ad

EXCLUSIVE : जेलभित्रै जुवाखाल, नाइकेले उठाउँछन् लाखौं (भिडियोसहित)

नारायण अधिकारी

Nepal Live

काठमाडौं– कारागारकोे उद्देश्य कैदीबन्दीलाई सुधार्नु हो, ताकि जेल बसेर छुटेको व्यक्तिले फेरि अपराध नगरोस्। त्यसैले पनि कारागारलाई सुधारगृह भनिँदै आएको छ। तर बिडम्बना, कारागार सुधारगृह नभई आपराधिक थलो बन्न थालेको एउटा तथ्य नेपाल लाइभलाई प्राप्त भएको छ।

फुटबल, भलिबल, ब्याडमिन्टन खेल्न तथा पढ्न–लेख्न कारागारमै पाइन्छ। तर कारागारभित्र जुवातास खेल्न तथा मादक पदार्थ सेवन गर्न पाँइदैन।

समाजलाई पाच्य नहुने यस्ता गलत काम भने कारागारमा रहेका प्रहरी, कारागारका कर्मचारीकै सेटिङ र लापरबाहीमा हुँदै आएको तथ्य फेला परेको छ। 

यसको ज्वलन्त उदाहरण हो, काठमाडौंबाट नजिकै रहेको सिन्धुपाल्चोक कारागार। जहाँका कैदीलाई तासजुवा खेल्न, रक्सी खान, मोबाइल बोक्न र पोर्ट खेल्न छुट छ। 

जेलर यादव आचार्य हप्ताको एकपटक कारागार पुग्ने र ६ दिनको हाजिर गरेर हिँड्ने गरेका छन्। कारागारका नासु नवराज सेन र प्रहरीको सेटिङमा चौकीदार तथा नाइकेहरु मिलेर कारागारमा जुवातास खेलाएर लाखौं रुपैयाँ कमाएका छन्। 

जुवा खेलाएर दसैंमा २ लाख असुली 
अघिपछि फाट्टफुट्ट जुवातास चले पनि दसैंमा भने सिन्धुपाल्चोक कारागारमा क्यासिनोसरह नै जुवातास चलेको स्रोतले नेपाल लाइभलाई बतायो। तास खेलेको भिडियो समेत प्राप्त भएको छ । जुवातास खेलाउने कामको सम्पूर्ण अगुवाइ भने चौकीदार गणेश लामिछाने र मुल नाइके भोला कार्कीले गरेका छन्।

सिन्धुपाल्चोकको साविकको भोटेचौर गाविस–४ का लामिछाने बलत्कार गरी हत्या गरेको आरोपमा जेल परेका व्यक्ति हुन्। भोजपुर घर भएका मुल नाइके कार्की ठगी र कीर्ते मुद्दामा जेल परेका व्यक्ति हुन्। 

यी दुवैको सेटिङमा कारागारमा कारागार प्रशासन र प्रहरीलाई मिलाएर जुवातास चलेको स्रोतको भनाइ छ। 

कैदीलाई जुवा खेलाउने र यसरी जुवातास खेलाएवापत कार्की र लामिछानेले रकम उठाउने गरेको स्रोतको भनाइ छ । दसैंमा मात्रै कार्की र लामिछाने खालवाला भएर दुई लाख रकम उठाएको कारागार स्रोतले जानकारी दियो।

चौकीदारमा प्रहरीकै निगरानीमा चामल, दाल, तरकारी लिन बाहिर जान छुट हुन्छ। त्यसरी बाहिर गएका उनीहरुले तास लिएर जाने र खेलाउने गरेको स्रोतले जानकारी दियो। 

जुवातास खेलेर हारेपछि रकम तिर्न नसक्नेलाई ढोका थुनेर, झुम्का, वीरगञ्जका कारागारमा सरुवा गर्नेसम्मको धम्की चौकीदार र मुल नाइकेले दिने गरेका छन्।

कैदीका दुई/दुई वटा मोबाइल, दैनिक ५ सय आम्दानी 
कारागारमा बस्ने कैदीले मोबाइल समेत बोक्न पाउँदैनन्। तर सिन्धुपाल्चोक कारागारका केही कैदीलाई भने यो पनि छुट छ। चौकीदार गणेश लामिछाने, मुल नाइके भोला कार्की र भारतीय कैदी सुनिल सिंहले कारागारभित्रै दुई/दुई वटा मोबाइल चलाउँदै आएका छन् ।

उनीहरुका यी मोबाइल व्यक्तिगत प्रयोगका लागि मात्रै होइन, आम्दानीको मुख्य स्रोत पनि बनेको छ। सिन्धुपाल्चोक कारागारका कैदीलाई मोबाइलबाट भिडियो च्याट गराइदिँदै पैसा असुल्ने गरेका छन्। 

त्यस्तै कारागारले उपलब्ध गराएको टेलिफोनबाट समेत चौकीदार र नाइकेले प्रतिमिनेटको ५ रुपैयाँ असुल्दै आएको स्रोतले जानकारी दियो। यसरी उनीहरुले टेलिफोनबाट मात्रै दिनहुँ ५ सय रुपैयाँ आम्दानी गर्ने गरेको स्रोतले नेपाल लाइभलाई जानकारी दियो। 

मोबाइलबाटै उनीहरुले फेसबुक, ट्वीटर समेत चलाउने गरेका छन्। यसबारे कारागार मौन छ। 

भिडियो :

तीन दिन ‘रुम प्याक’, नक्कली कागजात बनाई २० हजार असुली
कैदीहरुले खाने दैनिक रासनमा समेत चौकीदार र नाइकेले घोटाला गर्ने गरेको कैदीहरुले बताएका छन्। कैदीहरुलाई राज्यले सिदावापत हरेक महिना १८ सय रुपैयाँ उपलब्ध गराउँदै आएको छ।

तरकारीमा तेल, मसलासमेत नहाली, नुनपानी हालेर दिने गरेको कैदीहरुको गुनासो छ।

दाल–तरकारी मिठो भएन भनेर गुनासो गरेका ६६ वर्षीय कैदी किरण स्याङ्तानलाई तीन दिन, तीन रातसम्म मानसिक, शारीरिक यातना दिएर रुमप्याक (कसैसँग बोल्न र भेट गर्न नदिई कोठामा थुन्ने कामसमेत गरेको स्रोतले नेपाल लाइभलाई जानकारी दियो।

यतिमात्रै होइन, चौकीदार र नाइकेहरुको दादागिरी कारागारमा अझ चुलिँदो छ। आफूहरुको सरकारी वकिलसम्मको कनेक्सन भएको भन्दै कैदीबाट रकम उठाएर खाने गरेको पाइएको छ।

चौकीदार र नाइके मिलेर कैद मिनाहा गर्न सरकारी वकिलको कार्यालयबाट कागजात मिलाइदिन्छु भन्दै हस्त तामाङबाट २० हजार रुपैयाँ असुलेको पाइएको छ। गाई मारेको आरोपमा कैद सजाय भोगेका तामाङको नयाँ मुलुकी अपराध संहिताअनुसार कैद भुक्तान भइसकेको थियो। 

सो कुराको जानकारी नभएका तामाङलाई उनीहरुले सरकारी वकिल कार्यालयको नककली कागजात बनाएर २० हजार रुपैयाँ खाएका थिए। 

सामान्यतया बलत्कार, हत्या जस्ता जघन्य अपराधका कैदीलाई चौकीदार तथा नाइके बनाउने चलन छैन। तर चौकीदार बनेका लामिछाने बलत्कार र हत्यामा दोषी ठहर भएर कैद भोगेका व्यक्ति हुन्।

त्यस्तै विदेशी नागरिक चौकीदार, नाइके तथा उनीहरुको सहयोगी बन्न पाउँदैनन्। तर रकम खाएरै भारतीय नागरिक सुनिल सिंहलाई भाइनाइके बनाइएको कारागार स्रोतले जानकारी दियो।

छानविन गर्छौं, प्रमाण पुगे कारबाही गर्छौंः जेलर आचार्य 
कारागारभित्रै जुवातास खेलेको भन्नेबारे आफूलाई कुनै जानकारी नै नभएको सिन्धुपाल्चोक कारागारका जेलर यादव आचार्यले बताए। बाहिर त तास जुवा खेल्न पाँइदैन भने झन् कारागारभित्र खेल्न नपाउने उनको भनाइ छ।

तर कैदीहरुले प्रहरी र कारागार प्रशासनसँग सेटिङ मिलाएर कारागारभित्रै जुवा खेलेका छन्। दिनरात कारागारभित्र जुवातास चल्दा समेत कारागार कार्यालय भने कानमा तेल हालेर बसेको छ।

‘२४ सैं घन्टा हामी कारागारमा हुने कुरा पनि भएन। कसरी जुवातास खेले, त्यो हामीलाई जानकारी भएन,’ जेलर आचार्यले भने, ‘तिहारमा खेल्न पाउनुपर्छ भनेर माग भने गरेका थिए। मैले बाहिर त खेल्न मिल्दैन भित्र झन् कहाँ मिल्छ ? भनेर पठाएको थिएँ।’

यसबारे आफूभन्दा पनि प्रहरीको बढी जिम्मेवारी हुने जेलर आचार्यले बताए। ‘हामी त बाहिर बस्छौं। भित्र २४ सैं घन्टा प्रहरी हुन्छ। यदि जुवातास खेलेको हो भने हाम्रो भन्दा पनि प्रहरीको कमजोरी हो,’ उनले भने।

जुवा खेलेको भन्ने सूचना नै आफूले भर्खरै थाहा पाएकाले छानविन गर्ने र प्रमाण पुगेमा कारबाही गरिने प्रतिबद्धता जेलर आचार्यले जनाए।

तर, कायममुकाय प्रमुख जिल्ला अधिकारी कृष्णप्रसाद अधिकारीसँग राम्रो सम्बन्ध भएकाले जेलर आचार्यले हप्ताको एक पटकमात्रै कारागार गएर हाजिर लगाउने गरेको स्रोतको भनाइ छ।

कारागारको सुरक्षामा अहिले सई काशी बुढा खटिएका छन्। उनले कार्यालयमा हाजिर गरेको १० दिनमात्रै भएको छ। उनले यस घटनाबारे आफूलाई केही थाहा नभएको बताए। ‘म हाजिर भएको १० दिनमात्रै भयो।

जेलरसँग भेटसमेत भएको छैन,’ सई बुढाले थपे, ‘यस्तो घटनाको बारेमा मलाई त केही जानकारी नै छैन। अहिलेबाटै म बुझ्छु र गल्ती देखिएमा तुरुन्त कारबाही गर्छु।’

दसैंको बेलामा कारागारको सुरक्षा असईको कमान्डमा थियो। दसैं–तिहारमा मादक पदार्थ सेवन गर्दा र जुवातास खेल्दाका असईको अहिले अवकाश भइसककेको छ। उनको ठाउँमा अहिले सई बुढा हाजिर भएका हुन्।
 

प्राप्त प्रतिकृयाहरू

यसमा तपाइको मत


पढ्नै पर्ने