वैदेशिक रोजगारीमा गएका चेली भन्छन्- तिहारमा माइतीको अभाव छैन

विदेशका नेपाली दाजुभाइलाई भाइटीका

Nepal Live

काठमाडौं– दसैं सकिएलगत्तै तिहारको तयारी सुरु हुन्छ। तिहारमा काग, कुकुर, गाई, लक्ष्मी, गोवर्धन र दाजुभाइ/दिदीबहिनी पूजा हुन्छ। देउसी-भैलो खेल्दै सेलरोटीलगायतका मिष्ठान्न भोजन खाई रमाइलो गरी तिहार मनाउने गरिन्छ। 

पछिल्लो समय शिक्षा, रोजगारी र अन्य अवसरको खोजीमा एक देशदेखि अर्को देशमा गएर बस्ने चलन बढ्दै गएको छ। यसकारण चाडपर्वको पनि दायरा फराकिलो बन्दै गएको छ। सीमित समुदायमा मानिने चाडपर्व समुद्रपारका देशमा पनि मनाउन थालिएको छ। 

रोजगारीको खोजीमा खाडीका देश गएका हुन् अथवा अध्ययनका लागि युरोप–अमेरिका पुगेका नेपाली नै किन नहुन्, जहाँ नेपाली त्यहाँसम्म पुग्ने गरेको छ, दसैं–तिहार। आफन्त हुनेहरूले आफन्त भेटघाट र नहुनेहरूले समेत आपसमा भेला भएर दसैंतिहार मनाउने गरेका छन्। 

चार वर्षअघि रोजगारीका लागि युएई गएकी धरानकी दीपा लिम्बूले दसैंमा नेपाली दाजु–भाइको हातबाट टीका ग्रहण गर्छिन। दसैंमा आफूलाई टीका लगाइदिएका नेपाली दाजुभाइ तथा अन्य दिदीबहिनी मिलेर टीका लगाउने गरेको बताइन्। 

सरकारले घरेलु महिला कामदारलाई खाडीका देश जान प्रतिबन्ध लगाएपछि फेरि विदेश आउन नपाउने भएकाले स्वदेश फर्कन नसकेको बताउँदै ४ वटा दसैतिहार उनले युएईमै मनाइन्। 
चाडपर्वका बेला नेपाली दाजुभाइ तथा दिदीबहिनी मिलेर विदेशमा नै मनाउने गरेको उनले बताइन्। तर, नेपालमा जस्तो दसैंतिहारको महत्व र रमाइलो नहुने गरेको उनको भनाई छ।  

दीपासँगै युएईमा नै काम गर्दै आएकी काभ्रेकी सुनिता कार्कीले पनि तीन वर्षका चाडपर्व विदेशमा नै मनाइन्। कार्कीले पनि त्यहाकै नेपाली दाजुभाइलाई टिका लगाएर तिहार मनाउने गरेकी छन्। ‘नेपालमा जस्तो रमाइलो त हुदैन, तर ‘नहुनु मामा भन्दा कानो मामा जाति’ भनेझैं नेपाली भेला भएर मनाउने गरेका छौं’ फोन सम्पर्कमा उनले भनिन्। 

तीन वर्षअघि विद्यार्थी भिसामा जापान पुगेकी सरिता खड्काले पनि त्यँहीका नेपाली दाजुभाइलाई भाइटीका लगाएर तिहार मनाउने गरेको बताइन्। उनले जापानमा तिहार मनाउन थालेको दुई वर्ष भइसकेको छ। 

दुई वर्षअघि रोजगारीका लागि पोल्यान्ड पुगेकी झापाकी सुभद्रा कँडेलले त्यहाँ रहेका नेपाली दाजुभाइलाई टिका लगाएर तिहार मनाउने गरेको बताइन्। नेपालमा जस्तो रमाइलो विदेशमा नहुने भएपनि भाइटीका लगाउन माइतीको अभाव भने नभएको उनले बताइन्।  रोजगारीमा आएका नेपाली दाजुभाइलाई सामूहिक रूपमा भेला गरी टीका लगाउने गरको उनले बताइन्। 

वैदेशिक रोजगारीमा आएपछि चाडपर्वभन्दा पनि कामकै महत्व ठूलो महत्व हुने गरेको उनीहरू बताउँछन्। रोजगादाता कम्पनीले नेपालीको चाडपर्वमा बिदा नदिने भएकाले पनि चाडपर्व रमाइलो नहुने त्यहाँका नेपालीको अनुभव छ। 

विदेशमा पनि चाडपर्व मनाइने भएपनि रोजगारी वा अन्य कामले विदेश पुगेका नेपालीमा भने सकेसम्म यही अवसरमा स्वदेश फर्किने गरेका छन्।
 
सामाजिक सञ्जालले चाडपर्वको महत्व झल्काउँछ 
सामाजिक सञ्जालले देश–विदेशमा रहेका नेपाली जोडिरहेको छ। सामाजिक सञ्जाल प्रयोगकर्ताको संख्या बढ्दै गएपछि चाडपर्व गाउँगाउँका घटनामा पनि समाजिक सञ्जालमा छरिने गरेका छन्। फेसबुक, ट्विटरलगायतका सामाजिक सञ्जालले दशै–तिहारलगायतका पर्वको महत्व बढाउँदै लगेको विदेशमा रहेका नेपालीले बताउँछन्। 

चाडपर्व मनाएका तस्वीर सामाजिक सञ्जालमा आदानप्रदान गर्दा देश–विदेशमा रहेका आफन्तबीच खुसीयाली पनि साटासाट हुने गरेको छ। नेपालमा रहेका आफन्तले दसैंतिहार कसरी मनाए भन्ने कुरा तत्काल थाहा पाइने भएकाले सामाजिक सञ्जालले समेत चाडपर्वको महत्व थप्दै गएको छ।  

विदेशका नेपालीले पनि सामाजिक सञ्जालमा आफन्त र परिवारले चाडपर्व मनाएको तस्बिर हेरेर सन्तुष्टि लिने गरेको बताउँछन्। 

अहिले वैदेशिक रोजगारीमा करीब ३३ लाख नेपाली कार्यरत रहेका छन्। जसमध्ये दसैंतिहार मनाउन वा बिदा लिएर एक लाखभन्दा धेरै नेपाली स्वदेश फर्किने गरेको अनुमान सरकारको छ।

तपाईको प्रतिक्रिया

यसमा तपाइको मत


सम्बन्धित समाचार