काठमाडौं- बृहत् नागरिक आन्दोलनले तेस्रो जनआन्दोलन घोषणा गरेको छ। प्रतिनिधि सभा विघटनविरुद्ध सोमबार भएको बालुवाटार मार्चपासमा सरकारले व्यापक दमन गरेको भन्दै आन्दोलनले सबैखाले राजनीतिक एवम् सांस्कृतिक प्रतिगमनविरुद्ध तेस्रो जनआन्दोलन घोषणा गरेको हो।
'नागरिकले गरेको शालीन र शान्तिपूर्ण अभियानलाई प्रहरीले नै बलजफ्ती मुठभेडमा परिणत गरेको थियो। यस सरकारी रवैयाको बृहत् नागरिक आन्दोलन घोर भर्त्सना गर्दछ। सबैखाले राजनीतिक एवम् साँस्कृतिक प्रतिगमनविरुद्ध बृहत् नागरिक आन्दोलन तेस्रो जनआन्दोलन घोषणा गर्दछ,' आन्दोलनका संयोजक युग पाठकद्वारा जारी विज्ञप्तिमा उल्लेख छ।
सोमबारको शान्तिपूर्ण भेलामा सरकारले निर्मम दमन गरेको समेत आन्दोलनको ठहर छ।
प्रहरीको लाठी र फोहोरा प्रहारबाट दर्जनौँ नागरिक आन्दोलनकर्मी घाइते भएको बताइएको छ। घाइतेमध्ये संघर्ष दाहाल, कुमार बर्तौला, सिएन थारु, स्वर्णिम दिनेश, राम नरेश यादव, प्राध्यापक रमेश भट्टराईलगायतको काठमाडौं मोडल अस्पताल, हेल्पिङ ह्यान्ड्स र हिमाल हस्पिटलमा उपचार गरिएको पाठकले जारी गरेको विज्ञप्तिमा उल्लेख छ।
गम्भीर घाइते भएका निर्गराज जैसी, जनक ढुङ्गाना, सुरज तामाङ, कुलदिप शर्मा, सुनिल श्रेष्ठ र गोविन्द भण्डारी शिक्षण अस्पतालमा उपचाररत छन्।
सोमबार प्रधानमन्त्री निवास बालुवाटार घेराउ गर्न कमलपोखरीबाट माटोको टीका लगाएर बालुवाटारतर्फ मार्च पास गर्दै अघि बढेका आन्दोलनकर्मीहरुलाई प्रधानमन्त्री निवासबाट करिब पाँच सय मिटरवरै भाटभटेनी पीपलबोटमा प्रहरीले ब्यारिकेड राखेर नागरिक आन्दोलनकारीलाई रोकेको थियो। पीपलबोटमा आयोजना गरिएको कोणसभालाई डा गोविन्द केसी, खगेन्द्र सङ्ग्रौला, मोहना अन्सारी र नारायण वाग्लेले सम्बोधन गरेका थिए।
कोणसभापछि शान्तिपूर्ण रुपमा अघि बढेको जलसलाई प्रहरीले एक्कासी लाठी र पानीको फोहोरा प्रहार गरेको थियो।
नागरिक आन्दोलनमा नेकपाको पुष्पकमल दाहाल प्रचण्ड-माधवकुमार नेपाल समूहले समर्थन गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775812183.jpg)
-1764146706.png)
-1779545841.jpg)
