।
प्रनि आचार्यले प्रकृति मुचुल्कापछि शव पोस्टमार्टमको लागि महोतरी जिल्ला अस्पताल जलेश्वर पठाइएको बताए।
घटनामा संलग्न आरोपमा प्रहरीले अहिलेसम्म कसैलाई पक्राउ नगरेको जनाएको छ।
पोस्टमार्टमपछि प्राप्त रिपोर्ट, घटनास्थल मुचुल्का र प्राप्त प्रमाण तथा संकेत र सुराकीको आधारमा हत्या अनुसन्धान गरिने प्रनि आचार्यले जनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
