कोहलपुर- बाँकेको कोहलपुर नगर क्षेत्रलाई उज्यालो सहरका रुपमा विकसित गर्न कोहलपुर नगरपालिकाले १५ हाइमास्ट लाइट (उच्च क्षमतायुक्त) जडान गर्दैछ। विभिन्न दातृ निकायको २ करोड रुपैयाँ सहयोगमा हाइमास्ट जडान गर्न लागिएको नगरपालिकाका प्रमुख लुटबहादुर रावतले बताए।
उनका अनुसार सहरी विकासमन्त्री मोहम्मद इश्तियाक राई र नगरपालिकाबीच भएको छलफलमा मन्त्री राईले नगरपालिकाको उज्यालो अभियानलाई सफल बनाउन ‘हाइमास्ट लाइट’ जडान गरिने बताए।
कोहलपुर क्षेत्रका आम नागरिकले कोहलपुर नगरलाई सुन्दर र उज्यालो बनाउन नगरपालिकासँग पटक-पटक अनुरोध गरेअनुसार नगरपालिकाले सहरी विकास मन्त्रालय, कोहलपुर नगर विकास समितिलगायत सरोकारवाला निकायसँगको समन्वयमा हाइमास्ट जडान गर्ने कार्य अघि बढाएको प्रमुख रावतको भनाइ छ।
बाँकेमा नेपालगञ्ज उपमहानगरपालिकाले स्थानीय बिपी चोकमा केही महिनाअघि हाइमास्ट जडान गरेको थियो। उक्त हाइमास्टले बिपी चोक क्षेत्रको सुन्दरता बढाउनुका साथै रातिको समयमा पनि पैदलयात्रु देखि सवारीसाधनलाई सडक पार गर्न सहज भएको छ। यही कामलाई पछ्याउँदै कोहलपुरमा पनि हाइमास्ट जडान गर्ने प्रक्रिया अघि बढाएको हो।
'यसका लागि नगरपालिकाले बोलपत्र आह्वान गरी ठेक्का सम्झौतासमेत गरिसकेकाले अबको केही साताभित्रै हाइमास्ट जडानको काम अघि बढ्नेछ,' प्रमुख रावतले भने। नगरपालिकाका प्रमुख रावत र सहरी विकासमन्त्री राईबीच भएको छलफलमा कोहलपुर नगरपालिका क्षेत्रभित्र ५ सय व्यक्ति अट्ने सिटी हलको निर्माणसमेत गर्ने विषयमा सहमति भएको छ।
सिटी हल निर्माणबारे यसअघि पनि पटक-पटक छलफल हुँदै आएको थियो। सिटी हलका लागि विस्तृत परियोजना प्रतिवेदन (डिपिआर)समेत यसअघि तयार भए पनि सरोकारवाला निकायले चासो नदेखाउँदा हालसम्म सिटी हल निर्माणको कामले गति लिन सकेको थिएन। नगरपालिकामा जनप्रतिनिधिको पनि हालसम्म चासोमा नपरेको सिटी हल निर्माणले गति लिएको नगरपालिकाका उपप्रमुख सञ्जुकुमारी थारूले बताए।
कोहलपुरको समग्र विकासमा सिटी हल र हाइमास्ट जडानले थप मद्दत गर्ने भन्दै उनले जनचाहना र मागअनुसार नै विकास निर्माणका गतिविधिलाई नगरपालिकाले प्राथमिकतामा राखेको बताए।
सिटी हल निर्माणमा १० करोड रुपैयाँ लाग्ने अनुमान गरिएको छ। कोहलपुर नगरपालिका–११ स्थित नगर विकास समितिको दुई बिघा जग्गामा सिटी हल निर्माण हुने जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786513116.png)
