फोटो क्याप्सन : नेपालको तीन दिने औपचारिक भ्रमण सकेर स्वदेश फिर्ता हुने क्रममा त्रिभुवन अन्तर्राष्ट्रिय विमानस्थाला चिनियाँ विदेश मन्त्री वाङ यी। तस्बिर : रासस
काठमाडौं- नेपालको तीन दिने औपचारिक भ्रमण सकेर चीनको राज्यपरिषद् सदस्य एवं विदेशमन्त्री वाङ यी स्वदेश फर्र्किएका छन्।
औपचारिक भ्रमण पूरा उनी मंगलबार अपरान्ह विशेष विमानबाट स्वदेश फर्किएका हुन्।
उनलाई त्रिभुवन अन्तरराष्ट्रिय विमानस्थलमा स्वास्थ्य तथा जनसङ्ख्या राज्यमन्त्री डा सुरेन्द्रकुमार यादव, परराष्ट्र सचिव शङ्करदास वैरागी, चीनका लागि नेपाली राजदूत लीलामणि पौड्याल, नेपालका लागि चिनियाँ राजदूत हउ यान्छीलगायतले बिदाइ गरे।
परराष्ट्रमन्त्री प्रदीपकुमार ज्ञवालीको निमन्त्रणामा आइतबार पाकिस्तानको इस्लामावादबाट नेपाल भ्रमणमा आएका विदेशमन्त्री वाङले नेपाल बसाइका क्रममा राष्ट्रपति विद्यादेवी भण्डारी र प्रधानमन्त्री केपी शर्मा ओलीसँग बेग्लाबेग्लै शिष्टाचार भेट गरेका थिए।
त्यस्तै उनले सत्तारुढ नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’, प्रमुख प्रतिपक्षी दल नेपाली काङ्ग्रेसका सभापति शेरबहादुर देउवालाई पनि बेग्लाबेग्लै भेटेर समसामयिक राजनीतिक परिस्थितिबारे विचारविमर्श गरेका थिए।
त्यसअघि दुवै देशका परराष्ट्रमन्त्रीको नेतृत्वमा प्रतिनिधिमण्डलस्तरीय द्विपक्षीय वार्ता भएको थियो।
वार्तामा पारस्परिक सहयोग अभिवृद्धिसम्बन्धी तीनवटा समझदारीपत्रमा हस्ताक्षर भएको थियो। मन्त्री ज्ञवालीले विदेशमन्त्री वाङको सम्मानमा रात्रिभोजको आयोजना पनि गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
