जनकपुर- मुश्लिम धर्मावलम्बीहरु सोमबार बकर-इद पर्व (इद उल जोहा) मनाउने तयारी गरिरहेका बेला ऋण नतिरेको भन्दै महोत्तरीमा एक मुश्लिम परिवारको घरमा डोजर चलाइएको छ।
घर भत्कादिएपछि आफ्नो समुदायको मुख्य पर्वको मुखमै घरबारविहीन हुनुपरेको महोत्तरीको भंगहा नगरपालिका–१, कविलाशाकी जाहिरा खातुनले गुनासो गरिन्। 'छोराछोरी सानै छन्। अब बस्नेखाने टुंगो रहेन,' भत्किएको घर नजिकै भेटिएकी खातुनले भनिन्, 'पर्वको मुखमै बेघर बनाइदिए।'
खातुनका श्रीमान मोहम्मद पनित शेषलाई वैदेशिक रोजगारीमा पठाउँदाको खर्चवापतको रकम नतिरहेको भन्दै म्यानपावरका एजेन्टले शनिबार खातुनको घरमा डोजर चलाइदिएका हुन्।
‘हामी त बकर-इदको तयारीमा थियौं, एक्कासी आएर घर भत्काइ दिए,’ घर नजकिको सडक छेउमा पाल टाँगेर बसेकी खातुनले भनिन्, ‘श्रीमान् विदेशमै छन्। आएपछि हिसाबकिताब गर्ने थिएँ, तर अहिले ममाथि के आपत आइलाग्यो?'
घर भत्काइएपछि अन्नपात, लत्ताकपडा, खाना पकाउने भाँडाकुँडा सबै पुरिएका छन्। ‘घरमा एजेन्ट बद्री ठाकुरलाई दिन श्रीमानले पठाइदिएको १ लाख ५० हजार र बुवाले दिनुभएको ५० हजारसमेत गरेर २ लाख रुपैयाँ, केही सुनचाँदीको गरगहनासमेत थियो। खाद्यान्न, लत्ताकपडासमेत निकाल्न नदिएर डोजर लगाएर घर भत्काइ दिए,’ खातुनले बिलौना पोखिन्।
भंगहा नगरपालिका-१ कै बद्री ठाकुरले प्रहरी/प्रशासनको मद्दतले शेषको घर डोजर लगाएर भत्काउँदै ठाउँ खाली गराएका छिमेकीहरु बताउँछन्।
‘बद्री ठाकुरको घरमा शनिबार बिहानैदेखि प्रहरीसहितको भोजभतेर चलिरहेको थियो,’ सो बस्तीमै रहेको विद्यालयका एक शिक्षकले भने, ‘पछि पो थाहा भो जाहिराको घर उजाड्न पो रहेछ।’
शेष रोजगारीका लागि विदेश गएपछि उनलाई पठाएको खर्च भन्दै ठाकुरले शेषका बाबु अहमद शेषसँग कागज गरेका र त्यहीं कागजको आधारमा घर उठिबास लगाएका जाहिराले बताइन्। ‘मेरा श्रीमान पैसा दिएरै विदेश जानु भएको हो, उहाँ नभएपछि मेरा सोझा ससुरालाई धम्क्याएर कागज गराउनु भएछ, यो कुरा धेरैपछि मात्रै थाहा पाएकी हुँ।’
पीडित जाहिराका अनुसार पति शेष अहिले पनि साउदी अरबमा वैदेशिक रोजगारीमा छन्। ८ वर्षअघि एजेन्ट ठाकुरले शेषलाई २० हजार रुपैयाँमा राम्रो कमाइ हुने कम्पनीमा पठाइदिने बताएपछि उनी विदेश गएका जाहिराको भनाइ छ।
छोरालाई कमाउन विदेश पठाइदिने भन्दै ८ वर्षअघि ठाकुरले जाहिराका ससुरा अहमदसँग करिब ८५ हजार लिएको कपाली तमसुक बनाएका थिए। जाहिराका ससुराले २०६८ भदौं १५ गते सो ऋण लिएको तमसुकमा उल्लेख छ।
जाहिराका ससुरा अहमद।
तर, अदालतमा भने बद्रीले दिएको उजुरीमा २ लाख ५५ हजार रुपैयाँ ऋण लिएको दाबी गरिएको छ। ‘अहिले साँवा र ब्याजसहित करीब १० लाख माग्दा तिर्न सकिन,' जाहिरा सुनाउँछिन्।
शेषको सम्पतिको नाममा ५ धुर घडेरी र कच्ची घर मात्रै थियो। शेषका ४ छोरी र २ छोरा छन्। जाहिराले केही वर्षअघि एजेन्ट ठाकुर राति-राति घरमा आउने र ऋण छोडिदिने भन्दै राख्ने गरेका अनैतिक सम्बन्धको प्रस्ताव आफूले नमान्दा अहिले रिस फेरेको आरोपसमेत लगाइन्।
यता ठाकुरले भने शेष परिवारको घर आफूले नभई अदालतले भत्काएको बताए। उनले भने, ‘मैले कागज अनुसारको मुद्दा अदालतमा हालें, फैसला भयो। अहिले त्यही आफ्नो फैसलाअनुसार महोत्तरी जिल्ला अदालतले कार्यान्वयन गराएको हो। प्रहरी, प्रशासन र डोजर अदालत कै आदेशमा आएका हुन् , मैले केही गरेको छैन।’
म्यानपावर एजेन्ट बद्री ठाकुर।
घर भत्काउन नजिकको रामगोपालपुर र लोहारपट्टीस्थित इलाका प्रहरी कार्यालयबाट प्रहरी परिचालित भए पनि जिल्ला प्रहरी कार्यालय महोत्तरीका प्रहरी उपरीक्षक श्यामकृष्ण अधिकारीले भने घटनाका सम्बन्धमा अनभिज्ञता प्रकट गरे। ‘पीडितबाट कुनै उजुरी आएको छैन, त्यसैले कुनै कारबाही हुने कुरा भएन, उजुरी आए खोजीनीति गरिनेछ,’ प्रहरी उपरीक्षक अधिकारीले भने।
यस विषयमा तत्कालीन समयमै पनि सामाजिक रुपमै छलफल पनि भएको कविलाशावासी बताउँछन्। तर, ठाकुरले भने यसलाई स्वीकारेनन्।
भंगहा नगरपालिकाका नगर प्रमुख सञ्जीवकुमार साहले आफूले दुवै बीचको लेनदेनको मुद्दा मिलाउन ३ पटक पहल गरेको बताए। ‘पछि जोडर लगाएर घर भत्काएको घटना सुन्दा दुःख लागेको छ,’ उनले भने।
मानव अधिकार रक्षक सञ्जाल महोत्तरीका सचिव रञ्जन भण्डारीले यसरी चाडपर्वको बेला कसैलाई घरबारविहीन बनाउनु सरासर मानव अधिकार उल्लंघन भएको बताए। उनले यस सन्दर्भमा छानबीन गरिनुपर्ने र दोषिमाथि कारबाही हुनुपर्ने माग गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772091987.png)
-1772089410.png)
-1764146706.png)
