काठमाडौं- नेपाल कम्युनिस्ट पार्टी (नेकपा)को पुष्पकमल दाहाल ‘प्रचण्ड’ र माधवकुमार नेपाल पक्षले सात जना केन्द्रीय सदस्यलाई ६ महिनाका लागि निलम्बन गर्ने निर्णय गरेको छ।
बुधबार बसेको केन्द्रीय कमिटी बैठकले केन्द्रीय सदस्यहरू सुवासचन्द्र नेम्वाङ, शान्ता चौधरी, विशाल भट्टराई, महेश बस्नेत, सूर्य थापा, प्रभु साह र कर्ण थापालाई ६ महिनाका लागि निलम्बन गर्ने निर्णय गरेको नेकपा केन्द्रीय सदस्य विष्णु रिजालले बताए।
पार्टीविरोधि काम गरेको भन्दै उनीहरूलाई निलम्बनको कारबाही गरिएको स्थायी कमिटी सदस्य वर्षमान पुनले बताए।
बुधबारकै बैठकले नेम्वाङलाई नेकपा संसदीय दलको उपनेता र शान्ता चौधरीलाई सचेतकबाट हटाउने निर्णय पनि गरेको छ।
यी सातै जना नेता नेकपामा प्रधानमन्त्री केपी शर्मा ओली पक्षमा थिए। संसदीय दलका नेता समेत रहेका ओलीले केहीदिन पहिले देव गुरुङलाई प्रमुख सचेतकबाट हटाएर विशाल भट्टराईलाई नियुक्त गरेका थिए। गुरुङ नेकपाको प्रचण्ड-माधव पक्षमा छन्।
पुस ५ गते प्रधानमन्त्री ओलीको सिफारिसमा राष्ट्रपति विद्यादेवी भण्डारीले प्रतिनिधि सभा विघटन गरेपछि नेकपा राजनीतिक रूपमा दुई धारमा विभाजित भएको छ।
यद्यपि, सर्वोच्च अदालतले प्रतिनिधि सभा विघटन गर्ने प्रधामन्त्रीको निर्णय गैरसंवैधानिक भनेर बदर गरिसकेको छ। सर्वोच्चको आदेशपछि आउँदो २३ गते प्रतिनिधि सभा बैठक बस्दैछ।
प्रतिनिधि सभा बैठकअघि नै नेकपाभित्र एकले अर्को पक्षलाई कारबाही गर्ने सिलसिला चलेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1746000894.jpg)
-1791105310.png)
-1786602170.png)
