बुटवल- प्रदेश नम्बर ५ का मुख्यमन्त्री शंकर पोखरेलले जनआन्दोलन दिवसको शुभकामना सन्देश दिएका छन्। नेपालको राजनीतिक इतिहासमा चैत २६ गतेलाई विशेष महत्वको दिनको रुपमा लिँदै उनले शुभकामना सन्देश दिएका हुन्।
दलहरुको अगुवाइमा भएको २०४६ सालको जनआन्दोलनले ३० वर्ष लामो पञ्चायती व्यवस्थाको अन्त्य गर्दै बहुदलीय प्रजातान्त्रिक व्यवस्था घोषणा सम्भव भएको उल्लेख गर्दै मुख्यमन्त्री पोखरेलले जनआन्दोलनको बलमा राजाबाट निर्दलीय पञ्चायती व्यवस्था खारेज गरी बहुदलीय प्रजातान्त्रिक व्यवस्था घोषणा भएकोले चैत २६ लाई नेपालको राजनीतिक इतिहासमा विशेष महत्वको रुपमा मनाउनुपर्ने बताए।
मुख्यमन्त्री पोखरेलले दिएको सन्देशमा आजको संघीय लोकतान्त्रिक गणतन्त्रको जगका रुपमा पनि उक्त जनआन्दोलनलाई लिन सकिने उल्लेख गरिएको छ।
२००७ सालको जनक्रान्तिबाट १०४ वर्षे जहाँनिया राणा शासनको अन्त्य गरी प्रजातन्त्रको प्रार्दुभाव, जनताले जीवनशैली बनाउन नपाउँदै २०१७ पुुस १ गते राजा महेन्द्रले प्रजातन्त्रको घाँटी निमोठेर निरंकुश निर्दलीय पञ्चायती व्यवस्था स्थापना गर्नु तथा निर्दलीय पञ्चायतको ३० वर्षसम्म मुलुक अँध्यारो बाटोमा हिँड्न बाध्य भएको बेला २०४६ सालको जनआन्दोलनपछि मुलुक लोकतान्त्रिक युगमा प्रवेश गरेको उक्त सन्देशमा उल्लेख गरिएको छ।
'२०४६ सालको जनआन्दोलनलाई लोकतान्त्रिक गणतन्त्र स्थापनाको प्रस्थानविन्दु र कोसेढुंगा मान्न सकिन्छ,' मुख्यमन्त्री पोखरेलले सन्देशमा भनेका छन्, ‘म यस अवसरमा २०४६ सालको जनआन्दोलनमा सहादत प्राप्त गर्ने सबै सहिदप्रति हार्दिक श्रद्धाञ्जली अर्पण गर्दछु। साथै, घाइते योद्धा र बेपत्ता नागरिकप्रति सम्मान व्यक्त गर्दछु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
