भारत प्रशासित काश्मीरमा भएको पछिल्लो घटनाक्रमको कानुनी, राजनीतिक र कूटनीतिक जवाफ दिनका लागि पाकिस्तानी प्रधानमन्त्री इमारान खानले सात सदस्यीय एक समिति गठन गरेका छन्।
पकिस्तानका प्रधानमन्त्री कार्यालयको तर्फबाट जारी एक आदेशमा यस्तो समिति गठन भएको उल्लेख छ। उक्त समितिमा विदेशमन्त्री, महान्यायाधिवक्ता, विदेश सचिव, आइएसआई, मिलिट्री अपरेसन र आइएसपीआरको प्रमुख बिलाल सुफी सहभागी छन्।
यसभन्दा पहिले जम्मु–काश्मीरको विशेष राज्यको खारेज गर्नेबित्तिकै पाकिस्तानले संसदको संयुक्त सत्र डाकेको थियो। उक्त वैठकमा प्रधानमन्त्री इमरान खानले आफ्ना कुरा राखेका थिए।
इमरानले आफ्नो भाषणमा भारतमा सत्ताधारी दल भारतीय जनता पार्टी नश्लवादी श्रेष्ठताको विचार लिएर अगाडि बढिरहेको बताए। प्रधानमन्त्री खानले मोदीको भाजपा जर्मन नाजी पार्टीको रुपमा देखा परेको आरोप समेत लगाए। ‘भाजपा त्यही गरिरहेको छ, जुन जर्मनमा नाजी पार्टीले गरेको थियो,’ खानले आरोप लगाए।
बिजेपी र आरएसएसले भारतमा हिन्दुलाई महत्वपूर्ण सम्झने र मुसलमानहरुलाई निच देखाउन खोजिरहेको आरोप उनले लगाए। काश्मीरमा नश्लीय सफाया गर्ने र त्यहाँको आबादीको चरित्र बदल्ने तयारी सरकारले गरिरहेको उनको भनाइ थियो।
खानको यो भनाइप्रति हालसम्म भारतको कुनै प्रतिक्रिया आएको छैन।
भारतले विगतदेखि नै काश्मीर मुद्दामा एउटै कुरा भन्दै आएको छ, 'तबसम्म कुनै कुराकानी हुँदैन, जबसम्म पाकिस्तानी जमिनबाट हुने आतंकवादी गतिविधि उसले बन्द गर्दैन।’
मोदीको कामप्रति टिप्पणी गर्दै समकक्षी प्रधानमन्त्री खानले विकसित देश आफूले बनाएको कानुनमा नचले त्यसको जिम्मेवार आफूहरु नहुने टिप्पणी गरे।
‘अब यो कुरा यस्तो सहतमा जाँदैछ, जसले पुरै दुनियाँलाई असर पुर्याउन सक्छ,’ खानले भने, ‘हामी हरेक फोरममा यो कुरा उठाउनेछौं। संयुक्त राष्ट्र महासभा, सुरक्षा परिषद् र देशका नेताहरु भेला भएका स्थानमा र दुनियाँसामु यो कुरा हामी भन्नेछौं।’
भारतमा मुसलमानको धेरै नोक्सान भइरहेको र यसमा दुनियाँले अहिले केही नगरे पनि पछि दुनियाँको आँखा खुल्ने उनले बताए।
‘म पश्चिमी देशहरुबारे जान्दछु, उनीहरुलाई थाहा छैन कि काश्मीरमा कुन किसिमको अत्याचार हुँदैछ,’ खानले भने, ‘भारतमा अल्पसंख्यकहरुमाथि कस्तो व्यवहार हुँदैछ, हामी सम्भव भएसम्म फोरममा उठाउने प्रयास गर्नेछौं।’
पकिस्तान सरकारले बिजेपीको नश्लीयता स्वीकार नगर्ने पनि उनले बताए। विपक्षीहरुको प्रश्नको उत्तर दिँदै प्रधानमन्त्री खानले पाकिस्तानले सम्भव हुने सबै फोरमहरुमा यो मुद्दा उठाउने प्रतिबद्धता जनाए।
‘पाकिस्तान हर दिशामा कदम उठाइरहेको छ,' उनले भने, ‘तपाईंहरु के चाहनुहुन्छ- म भारतमाथि आक्रमण गरुँ?’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
