फाइल तस्बिर
काठमाडौं- नेपाल कम्युनिस्ट पार्टी (माओवादी केन्द्र)का अध्यक्ष पुष्पकमल दाहालले केही मुठ्ठीभर व्यक्तिको आर्थिक स्तर माथि पुग्दैमा मुलुक समृद्धिको बाटोमा अघि बढेको मान्न नसकिने बताएका छन्।
प्रकाश विकल्पद्वारा लिखित 'समृद्धिको रोडम्याप' पुस्तक विमोचन समारोहलाई सम्बोधन गर्दै अध्यक्ष दाहालले समग्र मानव समाज सामाजिक न्यायसहितको सभ्यताको उचाइमा अग्रसर भए मात्र सोही आधारमा समृद्धि नाप्न सकिने बताएका हुन्।
मानिस हुनुको नाताले चेतनाको स्तर निरन्तर अघि बढ्नु प्रमुख कुरा भएको बताउँदै उनले सामाजिक न्याय र चेतना तथा सभ्यताको स्तरमा अन्तर भए समृद्धि मान्न नसकिने बताएका हुन्।
'सम्मृद्धि केलाई भन्ने? केही मुठ्ठीभर व्यक्तिहरु अरबपति, खरबपति भए। अरु धेरै व्यक्तिहरुले सामान्य मानवीय सुविधा त प्राप्त गरे तर धनी र गरिबको खाडल, सामाजिक न्यायको स्तर, मानिसको चेतनाको स्तर र सभ्यताको स्तरमा अन्तर पर्यो भने त्यसलाई समृद्धि भन्न सकिँदैन,' अध्यक्ष प्रचण्डले भने, 'समग्र मानव समाज नै एउटा हारमोनिममा, एउटा तादात्म्यमा सामाजिक न्यायसहित सभ्यताको एउटा नयाँ उचाई छुँदै अगाडि बढेको छ/छैन भन्ने नै मुख्य कुरा हो।'
समाज र जनताले नेता पैदा गर्ने भएकाले जनताको चेतनास्तरको महत्वपूर्ण भूमिका रहेको उनको भनाइ छ। लुसुन भन्ने महान कविले नेताका बारेमा भनेका कुराको दृष्टान्त दिँदै उनले जनताको चेतनास्तर राम्रो र असल भए नेतालाई पनि असल बन्न कर लाग्ने उल्लेख गरे।
'नेताहरु भनेको समाज र जनताले पैदा गर्ने कुरा हो। इतिहास र चेतनाको निर्माता जनता हो। नेता होइन। नेता मुख्य होइन। जनता मुख्य हो। जनताको चेतनाको स्तर आम रुपमा कति छ भन्ने कुराले नेता कस्ता जन्मन्छन् भन्ने निर्धारण गर्छ। नेताले जनता निर्धारण धेरै गर्दैन। निर्णायक र मुख्य जनता हो। वर्गसंघर्ष, उत्पादनका निम्ति संघर्ष र वैज्ञानिक प्रयोगबाट बन्ने औसत सामाजिक चेतनाले नेतृत्व जन्माउने हो।'
एकथरी मान्छेहरूलाई नेतालाई गाली गर्ने आदत नै भएको उनको आरोप थियो।
समृद्धिको रोडम्यापले समृद्धिको सवालमा कयौँ प्रश्न उठाएको उल्लेख गर्दै प्रचण्डले तिनै प्रश्न, उत्तर र बहसको बीचबाट नै समृद्धिको रोडम्याप अझै परिष्कृत हुँदै जाने विश्वास व्यक्त गरे।
'सम्मृद्धिको रोडम्याप पढ्दै जाँदा तपाईहरुले देख्ने थुप्रै प्रश्न हुन्छन्। म अहिले यसलाई उत्तर आइसकेको किताबको रुपमा पनि भन्न चाहन्नँ। यसले प्रश्न धेरै उठाएको छ,' उनले भने, 'बहस नयाँ ढंगले उठाउन जमर्को गरेको छ। त्यही प्रश्न, उत्तर र बहसको बीचबाट नै समृद्धिको रोडम्याप अझै परिष्कृत हुँदै जान्छ भन्ने मैले ठान्दछु।'
पुस्तकमा आफूलाई गाली गर्नेहरुको जमातलाई विभिन्न नेताका क्रियाकलापसँग तुलना गरेर लेखकले जवाफ दिने चेष्टा गरेको उल्लेख गर्दै उनले विरोधीले गरेको आलोचनाभन्दा पनि आफ्नो वर्गले आफूलाई ठिक ढंगले चिन्यो कि चिनेन भन्नेमा आफू बढी संवेदनशील हुने गरेको उल्लेख गरे।
अध्यक्ष दाहालले मन नपराउनेहरूको एक समूहले धेरै पहिले आफूलाई मार्न खोजेको, तर जनताले बचाएको उल्लेख गर्दै आफ्नो लडाईं प्रधानमन्त्रीका लागि नभई तीनै लक्षित वर्ग र समुदायको हितको लागि भएको स्पष्ट पारेका थिए।
'यथास्थितिवादी, परम्परावादी, लामो समय राज्य सञ्चालन जिम्मा लिएका मान्छेलाई नाम पनि मन पर्दैन। काम पनि मन पर्दैन। उनीहरुले कहीँ न कही टिप्पणी गरिराखेकै हुन्छन्। मैले त्यसलाई अनौठो र अस्वभाविक मान्दिनँ,' उनले भने।
आलोचकहरुले आफ्ना बारेमा धेरै नकारात्मक प्रचारबाजी गरेर जनतामाझ नराम्रो छवि बनाउने कोसिस गरेको उल्लेख गर्दै उनले लेखकले भने यथावस्थालाई छर्लङ्ग राखेको भन्दै लेखनीको प्रसंशा पनि गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
