काठमाडौं- राष्ट्रिय प्रजातन्त्र पार्टीका अध्यक्ष कमल थापाले पूर्व प्रधानमन्त्रीसमेत रहेका संघीय समाजवादी पार्टीका संघीय परिषद् अध्यक्ष बाबुराम भट्टराईले एक कार्यक्रममा हिन्दू धर्मका विषयमा दिएको अभिव्यक्ति आपत्तिजनक भएको बताएका छन्।
थापाले पूर्व प्रधानमन्त्रीजस्तो जिम्मेवार व्यक्तिले भड्काउने खालका अभिव्यक्ति दिनु र धर्म परिवर्तनमा उक्साउनु संविधानको मर्म र भावनाविपरीत भएको दाबी गरेका छन्।
हिन्दू धर्मले जन्मको आधारमा कहीँकतै छुवाछुतको कुरा उल्लेख नगरेको बताउँदै धार्मिक ग्रन्थ राम्ररी अध्यक्ष गर्न पनि डा भट्टराईलाई सुझाव दिएका छन्।
'भट्टराईजी म सङ्गै अध्ययन गरेको मित्र हुनुहुन्छ। हिन्दू धार्मिक ग्रन्थले कहीँकतै जन्मका आधारमा छुवाछुत र विभेद गर्ने कुरा गरेको छैन,' थापाले भनेका छन्। जातिय द्वन्द्व हुने तर्क गर्दै हिड्नु जिम्मेवार व्यक्तिका लागि अशोभनीय भएको बताएका छन्।
हेटौंडामा सोमबार आयोजित प्रशिक्षण कार्यक्रममा बोल्दै थापाले मुलुक ठूला दल, ठूला कर्मचारी र ठूला व्यवसायीको सेटिङ्गमा मनपरी ढंगले संचालन भएको आरोप लगाए।
'मुलुकमा मनपरी छ, जसले रे गरेनी हुने अबस्था आयो, कोही कसैसँग डराउनु नपर्ने भयो,' थापाले भने, 'ब्रम्हलुटको विरुद्ध जनता जाग्नु पर्ने बेला आएको छ।'
बाईडबडी, ३३ क्विन्टल सुन, बालुवाटार जग्गा, एनसेल कर, मेलम्ची, बुढिगन्डकी प्रकरण ब्रम्हलुटको नमुना भएको दृष्टान्त उनले दिएका थिए।
कम्युनिस्ट र काङ्ग्रेस असफल भएको भन्दै थापाले राप्रपालाई बलियो राष्ट्रवादी प्रजातान्त्रिक शक्ति बनाउन सबैले सहयोग गर्नुपर्ने आवश्यकता औंल्याए।
'भ्रष्टाचार,बेरोजगारी र धर्मपरिवर्तन जस्ता समस्याहरु समाधानगर्न नेकपा असफल भयो। नेपाली कंग्रेस निरिह बन्यो। यी समस्याहरु समाधान गरी सबल र सम्बृद्ध नेपाल बनाउन सक्ने बलियो विकल्प देशले खोजेको छ। वैचारिक, संगठनात्मक र नेतृत्वको आधारमा त्यो विकल्प बन्न सक्ने क्षमता राप्रपामा मात्र छ,' थापाले भने।
कार्यक्रममा राप्रपाका सह- महामन्त्री भक्ति सिटौला, सहायक महामन्त्री राजाराम बर्तौला, जिल्ला अध्यक्ष मधु अधिकारी , शिबराम थापा नगर अध्यक्ष गुरु सापकोटा , बालकुमारी डल्लाकोटी , खिल प्रसाद चौलागाईं लगायतले बोलेका थिए।
प्रशिक्षणमा जिल्लाका १ सय १५ प्रशिक्षार्थीको सहभागिता रहेको छ। राप्रपा पछिल्लो समय देशब्यापी प्रशिक्षणको अभियानमा छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766673313.png)
-1764146706.png)
-1766648928.png)
-1763721444.png)
