समाचार

भीमबहादुर विश्वकर्माको हत्याविरुद्ध राजधानीमा प्रदर्शन [तस्बिरहरु]

निमेषजंग राई शनिबार, कात्तिक ६, २०७८ १८:०१

काठमाडौं- चितवनका भीमबहादुर विश्वकर्माको हत्याविरुद्ध माइतीघर मण्डलामा प्रदर्शन गरिएको छ। जात व्यवस्था उन्मूलन मोर्चा नेपालको अगुवाइमा शनिबार प्रदर्शन गरिएको हो।

चितवनको भरतपुर महानगरपालिका-४, लकुस्थित दुर्गा मन्दिरमा 'दलितहरूले पनि मन्दिर पूजा गर्न पाउनुपर्ने' भन्ने विषयमा विवाद हुँदा सोही स्थानका ५८ वर्षीय भीमबहादुरको गत असोज २८ गते मृत्यु भएको थियो। स्थानीय गैरदलित व्यक्तिहरूले कुटपिट गरी हत्या गरेको आन्दोलनरत पक्षको आरोप छ।

भीमबहादुर विश्वकर्माकी श्रीमती विन्दु विश्वकर्माले केही समयअघि उक्त मन्दिरमा पूजा गर्न जाँदा मन्दिरका पूजारीले मन्दिर प्रवेश गर्न नदिइ जातीय विभेद गरेको बताइएको छ। सोही घटनालाई लिएर भीमबहादुरले मन्दिर परिसरमा पुगेर 'दलितहरूले यो मन्दिरमा पूजा गर्न पाउनैपर्छ' भनेपछि विवाद उत्पन्न भएको थियो। सोही विवादका क्रममा कुटपिट हुँदा टाउकोमा गम्भीर चोट लागेका भीमबहादुरको मृत्यु भएको थियो।

प्रदर्शनमा सहभागीहरुले 'जात व्यवस्था मुर्दावाद', 'धार्मिक अन्धता मुर्दावाद', 'लडौं जात व्यवस्थाविरुद्धको फाइनल म्याच', 'रगत र नगद त चल्छ नि है?', 'आरक्षण मात्र होइन अतिरिक्त क्षतिपूर्ति दे' लगायत नारासहितका पम्प्लेट प्रदर्शन गरेका थिए।