नारायण अधिकारी/रासस
भरतपुर- विगत दुई वर्षयता अण्डाको मूल्यले खर्च धान्न नसकेपछि कुखुरापालक कृषक विस्थापित हुने अवस्थामा पुगेका छन्। कतिपय साना किसानका खोर खाली हुन थालेका छन् भने बैंकमा ऋण थप्दै कुखुरा पाल्नुपर्ने बाध्यता कृषकसामु देखापरेको छ। नेपाल अण्डा उत्पादक सङ्घका केन्द्रीय अध्यक्ष शिवराम केसीका अनुसार निर्धारण गरिएको मूल्यमा अण्डा बिक्न सकेको छैन।
सङ्घले ठूलो अण्डा प्रतिक्रेट फार्म मूल्य २ सय ७० रुपैयाँ तोकेको थियो। तर, हाल कृषकको फार्मबाट २ सय २५ रुपैयाँ हाराहारीमा बिक्री भइरहेको छ। खपत बढ्न नसक्नु र उत्पादन बढी नै भएकाले कृषकले मूल्य नपाएको केसीको भनाइ थियो।
दैनिक २९ लाख गोटा अण्डा उत्पादन हुने गरेको भन्दै केसीले लागत मूल्य नपाएका कारण कृषक मर्कामा परेको बताए। दानाको मूल्य र मजदुरको पारिश्रमिक बढेको तर अण्डाको मूल्य नबढेपछि कृषक मर्कामा परेका हुन्।
पूर्वी चितवनमा कुखुरा पाल्दै आएका सङ्घका केन्द्रीय उपाध्यक्ष किरणभूषण ओली एउटा अण्डा उत्पादन गर्न १० रुपैयाँ भन्दा बढी खर्च हुने भए पनि अहिले कृषकले ७ रुपैयाँ हाराहारी मात्र पाउन सकेको बताउँछन्।
एउटै अण्डामा ३ रुपैयाँभन्दा बढी नोक्सान बेहोर्नु परेका कारण कृषक विस्थापित हुने अवस्थामा पुगेको उनले गुनासो गरे। केही महीनाअघि अण्डाको मूल्य प्रतिक्रेट १ सय २० रुपैयाँसम्म झरेको भन्दै उनले त्यतिबेलादेखि निरन्तर रुपमा कृषकले नोक्सान बेहोर्दै आएको बताए।
देशमा आत्मनिर्भर बनेको यस पेसाबाट कृषक विस्थापित हुनबाट रोक्न सरकारलाई गुहारेको ओलीले बताए। प्रधानमन्त्री, पूर्वप्रधानमन्त्री, कृषिमन्त्री, अर्थमन्त्री, सांसदलगायत सरोकारवाला निकायलाई यस विषयमा जानकारी गराउने काम सङ्घले गरिरहेको उनको भनाइ छ।
पोल्ट्री व्यवसायी डा तिलचन्द्र भट्टराईले व्यवसायी बीचको आन्तरिक समस्याका कारण मूल्यमा वृद्धि हुन नसकेको दाबी गरे। यसअघिको संघको केन्द्रीय समितिलाई अविश्वास गर्दै बीचमा नै विशेष अधिवेशन गरेपछि पुरानो र नयाँ समितिको बीचमा समन्वय हुन सकेको छैन। यसकै कारण पनि मूल्यमा समस्या आएको भनाइ भट्टराईको छ।
सप्लायर्स बीचको तालमेलको अभावमा पनि समस्या देखिएको भन्दै उनले व्यवसायी र सप्लायर्सका बीचमा बृहत् भेला गरेर समस्याको निकास निकाल्नुपर्ने सुझाव दिए।
कुखुरा व्यवसायी मदन पोख्रेल उत्पादन बढी भएको तर खपत गर्न नसकेका कारण कृषकले मूल्य नपाएको बताउँछन्। साना किसानको खोर खाली हुन थालेको र ठूलाले एक बैंकबाट अर्कोमा ऋण सारेर रकम बढाउँदै पेसा धान्ने काम मात्र गरिरहेको पोख्रेलको भनाइ छ।
संघका निवर्तमान अध्यक्ष त्रिलोचन कँडेल व्यवसायी बीचमा एकापसमा लडाइँ गर्दा आफैं सिद्धिने भएकाले मिलेर जानुको विकल्प नभएको बताउँछन्।
व्यवसायी बीचमा समन्वयकै कमीले तालमेल नमिल्दा अण्डाले मूल्य पाउन नसकेको उनको भनाइ छ। देशमा आत्मनिर्भर यस पेसालाई बचाई राख्नका लागि राज्यले पनि सहयोग गर्नुपर्ने कँडेल बताउँछन्। पोल्ट्री क्षेत्रमा लगानी भएको १ अर्बभन्दा बढीमध्येको आधा हिस्सा अण्डा उत्पादनमा लगानी भएको उनी बताउँछन्।
अण्डा उत्पादन गर्ने कृषकले मूल्य नपाए पनि किनेर खाने उपभोक्ताले भने प्रतिगोटा १५ रुपैयाँ हाराहारी तिर्न बाध्य छन्। कृषकबाट उपभोक्तासम्म पुग्दा पाँच तह पार गर्नुपर्ने भएकाले बिचौलियाले लाभ लिए पनि कृषक र उपभोक्ता दुवै ठगिएका छन्।
हाल नेपालमा ७ हजारभन्दा बढीले कुखुरा पालेको अनुमान छ। उनीहरुका फार्ममा २ लाखभन्दा बढी मजदुरले काम गर्ने कँडेलले बताए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।