काठमाडौं- कार्यक्रम प्रारम्भ हुँदा युट्युबमार्फत् आफ्नो सार्वजनिक छवि बनाइसकेका कमेडियनहरु समेत सहभागी थिए कमेडी च्याम्पियनमा।
कार्यक्रम सुरु हुनुअघि नै पहिचान बनाइसकेका आदर्श मिश्रा, सुमन कार्की, सजन श्रेष्ठ, प्रनेश गौतम नयाँ प्रतियोगीमाझ टिक्न सकेनन्।
उनीहरुमाझ नयाँ अनुहार खड्गबहादुर पुन मगर, सुमन कोइराला, विष्णु गौडेल र हिमेश पन्त नै हावी भए र अन्तिम चारमा उनीहरु नै पुगे।
अन्तिम चारमा पुगेकामध्ये पनि कार्यक्रमबाट बाहिरिएर वाइल्ड कार्डबाट पुनः प्रवेश पाएका सुमन कोइराला सबै प्रतियोगीमाझ हावी हुँदै गएका छन्।
‘दले दाइ’ को क्यारेक्टरमार्फत् एकाएक स्टार भएका उनका त्यसपछिका प्रस्तुति बलिया नै देखिन्छन्। सोमबारको प्रस्तुतिमा उनी ग्रामीण भेगको स्वास्थ्य चौकीको पियनको भूमिकामा देखिएका थिए। उनको प्रस्तुति जजहरुले मन पराए। पञ्चलाइनहरु राम्रा थिए। उनले आफूलाई टप थ्रीमा पुग्ने बाटो खोलेका छन्।
पोलिटिकल सटायरबाट आफ्नो अलग छवी बनाएका हिमेश पन्तको प्रस्तुति बीचमा केही खस्किएको थियो। तर सोमबारको प्रस्तुतिबाट उनी आफ्नो पुरानै लयमा फर्किएका छन्।
धार्मिक ग्रन्थ स्वास्थानीबारे प्रतिकृया दिएर विवादमा तानिएका उनले सोमबारको प्रस्तुतिमा आफूले प्रतिकृया मात्रै दिएको तर सांसदले त च्यात्नैपर्ने बताएको भन्दै बचाउको प्रयास गरेका थिए।
विष्णु गौडेलको यात्रा उस्तै नै छ। तर उनका प्रस्तुति कोइराला सामु केही कमजोर देखिन्छन्। मंगलबारको उनको प्रस्तुतिले उनी टप थ्रीमा पुग्ने नपुग्ने प्रष्ट्याउने छ।
वाइल्ड कार्डबाटै इन्ट्री गरेका रोल्पाका अर्गानिक कमेडियन खड्गबहादुरको आफ्नै शैलीको कमेडीलाई दर्शकले रुचाइरहेका छन्। रोल्पाली शैलीको संवाद र ग्रामीण परिवेश टप्प टिपेर स्टेजमा गर्ने प्रस्तुतीले उनी टप फोरसम्म पुगिसकेका छन्। उनको आगामी यात्राको टुंगो पनि मंगलबारको प्रस्तुतिले लगाउने छ।
दर्शकको मन छोयो
कार्यक्रमको घोषणाताका भारतीय कमेडी शो जस्तै नाम राखेकाले विवादमा तानिएको थियो यो कार्यक्रम। कार्यक्रम निर्माताहरुले प्रभावित भएको हैन भने पनि कार्यक्रम प्रारम्भ हुँदा सञ्चालनको शैलीदेखि धेरै पक्ष मिलेको थियो।
प्रारम्भमा केही सुस्त चलेको कार्यक्रममा प्रतियोगी छाँटिदै गएसँगै लोकप्रिय हुँदै गयो। अर्गानिक कमेडियनहरुको दमदार प्रस्तुतिले अहिले रियालिटी शो रुचाउने दर्शकमाझ अन्य रियालिटी शोको तुलनामा यो कार्यक्रम लोकप्रिय देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787673555.png)
-1786602170.png)
-1786513116.png)
