पोखरा – नेपाली सेनाको त्रिभुवन आर्मी क्लब गण्डकी प्रदेशमा भएको नवौं राष्ट्रिय खेलकुदको विजेता बनेको छ।
बिहीबार सम्पन्न खेलमा आर्मी ३ सय ७१ पदक जित्दै विजेता बनेको हो। आर्मीले १ सय ७२ स्वर्ण, १ सय १० रजत र ८९ कास्य पदक जितेको छ। लगातार तेस्रो पटक आर्मी च्याम्पियन बनेको हो । यसअघि आर्मी सातौं राष्ट्रिय खेलकुद र आठौं राष्ट्रिय खेलकुदमा च्याम्पियन बनेको थियो।
अघिल्ला संस्करण जस्तै यो पटक पनि शीर्ष ३ मा विभागीय टोलीको दबदबा कायम रह्यो। नवौं खेलकुदको दोस्रो स्थानमा सशस्त्र प्रहरी बलको एपीएफ क्लब र तेस्रो स्थानमा नेपाल प्रहरीको नेपाल पुलिस क्लब रहन सफल भए।
एपीएफले २ सय १९ र पुलिसले १ सय १९५ पदक जित्न सफल भयो। एपिएफले ६५ स्वर्ण, ७३ रजत र ८१ कास्य पदक जितेको छ । यस्तै, पुलिसले ६१ स्वर्ण, ६१ नै रजत र ७३ कास्य पदक जित्न सफल भयो।
समग्रमा चौथोमा रहेको गण्डकी प्रदेश प्रदेशतिर पहिलो नम्बरमा छ। गण्डकीले १ सय २० इभेन्टमा जित निकालेको छ। ३२ इभेन्टमा स्वर्ण, ३१ इभेन्टमा रजत र ५७ इभेन्टमा कास्य पदक गण्डकीका खेलाडीहरूले प्राप्त गरे। बागमती प्रदेश समग्रमा पाँचौ स्थानमा रह्यो। बागमतीले २४ स्वर्ण, ४७ रजत र ७४ कास्य पदकसहित १ सय ४५ पदक जित्न सफल भयो।
प्रदेश १ अंक तालिको छैटौं स्थानमा रह्यो । प्रदेश १ ले १० स्वर्ण, २३ रजत र ५० कास्य गरी कुल ८३ पदक जित्यो । सातौं स्थानमा सुदूरपश्चिम प्रदेश रह्यो । जसले समान १०–१० स्वर्ण र रजत र ४३ कास्य गरी कुल ६३ पदक जितेको छ।
पहिलो पटक सहभागिता जनाएको एनआरएनए आठौं स्थानमा रह्यो। एनआरएनले १० स्वर्ण, ९ रजत र ७ कास्य गरी कुल २६ पदक जित्दै आठौं स्थानमा रहन पुगेको हो।
लुम्बिनी प्रदेश अंक तालिकाको नवौं स्थानमा र मधेश प्रदेश दशौं स्थानमा रहे। लुम्बिनीले ६ स्वर्ण, २२ रजत र ४० कास्य गरी ६८ पदक र मधेशले ५ स्वर्ण, ८ रजत र २६ कास्य गरी ३९ पदक जित्न सफल भयो।
अंक तालिकाको अन्तिम स्थानमा कर्णाली प्रदेश रहन पुग्यो। दशौं राष्ट्रिय खेलकुदको आयोजकसमेत रहेको कर्णालीले २ स्वर्ण, ४ रजत र १२ कास्य गरी कुल १८ पदक जित्दै प्रतियोगिता सक्कायो।
नवौं राष्ट्रिय खेलकुदको आयोजक राष्ट्रिय खेलकुद परिषद् (राखेप)ले पहिलो पटक च्याम्पियनसिप ट्रफी प्रदान गरेको छ। पहिलोपटक राष्ट्रिय खेलकुदका लागि चाँदीको ट्रफी बनाइएको हो। १० लाख रुपैयाँमा तयार भएको ट्रफी च्याम्पियन बनेको त्रिभुवन आर्मी क्लबलाई प्रधानमन्त्री शेरबहादुर देउवाले प्रदान गरे।
राष्ट्रिय खेलकुद प्रतियोगिताको दशौं संस्करण २०८१ साल मंसिर २ देखि ९ गतेसम्म कर्णाली प्रदेशमा हुने भएको छ। गण्डकी प्रदेशको राजधानी पोखरामा भर्खरै सम्पन्न नवौं राष्ट्रिय खेलकुदको समापन समारोहमा राखेपका सदस्य सचिव टंकलाल घिसिङले उक्त मिति घोषणा गरेका हुन्।
बैठकमा एघारौं राष्ट्रिय प्रतियोगिताका लागिसमेत विभिन्न प्रदेशले माग राखेका थिए। मधेश प्रदेशले एघारौं संस्करण आयोजना गर्नका लागि अहिल्यै प्रस्ताव गरेको छ। यस्तै, सुदूरपश्चिम प्रदेश, बागमती प्रदेश लगायतले पनि एघारौं राष्ट्रिय खेलकुद आयोजनाका लागि दाबी गरेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
