पत्रकार सम्मेलनका क्रममा नेकपा इटहरीको असन्तुष्ट समूह।
इटहरी- नेपाल कम्युनिस्ट पार्टी (नेकपा) इटहरीको भाँडभैलो अझै सुल्झिन सकेको छैन। पार्टी पद्धतिविपरीत नगर सचिव मनोनित गरेको भन्दै युवा नेताहरुले नगर सचिव काशीनाथ दङ्गालको राजीनामा माग गरेका छन्।
त्यसैक्रममा गत भदौ ५ गते नेकपा इटहरीको पार्टी कार्यालयमा तालाबन्दी भएको थियो। जुन अझैसम्म पनि खुल्न सकेको छैन। युवाहरूको असन्तुष्ट समूहले मिचिएको विधि र प्रक्रिया सच्याउन माग गरेको छ।
सोमबार इटहरीमा पत्रकार सम्मेलन गर्दै सो समूहले क्रम मिचेर कम योग्यता भएका व्यक्तिलाई पार्टीको जिम्मेवारी दिइएको भन्दै गतिविधि सच्याउन माग गरेका छन्। सो सम्बन्धमा मागपत्र पार्टीका उपल्लो तहमा समेत पठाइएको तत्कालीन नेकपा (एमाले) का इटहरी-५ का अध्यक्ष विरेन्द्र गौतमले जानकारी दिए।
केही साताअघि नेकपाको इटहरी समिति बनाउँदा विधि मिचिएको आरोप समेत उनले लगाए। खासगरी भूगोलमा योग्य व्यक्ति हुँदाहुँदै केही वर्ष अघिमात्र इटहरी आएका काशीनाथ दंगाललाई नगर सचिव बनाइएकोमा सो समूहले आपत्ति जनाउँदै आएको छ। पदस्थापन कार्यक्रमसमेत गुपचुप गरिएको र सो कार्यक्रममै असन्तुष्ट भएर निवेदन दिए पनि पार्टी नेताहरुले बेवास्ता गरेको उनले आरोप लगाए।
गौतमले पार्टीसमक्ष ७ बुँदे माग पेस गरिएको जानकारी दिए। पेस गरिएको मागपत्रमा अग्रज नेता र भूगोलमा काम गरेका र युवालाई समेट्न माग गरिएको छ। समूहले आफूहरुको विरोधलाई गम्भीरतापूर्वक नलिए गम्भीर परिमाण उत्पन्न हुने समेत चेतावनी दिएको छ।
यसैबिच विवाद समाधान गर्न नेकपाले पहल थालेको छ। गत भदौ ५ गते देखिनै वार्ताको पहल भए पनि दङ्गाललाई हटाउने विषयमा पार्टीले निर्णय गर्न नसक्दा वार्ता प्रभावकारी बन्न सकेको छैन। दङ्गालको राजीनामा वा बर्खास्तगी नभए सहमति नहुने असन्तुष्ट समूहबाट वार्ता टोलीका सदस्य रहेका नेता शुनिल कार्कीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782563266.png)
-1764146706.png)
