काठमाडौं- आन्तरिक सुरक्षा व्यवस्थाकै निम्ति नेपाल प्रहरीले दैनिक साढे २६ हजारभन्दा बढी सुरक्षाकर्मी परिचालन गर्दै आएको छ।
प्रहरी प्रधान कार्यालयको रेकर्डअनुसार सवारी गस्तीमा ४ हजार ४ सय ३ जना, चेकिङमा ३ हजार ४२ जना, पिकेट ड्युटीमा ६ हजार ४ सय ३ जना, पैदल गस्तीमा ७ हजार ३ सय ५० जना सुरक्षाकर्मी परिचालित हुन्छन्।
अझ अन्य ठाउँका तुलनामा काठमाडौं उपत्यकामा झन् ठूलो मात्रामा प्रहरी परिचालित हुँदै आएका छन्।
उपत्यकामा मात्रै १८ वटा महानगरीय प्रहरी वृत्त, तीन वटा प्रहरी परिसर, उपत्यकाका ३ वटा जिल्लामा हुने गरेका अपराधको अनुसन्धान गर्ने जिम्मा पाएको महानगरीय प्रहरी अपराध महाशाखा, ३ वटै जिल्लाको कमान्ड गर्ने जिम्मेवारी पाएको महानगरीय प्रहरी कार्यालय, देशभरकै अपराधको अनुसन्धान गर्ने जिम्मा पाएको प्रहरीको केन्द्रीय अनुसन्धान ब्युरो सिआइबी कार्यालयसमेत राजधानीमै छ।
यी कार्यालयबाट पनि पोशाक र सादा पोशाकमा दैनिक रुपमा सयौं प्रहरी परिचालित हुँदै आएका छन्।
शान्ति सुरक्षा अवस्था चुस्त दुरुस्त रहेको बताउँदै आएको नेपाल प्रहरीलाई भने एक अपराधीले १८ वर्षसम्म जिल खुवाउन सफल भएका छन्।प्रहरीकै आँखा छलेर १८ वर्षसम्म उपत्यकामा आनन्दले बस्दै आएका हत्या आरोपी भीमसेन भण्डारी पक्राउ परेको घटनाले यो कुरा पुष्टि गरेको छ।
१८ वर्षअघि २०५८ साउन ७ गते काठमाडौं महानगरपालिका–३४ महादेवस्थानका २० वर्षीय अशोक राईको हत्या भएको थियो। रत्नराज्यस्थित महादेवस्थान टोलमा राईमाथि खुकुरी प्रहार गरेर सिन्धुपाल्चोकको साविकको फुलपिङकोट गाउँपालिका–५ का भीमसेन भण्डारीले हत्या गरेका थिए।
त्यसबेला भण्डारी २० वर्षका थिए। अहिले उनी ३८ वर्षका भएका छन्। मृतक राई साइला श्रेष्ठ भन्ने व्यक्तिले बनाउँदै घरको सामग्री रुघ्नका लागि उक्त घरमा बसेका थिए।
घटना भएको दिन साउन ७ गते भण्डारी र राईले सँगै बसी नयाँ बानेश्वरमा रक्सी खाएका थिए। त्यसबेला उनीहरुबीच समान्य विवाद भएको थियो। रक्सीको नसामा भएको विवादले चरम रुप लिएपछि राईले त्यसबेला भण्डारीको गालामा थप्पड हानेका थिए।
त्यसपछि राई आफूले रुघ्ने गरेको घर महादेशवस्थान आएर बसे।
बनाउँदै गरेको घरको अगाडि निमार्ण सामग्री राख्ने एउटा इटा र जस्ताको टहरो थियो। राई त्यही टहरोमा सुतेका थिए। राईको हत्या आरोपमा १८ वर्षपछि पक्राउ परेका भण्डारीले भनेका छन्, ‘गालामा थप्पड हानेपछि सहन सकिनँ। आवेगमा आएर उनी सुतेकै ठाउँमा गएर हतियारले हानेर हत्या गरेको हुँ।’
हत्या भएको जानकारी पाउनासाथ घटनास्थलमा पुगेको प्रहरीले अभियुक्तको खोजी गरे पनि पक्राउ गर्न सकेको थिएन।
राईको हत्या गरिसकेपछि भण्डारी काठमाडौंकै महांकालस्थित साथीको कोठामा गएर एक रात बसेका थिए। त्यसपछि उनी काठमाडौं उपत्यकाकै भक्तपुरलगायतका विभिन्न ठाउँमा बस्दै आएका थिए।
भण्डारीले राईको हत्या गरेको थाहा भइसकेपछि घरधनी साइला श्रेष्ठले उनीविरुद्ध ज्यान कसुरमा किटानी जाहेरी पनि दिएका थिए। व्यक्ति पहिचान भइसकेको अवस्थामा पनि उनी पक्राउ पर्न सकेका थिएनन्।
तर भण्डारी भने काठमाडौं उपत्यकाकै विभिन्न ठाउँमा १८ वर्षसम्म सहचालक भएर बसे। १८ वर्षसम्म पनि प्रहरीले उनको सुइको पाउन सकेन। भण्डारी १८ वर्षसम्म भागेर कुनै देश पुगेका थिएनन्। उपत्यकाकै विभिन्न रुटमा गाडीको चालक सहचालक भएर काम गरे। तर प्रहरीले उनको नामोनिशाना थाहा पाएन।
पहिचान भइसकेका र काठमाडौं उपत्यकामै गाडी चलाएर बस्दै गरेका उनलाई देशभरकै ठूला जघन्य अपराध, सार्वजनिक चासो, संगठित अपराधको अनुसन्धान गर्ने जिम्मा पाएको प्रहरीको केन्द्रीय अनुसन्धान ब्यूरो सिआइबीले १८ वर्षपछि पक्राउ गर्नु पर्ने अवस्था आयो। सिआइबीले उनलाई १८ वर्षपछि भक्तपुर नगरपालिका–२ बसपार्कबाट सोमबार पक्राउ गरेको हो।
पक्राउ परेका भण्डारीलाई थप अनुसन्धानका लागि महानगरीय प्रहरी वृत्त नयाँ बानेश्वर पठाइएको सिआइबीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788944654.png)
-1786602170.png)
-1789631269.jpg)
