काठमाडौं- आन्तरिक उडान सबैभन्दा बढी बजार हिस्सा ओगट्न सफल बुद्ध एयरले दुई वटा एटिआर–७२ जहाज थप्ने भएको छ। दुई वटा जहाज थपसँगै बुद्धसँग १४ वटा जहाज हुने भएको छ। बुद्धले यही अगस्ट २४ तारिकमा थप एउटा एटिआर र सेप्टेबर पहिलो साता अर्को एटिआर गरी दुई वटा जहाज थप्न लागेको हो।
‘थप हुने दुई वटा एटिआर–७२ मध्ये पहिलो एटिआर यही भदौ ७ गते शनिवार नेपाल आइपुग्छ,’ बुद्ध एयरका बजार व्यवस्थापक प्रमुख रुपेश श्रेष्ठले भने, ‘दोस्रो जहाज भने सेप्टेम्बर पहिलो साता नेपाल आइपुग्छ।
बुद्धले पनि केही समय अगाडि मात्रै एटिआर ७२–५०० विमान थप्दै आन्तरिक उडानलाई झन प्रतिस्पर्धी बनाएको थियो। बुद्धले आन्तरिक उडानसँगै भारतको बनारस र कलकत्तामा समेत उडान गरिरहेको छ।
बुद्धसँग अहिले १२ वटा विमान छन्। अब थप हुने जहाजपछि कम्पनीसँग १४ वटा जहाज हुने छ।
जसमा ७२ सिट क्षमताको एटिआर–७२ विमान ९ वटा, ४२ सिटे एटिआर–४२ तीन वटा र १८ सिटे विजक्राफ्ट दुई वटासमेत गरी १४ वटा विमान हुनेट। बुद्ध एयरले पछिल्लो समय वार्षिक २ वटा विमान थप्दै आएको छ। जसका कारण आन्तरिक उडान थप प्रतिस्पर्धी बनेको हो।
बुद्धले सन् २०१९ को पहिलो ६ महिनामै कूल हवाई यात्रुमध्ये झन्डै ५१ प्रतिशत यात्रुलाई सेवा दिएको छ। यो बजार हिस्सा अघिल्लो वर्ष कूल हवाई यात्रु संख्याको ४६ प्रतिशत थियो।
बुद्धले अहिले सिमरा, तुम्लिङटार, भद्रपुर, विराटनगर, जनकपुर, भरतपुर, पोखरा, नेपालगञ्ज, भैरहवा र धनगढीमा उडान गर्दै आएको छ। साथै बुद्धले एक वर्षअगाडि देखिनै पोखरा–भरतपुर–भैरहवा रुटमा समेत उडान गर्दै आएको छ।
आन्तरिक उडानमा लामो समयदेखि बुद्ध र यतीको प्रतिस्पर्धा चलिरहेको थियो। अन्य वायुसेवा कम्पनीहरु भने केही निश्चित मात्रै बजार हिस्सा लिएर उडान गरिरहेका थिए। तर, आन्तरिक उडानमा कडा प्रतिस्पर्धा भने यती र बुद्धकै थियो।
बुद्धको बजार हिस्सामात्रै ६० प्रतिशत भन्दामाथि थियो। साथै बुद्धले सन् २०२० को जनवरी देखि दुर्गम क्षेत्रको विमानस्थलमा उडान गर्ने तयारी गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1784709543.png)
-1764146706.png)
