नयाँ दिल्ली- बाजुरा स्थायी ठेगाना भएकी ९ वर्षीया बालिका लक्ष्मी चँदाराको बलात्कार प्रयासपछि नयाँ दिल्लीमा हत्या भएको दुई महिना पुग्नै लाग्यो। तर, अदालतमा चलिरहेको मुद्दाले निष्कर्ष पाउन सकेको छैन।
घटना भएको दिनको सिसिटिभी फुटेज हेरेपछि इन्टेलिजेन्स ब्युरो (आइबी) का रजनिकान्त कुमारको टोलीले ‘सनु’ भनेर चिनिने भारतीय नागरिक बसिम अहमदलाई पक्राउ गरेको थियो। अहिले उनी थुनामा छन्। ९० दिनसम्म थुनामा राख्न पाउने नियम अनुसार उनी पक्राउ परे पनि डिएनए परीक्षण गर्न भने बाँकी नै छ।
बलात्कार प्रयासपछि मुस्लिम नागरिक बसिमले हत्या गरेको मुद्दा अहिले अदालतमा चलिरहेको छ। गत साउन २२ गते उनले अदालतमा ‘मलाई अपराधीबाट मुक्त गरिपाऊँ’ भनेर निवेदन दिएका छन्। बसिमको तर्फबाट आफन्तहरु यो केस लडिरहेका छन् भने पीडित पक्षको तर्फको पक्षबाट भारतीय सरकारी वकिल संगीता रानाले यो केस हेर्दैछिन्।
बसिमले पैसाको चलखेल गरेर थुनामुक्त हुने प्रपञ्च रचिरहे पनि डिएनए टेस्टपछि मात्र वास्तविक फैसला हुने वकिलहरु बताउँछन्।
आश्वासनको अल्झो
यो केसमा न्यायका लागि यतिबेला बाजुरा बाह्रबिसेका खगेन्द्र सिंह लागिपरेका छन्। भारतलाई २० वर्षदेखि कर्मथलो बनाएका उनी नेपाली जनसम्पर्क समितिका क्षेत्रीय महासचिव पनि हुन्। समितिकी अध्यक्ष सुनिता कुँवर, उपाध्यक्ष रतनबहादुर शाही र नागेन्द्र जैशीले पनि उनलाई साथ दिइरहेका छन्।
खगेन्द्र सिंह र रतनबहादुर शाही
यो केसमा भारतीय प्रहरीले पीडित पक्षको न्यायका लागि सहयोग गर्न त गरेको छ, तर देखावटी रुपमा मात्र।
भारतस्थित नेपाली दूतावाससँग यस घटनाबारे बुझ्न खोज्दा यो केसलाई हेरिरहेका एसएसपी प्रकाश अधिकारीसँग सम्पर्क हुन सकेन। पीडित पक्षलाई दूतावासले ‘हामीले भारतीय गृह मन्त्रालयबाट न्याय दिलाउनका लागि दबाब दिने काम गरेका छौं। निरन्तर जानकारी लिइरहेका छौं’ भन्ने प्रतिक्रिया दिएको छ।
भारत सरकारले घटनालगत्तै पीडित पक्षलाई आर्थिक सहयोग दिलाउने वचन त दियो। तर मृतक लक्ष्मी चँदाराका बुबा, आमाको नाममा भारतीय बैंकमा निजी खाता नभएपछि क्षतिपूर्ति पाउन धेरै समय लाग्यो।
प्रहरी थानाबाट आइओ कागज बनाएर पीडित पक्ष नेपाली नागरिक हुन्, उनीहरु समस्यामा छन्। बैंकमा खाता खोल्ने अनुमति दिनू भन्ने व्यहोराको लिखित कागज बनाएपछि मात्र बैंकले खाता खोलिदिन स्वीकार गरेको थियो। पहल गरेको एक हप्तापछि मात्र बैंकमा खाता खोलिएको मृतक लक्ष्मीका बुवा देव चँदारा बताउँछन्।
चँदारा दम्पती
पीडित पक्षलाई गत साउन २२ गते अदालतमा बोलाइएको थियो। पुन: उनीहरुलाई बोलाइएको छ। ‘क्षर्तिपूर्ति बापत कति पैसा पाउने भनेर तोक्ने कुरा बताइएको छ,’ पीडित देव (मृतकका बाबु) का साला नाता पर्ने रवीन्द्र विकले नेपाल लाइभसँग भने, सुरुमा एक लाख रुपैयाँ र बाँकी किस्तामा दिने आश्वासन मिलेको छ।’
मुद्दा लड्नका लागि सुरुमा एक लाख रुपैयाँ दिने भनिए पनि बाँकी पैसा केस चल्दै गर्दा किस्ताबन्दीमा दिने आश्वासन दिइएको उनको भनाइ छ।
नेपाली संघसंस्थाको बेवास्ता
घटना भएको यति लामो समय बितिसक्दा पनि भारतमा बग्रेल्ती रुपमा खोलिएका कुनै नेपाली संघसंस्थाले पीडितलाई आर्थिक सहायता प्रदान गरेका छैनन्। न त यसबारे कुनै चासो नै दिइएको छ।
घटना भएको सुरुका दिनमा केही मानिसहरु ताते पनि अहिले भने माहोल सेलाइसकेको छ। मजदुरी गरेर पेट पालिरहेको चँदारा परिवारको दुःख, पीडा र सास्ती भने दिनप्रतिदिन बढिरहेको छ। एकातिर गुजारा गर्दै आएको काम ठप्प बन्द भएको छ भने अर्कोतिर क्षतिपूर्ति र सहयोग नपाउँदा चँदारा परिवारलाई पीडामाथि पीडा थपिएको छ।
नयाँ दिल्लीमा पिजी (पेइङ गेस्ट) सञ्चालन गर्दै आएका भारतीय नागरिक बसिम अहमदले गत साउन ५ गते बलात्कार प्रयासपछि लक्ष्मीको हत्या गरेका थिए। सिसी टिभी क्यामेराको सहायताले प्रहरीले उनलाई पक्राउ गरेको थियो।
चँदारा परिवार रोजगारीका लागि बाजुराको बुढीगंगा-१ कुँडीबाट ३ वर्षअघि भारत गएको थियो। चँदारा दम्पती अहिले ३ छोरा र सानी एक छोरीसँगै बस्दै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
