काठमाडौं- राष्ट्रिय चलचित्र कन्फ्रेन्सको कार्यक्रम तालिका सार्वजनिक भएको छ। मानवअधिकार चलचित्र केन्द्र र चलचित्र विकास बोर्डको संयुक्त आयोजनामा ३ दिनसम्म काठमाडौंमा आयोजना हुने कन्फ्रेन्समा ‘किनोट स्पीच’ हरि शर्माले दिनेछन्। उनले 'समाजशास्त्रीय दृष्टिमा चलचित्र' विषयमा आफ्नो धारणा राख्नेछन्।
कार्यक्रम अवधिभर ३ वटा प्यानल डिस्कसन, कार्यपत्र प्रस्तुति तथा छलफल हुनेछन्। पहिलो दिन 'नेपाली चलचित्रमा विविधताको खोजी' शीर्षकमा हुने प्यानल डिस्कसनमा सोमत घिमिरे, दिपेन्द्र के खनाल, दीपकराज गिरी र लक्ष्मी बर्देवालाई यज्ञशले सहजिकरण गर्नेछन्। लोकरञ्जन पराजुलीले 'सिनेमा हेराइको पहिलो नेपाली अनुभव'का बारेमा बोल्दा सम्झना वाग्लेले 'नेपाली सिनेमामा लैंगिक प्रस्तुतीकरण' बारे आफ्नो प्रस्तुति दिनेछिन्।
'नेपाली चलचित्रमा राष्ट्रवाद'बारे उज्ज्वल प्रसाईं र अनुभव अजितले बोल्नेछन्।
दोस्रो दिन 'राजनीतिको आँखामा चलचित्र' विषयक प्यानल डिस्कसनमा अनिल यादवले ठाकुर गैरे, अरुणदेव जोशी, डा डिला संग्रौला र केशव झासँग सवालजवाफ गर्नेछन्। सोही दिन नवनीधि दाहालले 'अनुभवको आलोकमा नेपाली सिनेमा शिक्षा', अनुप सुवेदीले 'नेपालमा चलचित्रसम्बन्धी नीतिमा पुनरावलोकन' र सरोज सापकोटाले नेपाली चलचित्रको बजारबारे बोल्नेछन्।
सोही दिनको अन्तिम सत्रमा वरिष्ठ कलाकार नीर शाहले नेपाली चलचित्रमा क्षेत्रमा बिताएको ५ दशकको अनुभव र अनुभूति साट्नेछन्।
अन्तिम दिन पूजासिंह राजवंशी, भास्कर गौतम, बलबहादुर थापा र सचिन घिमिरेले छुट्टाछुट्टै विषयमा आफ्नो प्रस्तुति दिनेछन्। यस दिनको प्यान डिस्कसन 'नेपाली चलचित्रमा महिलाको स्पेस' विषयमा केन्द्रित हुनेछ। दीपा बस्नेत, सम्झना उप्रेती रौनियार र सुरक्षा बस्नेत वक्ता रहने यस सत्रको सहजीकरण स्मृति ढुंगानाले गर्नेछिन्।
महेश राई, दीपक तोलांगे र गौरव केसीले पनि नेपाली चलचित्रसम्बन्धी छुट्टाछुट्टै विषयमा आफ्नो धारणा राख्नेछन्।
भदौं २६ देखि २८ गतेसम्म चल्ने कन्फ्रेन्स नेपाल प्रज्ञा प्रतिष्ठानमा आयोजना हुनेछ।
आम मानिसलाई आफ्नो समाज बुझाउन र सौन्दर्य चेतना बढाउन कला साहित्यका अन्य विधासरह चलचित्रको पनि महत्व बुझाउन यस्तो कार्यक्रमले मद्दत पुग्ने विश्वास लिएको कन्फ्रेन्स संयोजक अनुप सुवेदीले बताए।
कन्फ्रेन्सको कार्यक्रम तालिकाः
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
