काठमाडौं- भारतसँग व्यापारिक सम्बन्ध तोड्ने निर्णय लिएको भाोलिपल्टै पाकिस्तानले आफ्नो हवाई क्षेत्रको एउटा रुट बन्द गरिदिएको छ।
भारतीय विमान कम्पनी एयर इन्डियाका एक अधिकारीका अनुसार पाकिस्तानले आफ्नो हवाई क्षेत्रको एउटा रुट बन्द गरिदिएको हो। जसका कारण अब भारतबाट छुट्ने अन्तर्राष्ट्रिय उडानमा अब १२ मिनेट अतिरिक्त समय लाग्नेछ।
पाकिस्तानले हवाई रुट बन्द गरिदिँदा विदेशबाट भारत आउने विमानहरु पनि अर्कै रुटबाट भारत प्रवेश गर्ने बताइएको छ। यसबाट हवाई सेवामा खासै प्रभाव नपर्ने पनि भारतीय आधिकारीहरुले दाबी गरेका छन्।
पाकिस्तानको हवाई क्षेत्र हुँदै एयर इन्डियाले दैनिक ५० भन्दा बढी अन्तर्राष्ट्रिय उडान गर्छ। अमेरिका, युरोप तथा मध्य पूर्वतर्फ जाने विमानले पाकिस्तानी रुटको प्रयोग गर्दै आएका थिए।
यसअघि बालाकोट हवाई आक्रमणपछि पाकिस्तानले गत फेब्रुअरी २६ मा आफ्नो सबै हवाई क्षेत्र बन्द गरिदिएको थियो। गत जुलाई १६ मा भने पाकिस्तानले पुनः आफ्नो हवाई रुट प्रयोग गर्न खुला गरिदिएको थियो।
मोदीले देशवासीका नाममा सम्बोधन गर्न सक्ने
यसैबीच भारतीय संविधानमा रहेको धारा ३७० लाई खारेज गर्ने निर्णयलाई लिएर प्रधानमन्त्री नरेन्द्र मोदीले आज राष्ट्रका नाममा सम्बोधन गर्नसक्ने भारतीय समाचार संस्थाहरुले जनाएका छन्। यद्यपि यस सम्बन्धमा कुनै औपचारिक जानकारी भने प्राप्त नभएको बिबिसीले लेखेको छ।
भारत सरकारले राष्ट्रपतिको हस्ताक्षरसहित राजपत्रमा सूचना प्रकाशित गर्दै जम्मू-काश्मीरलाई विशेष राज्यको दर्जा दिने संविधानको धारा ३७० लाई खारेज गरिदिएको थियो। सो सम्बन्धमा गृहमन्त्री अमित शाहले भारतका दुवै सदनमा प्रस्ताव पेस गर्का थिए। जम्मू-काश्मीर राज्यलाई खारेज गर्ने तथा दुवै क्षेत्रलाई केन्द्र शासित दुई प्रदेश बनाउने प्रस्ताव संसद्ले बहुमतले स्वीकृत गरेको थियो।
उता लद्दाखलाई पनि जम्मू-काश्मिर राज्यबाट अलग गर्दै छुट्टै प्रदेश बनाइएको छ।
यसअघि प्रधानमन्त्री मोदीले देशका नाममा गत मार्च २७ मा सम्बोधन गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
