काठमाडौं- प्रमुख प्रतिपक्षी दल नेपाली कांग्रेस र मधेसकेन्द्रित दल राष्ट्रिय जनता पार्टी (राजपा) बीच सरकारविरुद्ध सहकार्य गर्ने सहमति भएको छ।
सरकारले संसदमा प्रस्तुत गरेका विवादित विधेयक र नागरिक हत्यामा सरकारको रवैयाविरुद्ध संसद र सडकसम्म प्रतिवाद गर्ने गरी अलिखित सहमति भएको छ। कांग्रेसका प्रतिनिधिसभाका प्रमुख सचेतक बालकृष्ण खाँण र राष्ट्रियसभाका दलका नेता सुरेन्द्र पाण्डेको पहलमा राजपासँग सहकार्य गर्ने पहल अघि बढेको थियो।
दुई दलका दोस्रो तहका नेताहरुसँग वार्ता गरिसकेपछि कांग्रेस सभापति शेरबहादुर देउवा र राजपा अध्यक्ष मण्डलका चार नेताको बैठक बसेको हो। खाँण र पाण्डेले प्रारम्भमा राजपाका अध्यक्ष मण्डल मध्येका अनिल झासँग सरकारको विरुद्धमा कार्यगत एकता गर्ने विषयमा वार्ता गरेका थिए। कांग्रेस प्रमुख सचेतक खाँणले भने, ‘अनिलजीको फोन आइसकेपछि हामी दुईले भेट्यौं।’
गत सातादेखि आन्तरिक सहमति भए पनि कांग्रेस पक्षले विषयलाई बाहिर ल्याउन चाहेको थिएन।
किन त?
खाँण भन्छन्, ‘राजपामा अध्यक्ष मण्डलमा ६ जना नेता छन्। दुई नेतासँग मात्रै भेट भएको थियो। राजपाभित्र पनि त्यसको गम्भीर प्रभाव पर्ला भन्ने भयो।’
झासँग वार्ता गरिसकेपछि सोही दिन खाँण र पाण्डेले पार्टी सभापति देउवालाई ब्रिफ्रिङ गरेका थिए। देउवालाई जानकारी गराएसँगै राजपाका अध्यक्ष मण्डलका नेताहरु महन्थ ठाकुर, झा र राजकिशोर यादव सहितका नेता देउवा निवास बुढानीलकण्ठ पुगे। देउवा निवासमा असार २१ मा यसबारे छलफल भएको थियो। कांग्रेस र राजपाका नेताबीच देउवा निवासमा भएको वार्तालाई पनि कांग्रेस पक्षले जानकारीमा ल्याउन चाहेको थिएन।
राजपाका नेताहरु शरतसिंह भण्डारी, महेन्द्र राय यादव र राजेन्द्र महतो उक्त बैठकमा अनुपस्थित थिए। उनीहरु बैठकमा सहभागी नभएका कारण कांग्रेसले वार्ताको विषय बाहिर नल्याएको खाँण बताउँछन्।
कांग्रेसले उक्त विषयलाई राजपाले बाहिर ल्याइदेओस् भन्ने भित्री इच्छा राखेको थियो। साथै, प्रतिनिधिसभामा दुई दलबीच देखिएको प्रस्तुतिको माध्यमले कार्यगत एकता देखिने अपेक्षा कांग्रेसको थियो। कांग्रेसको सोच मुताविक नै राजपाका अध्यक्ष मण्डलका नेता झाले दुई दलको कार्यगत एकताको छलफलबारे जानकारी बाहिर ल्याए। खाँणले भने, ‘कांग्रेसको पक्षबाट बाहिर नआओस् भनेर नै विषय लिक नगरिएको हो।’
कार्यगत एकताको सन्देश दुई पार्टीले प्रतिनिधिसभाका दुई बैठकमा देखाइसकेका छन्। सर्लाही घटनाको सन्दर्भमा दुई पक्षले एउटै स्वर गरेका छन्। स्थानीय तहमा भएको सहमति तत्कालको क्षतिपूर्तिको सन्दर्भमा भएको उल्लेख गर्दै खाँणले भने, ‘न्यायिक उपचार नभईकन संसद बैठक चल्न सक्दैन।’
प्रतिबन्धित नेपाल कम्युनिस्ट पार्टीका सर्लाहीका नेता कुमार पौडेलको इन्काउन्टर र सर्लाही ईश्वरपुरका १३ वर्षीय बालकको मृत्युपछि भएको प्रदर्शनमा प्रहरीको गोली लागि मृत्यु भएका नारायण सिंह महतोको न्यायका पक्षमा संसदमा शसक्त प्रतिवाद गर्ने नेताहरु बीच सहमति भएको छ।
वार्तालाई निरन्तरता दिने पक्षमा दुवैतर्फका नेतामा सहमति भएको छ। ‘सरकारले प्रस्तुत गरेका प्रतिकूल विधेयक, सरकारका अलोकतान्त्रिक गतिविधि रोक्नका लागि दुई दलमा एक स्थानमा भएका छौं’, खाँणले भने, ‘पहिलो चरणमा संसदमा सहकार्य गर्ने सहमति बनेको छ। सदनपछि सडकमा जाने थप वार्ता होला।’
बुधबारको संसद बैठक सभामुखले बलपूर्वक सञ्चालन गरे पनि सोमबार बस्ने बैठक बस्नै नदिने कांग्रेसको तयारी छ। प्रमुख सचेतक खाँणले भने, ‘सरकारको छायाँको रुपमा सभामुख देखिनुभएको छ। सर्लाहीमा भएका घटनाको सत्यतथ्य बाहिर ल्याउनका लागि संसदीय समिति गठन नहुन्जेल संसद चल्न दिदैनौं।’ सभामुखलाई पनि यसबारे जानकारी गराइसकेको उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789632334.jpeg){kind=spacer}
-1786602170.png)
