इटहरी– साउन २५ शनिबार नेपाली सेना पूर्वी पृतना हेडक्वाटर इटहरीका बहालवाला मेजर ब्राउन सुगरसहित पक्राउ परे। नेपाली सेनाका मेजर नै लागुऔषध कारोबारी भएको कुरा सवत्र फैलियो। इलाका प्रहरी कार्यालय इटहरी र लागुऔषध नियन्त्रण ब्युरोको टोलीले कारोबार गरिरहेकै अवस्थामा ब्राउन सुगरसहित उनलाई प्रक्राउ गरेको थियो।
सेनाको पूर्वी पृतना मुख्यालय छेउमै रहेको पसलमा मेजर अजित प्रतापसिंह सहित दुई जना कारोबारी पक्राउ परेका थिए। लागुऔषध नियन्त्रण इकाइ विराटनगर र इटहरी प्रहरीको संयुक्त टोलीले उनलाई पक्राउ गरेको थियो। एक दशमलव तीन ग्राम ब्राउन सुगरसहित पक्राउ परेका उनी उच्च पदस्थ सैनिक अधिकृत रहेको कुरा बाहिर आयो।
तर उक्त कुरा प्रहरीलाई लामो समय देखी जानकारी थियो।
इलाका प्रहरी कार्यालय इटहरीका प्रमुख प्रहरी नायब उपरिक्षक समीरचन्द्र खरेलका अनुसार ६ महिनाको रेकीपछि उनी पक्राउ परेका हुन्। मेजर लागुऔषध कारोबारमा संलग्न भएको विषय प्रहरीलाई भने अगाडिदेखि नै जानकारी भएको उनले बताए।
उनका अनुसार सिंहले इटहरी, धरान, झापा र विराटनगरसम्म पुगेर ब्राउन सुगर बेच्ने गरेको खुलेको छ। १३ वर्षदेखि ३० वर्ष समूहका युवालाई टार्गेट गरेर उनले कारोबार गर्ने गरेको पाइएको छ।
दुई महिना अगाडि मात्र पृतना हेडक्वाटर छेउमै घर भएका १६ वर्षीय रिजाल थरका एक युवासँग उनका बुवाले ब्राउन सुगर भेट्टाएका थिए। छोरासँग केरकार गर्दा ब्राउन सुगर सेनाको मेजरबाट खरिद गर्ने गरेको थाहा पाएपछि प्रहरीलाई जानकारी दिएको बालकका बुबाको भनाइ छ। जसले गर्दा प्रहरीलाई अनुसन्धानमा थप बल पुगेको थियो।
ती युवाका बुबाले आफू धरै पिडीत रहेको बताए। 'विगत ९ महिनादेखि छोराको व्यवहारमा अस्वभाविक परिवर्तन आएको थियो। पहिला पढ्नमा धेरै मेहनत गर्ने छोराले ९/१० दिनसम्म घर आउन छाडेपछि कुलतमा फसेको शंका लाग्यो। पछी खल्तीबाटै पैसा निकालेर लैजाने गर्न थालेपछी छोराको विषयमा अनुसन्धान गर्दा लागुऔषध प्रयोगकर्ता भइसकेको थाहा पाएँ।' उनका छिमेकी गौतम थरका युवा पनि लागुऔषध प्रयोगकर्ता छन्। उनकै संगतमा परेर छोरो लागुऔषधमा लागेको हुन सक्ने दिपेशको बुझाइ छ।
इटहरी प्रहरीले लागुपदार्थ नियन्त्रण इकाइलाई जानकारी गराइसकेको थियो। पछि थप प्रमाण फेला परेपछि मेजर सिंह प्रहरीको निरन्तर ‘रेकी’मा पर्दै आएका थिए। प्रहरी स्रोतका अनुसार प्रहरीले आफैँ पनि सिंहसँग ब्राउन सुगरको ‘डिल’ गरेको थियो। तर, मेजर सिंह पुराना ग्राहकसँग मात्र कारोबार गर्ने गरेको प्रहरीको भनाइ छ।
गत शनिबार भने पुराना ग्राहकको सहायताबाट प्रहरीले उनलाई पक्राउ गरेको थियो।
मेजर सिंहले आफैँले इटहरी चोक आसपासको लोकेसन दिएका थिए। पछि आर्मी ब्यारेकको पश्चिम सर्पदंश उपचार केन्द्रको अगाडि रहेको क्याफेमा बोलाएर लागुऔषध दिने बेलामा प्रहरीले नियन्त्रणमा लिएको थियो।
सामान्यतया सैनिक इलाका र सैनिक जवानसँग सम्बन्धित विषयको अनुसन्धान सैनिक ऐनअनुसार सैनिक अदालतले नै गर्ने गर्दछ। सैनिक अधिकृतले गरेको कसुरको अनुसन्धानका लागि नेपाली सेनाको सैनिक प्रहरी गणलाई बुझाउने गरिन्छ।
तर लागुऔषधको मुद्दा भने गम्भीर प्रकृति र गैह्रसैनिक पनि संलग्न भएको हुँदा लागु पदार्थ नियन्त्रण ऐन २०३३ अनुसार मुद्दा अघि बढाइएको प्रहरी प्रमुख खरेल बताउँछन्। सोही दिन म्याद थप गरेर प्रहरीले अनुसन्धान थप अनुसन्धान प्रकृया अघि बढाएको उनको भनाइ छ। यो मुद्दा गैह्रसैन्य इलाका र गैह्रसैनिकको संलग्नता भएकाले सिभिल कोर्टबाटै अगाडि बढिरहेकोले उनले बताए। नेपाली सेनाबाट कुनै दबाब आयो की भन्ने नेपाल लाइभको प्रश्नमा कुनै दबाब नआएको र अपराधीलाई कारबाही होस् भन्ने मनसायबाट सहयोग भइरहेको उनको भनाइ छ। यस घटनाले अझै धेरै लागुऔषध कारोबारी पक्राउ पर्न सक्ने उनको बुझाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791822485.png)
-1786602170.png)
