काठमाडाैं-पार्टीभित्रको विवाद बढ्दै गएपछि सहमति खोज्न पार्टी सभापति शेरबहादुर देउवाले वरिष्ठ नेता रामचन्द्र पाैडेलसमूहका नेतालाई बैठकका लागि बोलाएका छन्। देउवा निवास बुढानीलकण्ठमा दुई पक्षका नेताहरुको बैठक जारी रहेको बताइएको छ।
विभाग गठन, क्रियाशील सदस्यता वितरण/ नवीकरण र केन्द्रीय सदस्य रहेकाे व्यक्तिले भातृ संस्थाका पदाधिकारी नत्यागेको विषयमा विवाद छ। सभापति देउवाले गठन गरेको विभाग विधानविपरीत भएको भन्दै पौडेल पक्षले मान्य नहुने बताइरहेको छ।
महाधिवेशन सकिएको २ महिनाभित्र गठन हुनुपर्ने विभाग महाधिवेशन कार्यतालिका प्रकाशित भएपछि गठन भएको थियो। देउवाले विभाग संख्यासमेत बढाएका छन् भने २० विभागमा प्रमुख तोकिसकेका छन्।
असार २५ बाट सुरु भएको क्रियाशील सदस्यता वितरण/ नवीकरणमा संस्थापन पक्षले पार्टी संरचनाभन्दा बाहिरबाट फारम पठाएको आरोपसमेत लागेको छ। पौडेल पक्षका नेताहरुले यसअघि पटक-पटक बैठक गरि देउवाको निर्णयप्रति ध्यानाकर्षण गराएका थिए।
देउवा निवासबाट भएको छलफलमा दुवै पक्षका शीर्ष नेता सहभागी भएको बताइएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।