जनकपुर- प्रदेश २ सरकारले संविधान दिवस तथा राष्ट्रिय दिवस विशेष कार्यक्रम गरी भव्य रुपमा मनाएको छ। तर, कार्यक्रममा प्रदेश सरकारका मन्त्रीहरु भने सहभागी भएनन्।
संविधान दिवस तथा राष्ट्रिय दिवसको अवसरमा आज बिहान मुख्यमन्त्री लालबाबु राउतसहित सरकारी कर्मचारी, प्रहरी र नेपाली सेनाका उच्च अधिकारी सम्मिलित समूहले जानकी मन्दिरदेखि मुख्यमन्त्री तथा मन्त्रिपरिषद्को कार्यालयसम्म प्रभातफेरी गरेका थिए। सरकारका मन्त्रीहरु भने कार्यक्रममा सामेल भएनन्।
धनुषाका प्रमुख जिल्ला अधिकारी प्रदिपराज कँडेलका अनुसार प्रभातफेरीका क्रममा नेपाली सेनाका जवानले बाजा बजाएर जनकपुर सहर परिक्रमा गरेका थिए।
प्रभातफेरीपछि मुख्यमन्त्री तथा मन्त्रिपरिषद्को कार्यालयमा नेपाली सेना र प्रहरीले राष्ट्रिय झण्डालाई सलामी दिएर संविधान दिवस मनाए।
सरकारले संविधान दिवस मनाउने निर्णय गरे पनि संविधान दिवसको अवसरमा आयोजित यसअघिका कार्यक्रमहरुमा प्रदेशका मुख्यमन्त्री र मन्त्रीहरु अनुपस्थित थिए। यद्यपि धनुषाका प्रमुख जिल्ला अधिकारीको सक्रियतामा विगत तीन दिनदेखि जनकपुरमा विभिन्न कार्यक्रमको आयोजना हुँदै आएको छ।
भदौ १७ गते मुख्यमन्त्री लालबाबु राउतको अध्यक्षतामा संविधान दिवस मनाउन प्रदेशस्तरीय मूल समारोह समिति समेत गठन गरेको थियो। आन्तरिक मामिला तथा कानुन मन्त्रालयले भदौ २७ गते सूचना जारी गर्दै तीन दिवसीय रुपमा संविधान दिवस मनाउन प्रदेशवासीलाई आह्वान समेत गरेको थियो।
प्रदेश सरकारको निर्णयअनुसार असोज २ गते बिहीबार जनकपुरको जिरोमाइलदेखि बसपार्कसम्म सरसफाई तथा डेंगु नियन्त्रणसम्बन्धी जनचेतनामूलक कार्यक्रम, असोज ३ गते संविधान दिवसको अवसरमा जानकी मन्दिरको प्रांगणबाट मुख्यमन्त्री तथा मन्त्रिपरिषद्को कार्यालयसम्म प्रभातफेरी र अन्तिम दिन असोज ४ गते शनिबार मधेस भवन परिसरमा सरसफाई तथा वृक्षारोपण र मधेस भवन परिसरबाटै जानकी मन्दिरसम्म लागूऔषध दुर्व्यसनविरुद्ध जनचेतनामूलक र्याली गर्ने कार्यक्रम तय गरिएको थियो।
प्रदेश सरकारको निर्णय र पूर्व सूचनाअनुसार पहिलो दिन असोज २ गते बिहीबार जनकपुरको जिरोमाइलदेखि बसपार्कसम्म सरसफाई तथा डेंगु नियन्त्रणसम्बन्धी जनचेतनामूलक कार्यक्रम सम्पन्न गरिएको थियो।
धनुषाका प्रमुख जिल्ला अधिकारी कँडेलको नेतृत्वमा भएको कार्यक्रममा मन्त्रालयका कर्मचारीहरु, नेपाली सेना, नेपाल प्रहरी तथा सशस्त्र प्रहरी र सरकारी अधिकारीहरुको सहभागिता थियो। तर, प्रदेश २ सरकारका मुख्यमन्त्रीलगायत कोही पनि मन्त्री उक्त कार्यक्रममा सहभागी भएनन्।
संविधान दिवसको दिनलाई 'कालो दिन'को रुपमा मनाउने प्रदेश २ सरकारको सत्ता साझेदार राजपा नेपालका मन्त्रीहरुले अभिव्यक्ति दिँदै आएका थिए। जसका कारण सत्तारुढ समाजवादी पार्टीबाट मुख्यमन्त्रीदेखि मन्त्रीहरु र सत्ता साझेदार राजपा नेपालका मन्त्रीहरु बीच संविधान दिवस मनाउने कि नमनाउने भनेर मतऐक्यता हुन सकेको थिएन।
तर, संविधान दिवसको मुखमा आएर समाजवादी पार्टीले संविधान दिवसको दिनमा कालो दिवस र दीपावली नगर्ने एवं तटस्थ बस्ने निर्णय गरेपछि प्रदेश २ सरकार संविधान दिवस मनाउने आफ्नै निर्णयबाट पछि हटेको थियो।
यता राजपा नेपालले संविधान दिवसको दिनलाई कालो दिवसको रुपमा जनकपुरको रामानन्द चोकमा टायर बालेर विरोध जनाएको छ। संविधान संशोधन नभएसम्म संविधान दिवसलाई कालो दिवसको रुपमा मनाइरहने राजपा नेपालबाट प्रदेश सरकारमा सहभागी उद्योग, पर्यटन वन तथा वातावरण राज्यमन्त्री सुरेश मण्डलले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
