ad

निर्मला पन्त हत्या अनुसन्धान : हचुवामै डिएनए परीक्षण, पोलिग्राफदेखि बैंक एकाउन्टसम्म चेक

नारायण अधिकारी

Nepal Live

काठमाडौं– कञ्चनपुरकी १३ वर्षीया बालिका निर्मला पन्तको बलात्कारपछि हत्या भएको ४ महिना पुग्न लाग्दासमेत प्रहरीले दोषी पत्ता लगाउन सकेको छैन।

साउन १० गते साथी रोशनी बमको घरमा गएकी निर्मला भोलिपल्ट ११ गते नजिकैको उखुबारीको पानीमा मृत भेटिएकी थिइन्। लामो समयसम्म पनि प्रहरीले हत्यारा पत्ता लगाउन नसकेको भन्दै आइतबारदेखि निर्मलाका बाआमा जिल्ला प्रशासन कार्यालय अगाडि पाल टाँगेर धर्ना बसेका छन्। हत्यारा पत्ता नलागेसम्म धर्ना बस्ने उनीहरुले बताएका छन्।

निर्मला पन्तको हत्यारा पत्ता लगाउन अनुसन्धानमा खटिएको प्रहरी टोलीले भने अहिलेसम्म नयाँ तथ्य फेला पार्न सकेको छैन। पन्तको अनुसन्धानमा प्रहरीको केन्द्रीय अनुसन्धान ब्यूरो सिआइबीबाट समेत टोली खटिएको छ। सिआइबीले अहिलेसम्मको घटनाको कुनै लिंक नै फेला पार्न नसकेको जनाएको छ।

सिआइबीका डिआइजी निरज शाहीले विभिन्न सेक्टरमा अनुसन्धान गर्ने काम भए पनि कुनै नयाँ तथ्य फेला पार्न नसकिएको बताए। नेपाललाइभसँग कुरा गर्दै उनले भने, ‘एउटा लिंक पत्ता लगाउन सके उत्तर आइहाल्थ्यो। लिंक भेट्टाउन सकिएको छैन। अनुसन्धान एकदमै जटिल छ। शंका गर्ने ठाउँ धेरै छ, पुष्टि गर्ने अाधार छैन।’

अनुसन्धान प्रगति शून्य, हचुवामै डिएनए

बालिका पन्तको बलात्कारपछि हत्यामा गम्भीर लापरबाही गरेको भन्दै कञ्चनपुरका तत्कालीन एसपी डिल्लीराज विष्टलाई हटाएर उनको ठाउँमा एसपी कुवेर कडायतलाई पठाइएको थियो। पछि एसपी विष्ट र प्रहरी निरीक्षक जगदीश भट्टलाई गृहमन्त्रालय सेवाबाट समेत हटाएको छ। 

विष्टको ठाउँमा जिम्मेवारी सम्हाल्न पुगेका एसपी कडायतको टोलीले अहिले अनुसन्धान गरिरहेको छ। अनुसन्धानमा कुनै प्रगति नभएको एसपी कडायतले बताएका छन्। अनुमानकै भरमा चार जनाको डिएनए परीक्षण गर्नुबाहेक कडायतको टोलीले पनि नयाँ क्लु फेला पार्न सकेको छैन।

अनुमानकै भरमा डिएनए परीक्षण गरेकाले प्रहरीले परीक्षण गरिएकाको नाम समेत गोप्य राखेको छ। चार जनाको डिएनए रिपोर्ट आएपछि अन्य व्यक्तिको पनि डिएनए चेक गर्ने एसपी कडायतले बताए।

प्रहरीले डिएनए चेक केही शंका र हचुवाकै भरमा लिँदै आएको प्रहरीकै कुराबाट प्रष्ट भएको छ। अनुसन्धान प्रगति शून्य र लिंक नै पत्ता लाग्न नसकेको भनिरहेको बेला प्रहरीले अन्धाधुन्ध डिएनए परीक्षण गर्दै आएको प्रष्ट हुन्छ।

यसअघि नागरिकको दबाबकै भरमा एसपी डिल्लीराज विष्ट, छोरा किरण विष्ट, भीमदत्त नगरपालिकाका मेयर सुरेन्द्र विष्टका भतिजा आयुष विष्टको डिएनए परीक्षण गरिएको थियो। त्यो भन्दाअघि दिलिपसिंह विष्ट, चक्र बडुको डिएनए परीक्षण नेगेटिभ देखिसकेको थियो। 

सोधपुछ र बयान लिनेबाहेक अन्य कुनै काम अनुसन्धानमा खटिएको प्रहरी टोलीले गर्न सकेको छैन। अनुसन्धानमा बालबालिका तथा महिला निर्देशनालयकी एसपी दुर्गा सिंह पनि खटिएकी छिन्। सिंहको टोलीले केही नयाँ कुरा बाहिर ल्याउन सकेको छैन।

पोलिग्राफदेखि बैंक एकाउन्टसम्म चेक 

अनुसन्धानमा खटिएका प्रहरी टोलीबाट नै गम्भीर लापरबाही भएको भन्दै प्रहरी प्रधान कार्यालयले गत भदौ ३१ गते एआइजी धिरु बस्न्यातको नेतृत्वमा ९ सदस्यीय समिति गठन गरेको थियो। समितिमा डिआइजी निरज शाही, एसएसपी उत्तम सुवेदी, डिएसपीहरु रमेश थापा, दधिराम न्यौपाने र कौशल बुढाथोकीलगायत ९ जना छन्। 

टोलीले अनुसन्धानमा सिआइबीबाट खटिएको टोली, घटनास्थलमा गएको टोली, एसपी विष्टलगायत २० जना प्रहरीमाथि अनुसन्धान गरिरहेको छ। एआइजी बस्न्यातको टोलीले घटनामा प्रत्यक्ष÷अप्रत्यक्ष संलग्न प्रहरी अधिकारीको पोलिग्राफ परीक्षणदेखि बैंक एकाउन्टसम्म चेक गरिसकेको छ।

घटना गुपचुप पार्न आर्थिक चलखेल भएको छ कि भनेर बस्न्यातको टोलीले प्रहरी अधिकारी र उनीहरुका आफन्तहरुको बैंक एकाउन्ट चेक गर्दा समेत कुनै क्लु फेला पार्न नसकेको स्रोतले नेपाललाइभलाई जानकारी दियो।

त्यसैगरी झुटो बोलेको पत्ता लगाउन पोलिग्राफ चेक गर्दा समेत कुनै तथ्य फेला पार्न सकेको छैन। शंकास्पद प्रहरी अधिकारीको मोबाइल चेक, कल डिटेललगायत सबै कुराहरु चेक गर्दा पनि घटनाले कुनै नयाँ कुरा पत्ता लगाउन नसकेको स्रोतले जानकारी दियो।

त्यस्तै घटनास्थल कञ्चनपुर नै पुगेर फर्किएको एआइजी बस्न्यातको टोलीले घटना लुकाउन कुन प्रहरीले कस्तो भूमिका खेले भन्नेबारे नयाँ तथ्य फेला पार्न नसकेपछि फाइल बुझाउने तयारीमा रहेको स्रोतले जानकारी दियो। 
 

प्राप्त प्रतिकृयाहरू

यसमा तपाइको मत


पढ्नै पर्ने