राजविराज- सप्तरीको छिन्नमस्ता गाउँपालिका–६, कुपहीकी २८ वर्षीया रामवती मुखियालाई बिहीबाार प्रसूति गराउन राजविराजस्थित भूपेन्द्रनाथ हस्पिटलमा भर्ना गरियो। शरीरमा रगतको कमी भएकाले रगतको आवश्यकता पर्यो।
नेपाल रेडक्रस सोसाइटीले गजेन्द्रनारायण सिंह सगरमाथा अञ्चल अस्पतालमा सञ्चालन गरेको रक्त सञ्चार केन्द्रमा रगत लिन गएका उनका पति रित्तो हात फर्किए। रामवतीलाई मिल्ने ‘ए पोजेटिभ’ रगत रक्त संचार केन्द्रमै अभाव भएपछि स्वास्थ्यकर्मीकै सहयोगमा नेपाली सेनासँग समन्वय गरी उनलाई रगत दिइयो।
यसैगरी, राजगढ गाउँपालिका–६ बर्दाहीकी २४ वर्षीया ललितादेवी यादवलाई पनि सोही दिन अस्पताल भर्ना गरियो। उनलाई पनि रगतको आवश्यकता भएपछि नेपाली सेनाको भिमदल गणका सिपाही टेक बहादुर शाहले ‘बि नेगेटिभ’ को रगत दिएर ललिताको ज्यान जोगाए।
यति मात्र होइन, रक्त संचार केन्द्रमा रगतको अभाव भएपछि यतिबेला सर्वसाधारण अलमलमा पर्न थालेका छन्। केहीलाई भने सेना र प्रहरीका जवानहरूले रगत दिएर सहयोग गर्दै आएका छन्।
केन्द्रमा दैनिक तीन पिण्ट भन्दा बढी रगतको खपत हुने गरेपनि ‘बि पोजेटिभ’ समूहको ८ पिण्ट बाहेक अन्य समूहको रगत अभाव भएको रक्तसञ्चार केन्द्रका प्रमुख नवीन झाले बताए।
एक महिनाअघि देखि संस्थागत रुपमा रक्तदान कार्यक्रमको आयोजन नभएकाले केन्द्रमा रगतको अभाव भएको उनले बताए। ‘दुर्लभ समूहका रगत त पाउनै मुस्किल भयो। ए पोजिटीभ, ए नेगेटिभ र बि नेगेटिभ जस्ता दुर्लभ समूहको रगत हामीसँग छैन,’ उनले भने, ‘रगत खोज्दै कोही आए ती रक्त समूहका व्यक्तिहरू खोजेर रगतको अभाव पूर्ति गर्ने गरेका छौं।’
सशस्त्र प्रहरीको रक्तदान
केन्द्रमा रगतको अभाव भइरहेकै बेला शुक्रबार सशस्त्र प्रहरी बल ६ नं. गणले रक्तदान कार्यक्रमको आयोजना गरेको छ। सशस्त्र प्रहरी ऐन जारी भएको दिन पारेर विष्णुपुर गाउँपालिकास्थित आफ्नै कार्यालयमा आयोजना गरेको रक्तदान कार्यक्रममा एक सईसहित २८ जना सशस्त्र प्रहरीले रक्तदान गरे।
सई भुपेन्द्र प्रसाद बहडखेर, सशस्त्र प्रहरी जवानहरू रामसरण महतो, राजकुमार चौधरी, दान बहादुर गुरुङ, मनकुमार कार्की, तुलसी कुमार गुप्ता, रवीन परियार, राजकुमार माझी, दशरथ भुजेल, कृष्णदेव झा, सञ्जीव कुमार यादव, पप्पु कुमार राउत, अर्जुन श्रेष्ठ, अतित भट्टराई, राजु राणा, श्यामकुमार श्रेष्ठ, कुमार बहादुर बोग्टी, भोजन शाही ठकुरी, भुवनेश्वर यादव, देवेन्द्र कुमार माझी, विनोद घिसिङ, समपत कार्की, सुरेश कुमार दनुवार, राम थापा मगर, इन्द्रदेव चौधरी, प्रेम बुढाथोकी, भीमबहादुर विष्ट, कुमार कार्की र आषिक लामाले रक्तदान गरेको रक्तसञ्चार केन्द्रका प्रमुख झाले बताए।
सशस्त्र प्रहरीको कार्यक्रमबाट प्राप्त रगतले बढीमा दुई साता पुग्ने भन्दै उनले रगतको अभाव हुन नदिन विभिन्न संघ/संस्था र राजनीतिक दलहरुसँग आग्रह समेत गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788325478.jpg)
-1786602170.png)
-1786513116.png)
