इटहरी- वैदेशिक रोजगारीका क्रममा कतारमा श्रीमान् ललितबहादुर लिम्बूको मृत्यु भएको खबर सुनेपछि मोरङको सुन्दरहरैचा-५ की टीकाकुमारी लिम्बूले आफूलाई सम्हाल्न नसकेर मृत्यु रोजिन्।
आइतबार साँझ आत्महत्या गर्नुअघि टीकाले 'सुसाइड नोट'मा लेखिन्- 'हामी बूढाबूढी सँगै बाँच्न नसके पनि सँगै मर्न त सक्छौं। यसमा कसैको दोष छैन। हाम्रो लासलाई सँगै राखिदिनु।'
साउन २५ गते शनिबारको रात। ललित भोलिपल्टको छुट्टी अघिल्लो रातदेखि नै मनाउने सुरसारमा थिए। कतारको दोहामा कार्यरत उनी आइतबार परेको बकर इदको बिदा मनाउन अघिल्लो दिन नै साथीहरुसँग समुद्री किनारतर्फ लागे। उनीसँग ४ जना साथी पनि थिए।
अलिक चञ्चले स्वभावका ललित किनारबाट समुद्रतर्फ केही परसम्म पुग्ने कोसिसमा थिए। त्यहीबेला आएको सामुद्रिक छालले लपेटेर लग्यो। बिदाको रमाइलो मनाउन सँगै गएका साथी किनारमै हल न चल रहे। ललित समुद्रमा समाहित भएको टुलुटुलु हेर्नुसिवाय उनीहरुका लागि अन्य केही उपाय रहेन।
दसैंमा घर आउने वाचा गरेका उनी इदको छुट्टीमै सधैंका लागि बिदा भए।
उक्त दुर्घटना हुँदा नेपालमा बिहानको ३ बजेको थियो। घरमा सबै जना सुतेका थिए। तर, बिहान उठ्नेबित्तिकै परिवारले नचिताएको र कहिल्यै सुन्न नपरोस् भन्ने खबर सुन्नुपर्यो।
छोराबुहारी नै गुमाएपछि शोकाकुल परिवार।
घटना भएको करिब ३ घन्टापछि अर्थात् बिहानको ६ बजेतिर उनका साथीहरुले परिवारमा खबर गरिदिएका थिए। खबर पाउनासाथ परिवारमा रुवाबासी सुरु भयो। श्रीमती टीका बेहोस भइन्। करिब २ घन्टापछि उनी होसमा आएकी थिइन्।
000
१३ वर्षदेखि कतारमा कर्म गरिरहेका ललितको प्राण पनि कर्मभूमि अर्थात् मरुभूमिमा गयो। टीकाकुमारी र ललितको पहिलो भेट त्यही मरुभूमिमा भएको भयो, जहाँ ललितले अन्तिम स्वास फेरे।
११ वर्षअगाडि कामदारकै रुपमा टीका कतारमा थिइन्। चितवन घर भएकी उनी उमेरमा ललितभन्दा ६ वर्ष जेठी थिइन्। त्यो बेलासम्म अविवाहित रहेकी टीका र ललितको मन मिल्यो। मायाको अगाडि उमेर बाधा बन्नेवाला थिएन। ६ वर्ष जेठी प्रेमिकासँग विवाह गर्न राजी भए ललित। दुई वर्षअघि मात्रै टीकालाई उनले घर भित्र्याएका थिए।
तर, ललितसँग उनको औपचारिक विवाह भने भएको थिएन। दसैंमा ललित घर आउने र विवाह गर्ने योजनामा थिए दुवै।
ललित र टीकाकुमारी।
यहीबीचमा कतारको कमाइले धरान-१५ मा घर बनाउँदै थिए। ललितको जीवनको ठूलो सपना थियो घर।
टीकाले सुसाइड नोटमा देवर विपीनलाई उद्धृत गर्दै लेखेकी छिन्, ‘धरानको घर ललितको ठूलो सपना हो। बाबा-ममीलाई राखिदिनु।’
धरानमा घर ठडिइसकेको छ। अब अन्तिम चरणको मात्रै काम बाँकी छ। त्यही नयाँ घरमा विवाह गर्ने योजनामा थियो परिवार। तर, नयाँ दुलहा-दुलहीलाई स्वागत गर्नुको साटो दुवैलाई अन्त्येष्टि गर्नुपर्ने बाध्यता आइलाग्यो।
000
परिवारमा पूरै सन्नाटा छाइसकेको थियो। टीका मन बहलाउन घरभित्र/बाहिर गरिरहेकी थिइन्। केही क्षणमा कोठाभित्र पसेर रुने कराउने पनि गर्थिन्।
परिवारका अन्य सदस्य पनि सम्हालिने अवस्थामा थिएनन्। घरभरि रुवाबासी चलिरहेकै थियो। त्यहीबेला उनले सुसाइड नोट लेखेकी रहिछन्। साँझको ६ बजेतिर उनी नुहाउँछु भन्दै बाथरुम छिरिन्। मोबाइल साथमै लगेकी रहिछन्। ढोका बन्द गरेर सावर खोलिन्। सावरको आवाज बाहिरसम्म आएको थियो।
मोबाइलबाट चितवनमा रहेका आफ्ना भाइलाई म्यासेज गरिछन्। जहाँ उनले लेखेकी थिइन्- अब म बाँच्न सक्दिनँ।
टीकाको पेटमा ७ महिनाको बच्चा थियो। उनले पेटमा हुर्किंदै गरेको शिशुको पनि ख्याल गरिनन्। श्रीमान् नभएपछि जीवनको कुनै अर्थ नभएको बुझिन् सायद। त्यसपछि भेन्टिलेसनको रडमा सलको पासो लगाइन्।
करिब १५ मिनेटपछि उनका भाइले परिवारका अन्य सदस्यलाई सम्पर्क गरे। पहिला पनि पारिवारिक रुपमा खासै सम्पर्क नहुने गरेकोले ढिला गरी सम्पर्क भयो।
'दिदी कता छ?' भन्दै टीकाका भाइले फोनमा सोधे।
यताबाट जवाफ फर्काइयो, 'बाथरुमतिर नुहाउन छिरेकी छ।'
'हैन केही भयो कि, एकपटक हेर्नुपर्यो,' उनले अत्तालिएको आवाजमा भने।
त्यसपछि टीकालाई बाथरुमको ढोका खोल्न पटकपटक भनियो। भित्रबाट सावरबाट पानी झरिरहेको एकोहोरो आवाजमात्रै आइरहेको थियो। टीकाले कुनै प्रतिक्रिया नजनाएपछि अन्ततः ह्याम्मरले हानेर ढोका फोरियो।
टीकाका भाइले भनेजस्तै वास्तवमै भित्र केही भइसकेको थियो। छोरो गुमाएको शोकमा डुबेको परिवारलाई फेरि अर्को बज्रपात परेको थियो।
ललितका भाइ विपीनले तत्काल एम्बुलेन्स बोलाए। ‘नजिकै रहेको दीक्षित मेडिकलमा लगेर चेक गरेको धुकधुकी मात्र बाँकी छ, घोपा लैजानु भन्यो,’ विपीनले घटनाबारे बताए, ‘घोपा (बिपी कोइराला स्वास्थ्य विज्ञान प्रतिष्ठान धरान) पुर्याएको केही मिनेटमै भाउजू बित्नुभयो।’
टीकाकुमारी।
अझै पनि टीकाको शव बिपी कोइराला स्वास्थ्य विज्ञान प्रतिष्ठान धरानमै राखिएको छ। सुसाइड नोटमा ‘हाम्रो लास सँगै राख्नु’ भनिएको कारण ललितको शव नआउन्जेल उनको शव पनि सोही अस्पतालमै राखिने भएको छ। दूतावासमार्फत सम्पर्क भइरहेकोले आगामी आइताबारसम्म ललितको शव नेपाल आउने पारिवारिक स्रोतले जानकारी दिएको छ।
अहिले ललितको शवको पर्खाइमा छ, परिवार।
यस्तो छ टीकाको सुसाइड नोट:
बाबु विपीन आइएमईमा १ लाख ५० हजार रुपैयाँ छ, निकाल्नु। ५० हजारको रसिद छ लगेर जानु। मेरो नागरिकता पनि लानु।
आमा, बाबा, दिदी, बहिनीको राम्रोसँग केयर गर्नु। हाम्रा सबै सपनाहरु अधुरा भए। धरानको घर पूरा गरेर बस्न सकेनौं।
पठाउने- इन्दिरा जोशी, कतार
पाउने- टिका कुमारी लिम्बु
१,००,००० छ।
पचास हजार ललितले पठाको हो।
नागरिकतामा रसिद छ लगेर जानु बाबु।
म आफूले आफैंलाई सम्झाउन नसकेर हो। कसैको दोष छैन। हामी बुढाबुढी सँगै बाच्न नसके पनि सँगै मर्न त सक्छौं। यसमा कसैको दोष छैन। हाम्रो लासलाई सँगै राखिदिनु।
पैसा सुटकेसमा छ हेर्नु ल।
धरानको घर ललितको ठूलो सपना हो। बाबा, ममीलाई राखिदिनु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
