काठमाडौं– हरेक वर्ष महिलाहरुको विशेष पर्व तीजको अवसरमा हुँदै आएको ‘तीज महोत्सव–सिर्जनशिल उद्यमी मेला’ यसपल्ट काठमाडौंसहित इटहरी र हेटौँडामा पनि आयोजना हुने भएको छ।
आयोजक महिला सिर्जनशिल केन्द्रले आज काठमाडौंस्थित सांग्रिला होटलमा पत्रकार सम्मेलन गर्दै मेलाको १८ औं संस्करण भब्य रुपमा आयोजना गर्ने तयारी भइरहेको जानकारी दियो। नेपालको ठूलो तीज मेलाको रुपमा हेरिएको यो महोत्सव विगत १७ वर्षदेखि काठमाडौंमा मात्रै आयोजना हुँदै आएको थियो। मेला यसपल्ट काठमाडौंमा यहि श्रावण १६ गतेदेखि २० गतेसम्म आयोजना हुनेछ।
यो मेला नेपालको सबैभन्दा ठूलो उपभोक्ता मेलाको रुपमा पनि चिनिँदै आएको छ। मेलामा यसपल्ट दुई सयभन्दा बढि कम्पनी, संघ, संस्थाहरुको सहभागीता हुने र १ लाख भन्दा बढि मानिसहरुले प्रत्यक्ष अवलोकन गर्ने अपेक्षा गरिएको आयोजककी अध्यक्ष मिलु थापाले जानकारी दिइन्।
यो इभेन्टमा महिला उद्यमीहरुले आफ्ना मौलिक उत्पादनहरु प्रदर्शन गर्ने गरेका छन्। ‘यो इभेन्ट उत्पादन र सेवाको व्यवसायीकरण गर्ने मात्र नभई महिला उद्यमीहरुलाई अग्रपंक्तिमा ल्याउने पनि हो,’ अध्यक्ष थापाले भनिन्, ‘तीज फेस्टिभल केवल मेलाको रुपमा मात्र नभई महिलाहरुलाई व्यवसायीक बनाउने र अवसर नपाएका महिला उद्यमीहरुलाई प्रबद्र्धन गर्ने माध्यम पनि हो।’
प्रदर्शनीलाई आकर्षक र मनोरन्जक बनाउनका लागि फ्रि फोटो सुट, लक्कि ड्र, डोर प्राइज, निशुल्क स्वास्थ्य जाँच तथा परामर्श, निशुल्क मेहन्दी लगाउने कार्यक्रम, निशुल्क कपाल कटिंग कार्यशाला, बालबालिकाहरुका लागि गेमिंग जोन, लाइभ म्यूजिक एण्ड कल्चर प्रोग्राम लगायतका कार्यक्रम समेत राखिने प्रेस मिटमा जानकारी दिइयो।
‘यहि इभेन्टमार्फत हामीले कयौं महिलाहरु आफैं उद्यमी बनेको देखेका छौं, त्यसैले यो केबल तीज फेस्टिवल मात्र नभई समग्र नेपाली महिलाहरुको लागि व्यवसाय प्रबद्र्धन गर्ने प्लेटफर्म पनि हो,’ यस कार्यक्रममा व्यवस्थापन जिम्मा लिएको इभेन्ट संसारका प्रबन्ध निर्देशक पशुपति केसीले बताए।
मेलामा सहभागी महिला उद्यमीमध्ये ५ उत्कृष्ट व्यवसायलाई प्रोत्साहन स्वरुप अवार्ड समेत प्रदान गरिने अध्यक्ष थापाले जानकारी दिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
