एसइईको परिक्षाफल प्रकाशित भयो । मन गरुङ्गो भयो । मुटु चिमोटियो र एक्कासी आँखा रसाए। किनकी मलाई अँध्यारो कुनाभित्रको अतितले पढाइसँग तेरो कहिल्यै साक्षात्कार हुन सक्दैन भनेर खिसिट्युरी गरिरहन्थ्यो र भनिरहन्थ्यो– एउटा गरिब कमलरीको सन्तानको रुपमा जन्म लिनेले असम्भव सपना देख्न नगर। तेरो पुस्तौं पुस्ताले यस्तै खालको दासी जीवन भोग्दै जानुपर्नेछ।
धन्न समय पिंजडालाई तोडेर हामीलाई बाहिर निकाल्न बलशाली भएर आइदिएछ । भाँच्यौं शोषणका खुनी नंग्राहरु, उघारिदियौं दासताका घुम्टोहरु, च्यातिदियौं दमनका पर्दाहरु र निस्कियौं मुक्त आकाशको खोजीमा।
बाल्यकालमा पूरा हुन नसकेका रहरहरु पूरा गर्दै जाने अठोट गरें मैले। त्यसैले त आज मलाई मेरा मनका रहरहरुले छोराछोरीका उमेरका नानी बाबुहरुसँगै अध्ययन गर्ने अवस्थामा उभ्याएको छ। अलि बढी भावुक छु र खुशी पनि छु।
धेरै नम्बर ल्याउन सक्ने परिस्थिति मसँग थिएन । पूरै समय दिएर अध्ययन गर्ने वातावरण पनि मसँग थिएन। त्यसकारण परिणामसँग पूर्ण रुपमा सन्तुष्ट छु । म यतिबेला फेरि पनि सम्झना चाहन्छु मलाई प्रेरणा प्रदान गरेर हौसला बढाइदिनु हुने आदरणीय अग्रज व्यक्तित्वहरु एवं सम्पूर्ण शुभचिन्तक मित्रहरूलाई। उहाँहरु प्रति नतमस्तक भएर हृदयदेखि नै सम्मान व्यक्त गर्दछु। साथै मलाई विभिन्न माध्यमबाट बधाई दिनुहुने सम्पुर्ण महानुभावहरु प्रति आभार व्यक्त गर्दछु।
सबै अवस्थाहरु बुझ्दा–बुझ्दै पनि मेरो कमलरी हुँदाको विगतलाई सम्झाएर बारम्बार हेप्नेहरु र मेरो अध्ययनको विषयलाई लिएर उपहास गर्नेहरूप्रति पनि कुनै गुनासो छैन किनकी सम्भ्रान्त वर्गको वर्गीय शोषणको चरम रुप देखेको र भोगेको मान्छे हुँ म।
आँखा उस्तै देखिएपनि, दृश्य उस्तै देखिएपनि दृष्टिकोण फरक–फरक हुन्छ भन्ने राम्रोसँग थाहा छ मलाई। त्यसैले उहाँहरुको अभिव्यक्ति पनि उही सामन्त वर्गको प्रतिनिधित्व गर्ने अभिव्यक्ति नै त होला भनेर बुझेको छु मैले।
अन्त्यमा व्यक्तित्व विकास, सिकाई र नेतृत्व विकासलाई अनवरत रुपमा अगाडि लैजाने मेरो प्रण हो त्यसैले म आदरणीय अग्रज एवं शुभचिन्तक साथीहरुबाट निरन्तर साथ सहयोगको अपेक्षा राख्दछु। साथै एसइईमा बीप्लस ग्रेड ल्याउन सफल मेरी छोरी बिनु लगायत सम्पूर्ण भाइबहिनीलाई हार्दिक बधाई दिँदै आगामी दिनमा अझै मेहनत पूर्वक अध्ययन गरी उज्ज्वल भविष्य निर्माणमा लाग्नका लागि शुभकामना व्यक्त गर्न चाहन्छु।
(सांसद चौधरीको फेसबुकबाट)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786783779.jpg)
-1786602170.png)
-1786513116.png)
