अझै फर्किएन ठमेलको चहलपहल [तस्बिरहरु]

पर्यटन-उड्डयन

निमेष जंग राई शनिबार, असार १२, २०७८ १८:३०

काठमाडाैं- कोरोना महामारी नियन्त्रणका लागि जारी गरिएको निषेधाज्ञासँगै ठप्प बनेको ठमेल क्षेत्र अझै खुल्न सकेको छैन।

विदेशी पर्यटक तथा नेपालीहरुको भीडभाड हुने ठमेल कोरोना भाइरसको पहिलो लहर सुरु हुँदादेखि नै बन्द भएको थियो। बीचमा संक्रमणदर न्यून हुँदा केही खुले पनि कोरोना महामारीअघिको अवस्थामा फर्कन सकेको थिएन। दोस्रो लहर सुरु भएपछि पुन: ठप्प बनेको हो।

विशेषत: पर्यटकहरुको व्यापारिक केन्द्रको रुपमा परिचित ठमेलमा पर्यटनसँग सम्बन्धित अधिकांश कम्पनीका कार्यालय भेटिन्थे। तर, कोरोना महामारीपछि त्यहाँबाट अधिकांश कार्यालय अन्यत्र सरेका छन्।

कोरोनाको दोस्रो लहर नियन्त्रणका लागि सरकारले गत वैशाख १६ गतेबाट काठमाडाैं उपत्यकामा निषेधाज्ञा जारी गरेको थियो। अहिले दुई महिना कट्न लागेकोअवस्थामा कोरोना संक्रमणदर केही कम भएका कारण निषेधाज्ञा पनि केही खुकुलो बनाइएको छ।

विभिन्न सामग्रीका पसलहरुलाई बारअनुसार खोल्न दिइएको छ। पसल खुलेसँगै अधिकांश व्यापारिक क्षेत्रमा चहलपहल सुरु भएको देखिन्छ।

तर, ठमेल क्षेत्रमा शनिबार पुग्दा सुनसान देखिए। त्यहाँका सबै सटरहरुमा ताला लगाइएको थियो। मानिसहरुको चहलपहल पनि खासै थिएन।

ठमेलमा प्राय: पर्यटक लक्षित पसलहरु भएकाले पनि अन्य क्षेत्रमा जस्तो चहलपहल नदेखिएको स्थानीयले बताएका छन्।

सुनसान ठमेलका केही तस्बिरहरु: