पूर्वराजा ज्ञानेन्द्रलाई २४ वर्ष उपचार सेवा दिएका डा पाण्डेको निधन

Nepal Live

काठमाडौं- पूर्वराजा ज्ञानेन्द्र शाहका चिकित्सक डा श्यामबहादुर पाण्डेको निधन भएको छ। ७ वर्षदेखि दुवै मिर्गौला फेल भएका वरिष्ठ चिकित्सक पाण्डेको बल्खुस्थित बयोधा अस्पतालमा निधन भएको हो। उनको मंगलबार राति साढे ८ बजे उपचारका क्रममा निधन भएको अस्पतालले जनाएको छ। 

मिर्गौला फेल भएका पाण्डेको मस्तिस्कघात भएको थियो। उनी पछिल्लो ५ दिनयता बयोधाको आइसियूमा उपचाररत थिए। 

केही दिनअघिसम्म बिरामीको उपचारमा सक्रिय थिए पाण्डे। मिर्गौला फेल भए पनि आफ्नो उपचार गराउँदै अरुको उपचार गर्दै हाँसिरहेका भेटिन्थे।

उनले सन् १९६३ मा एमबिबिएस पास गरेका हुन्। उनी राजपरिवारका सदस्यको चिकित्सकसमेत थिए। 

सेनाका चिकित्सकका रुपमा २७ वर्ष काम गरेका उनले तत्कालीन अधिराजकुमार हुँदै ज्ञानेन्द्रको चिकित्सकका रुपमा काम गरेका थिए। तर, शाही चिकित्सकको उपाधिलाई उनी गर्वको विषय बनाउन चाहँदैन थिए। 

पूर्वराजा ज्ञानेन्द्रको चिकित्सकको रुपमा उनले २४ वर्षसम्म उपचार सेवा दिएका थिए।

डा पाण्डेका श्रीमती, दुई छोरी र एक छोरा छन्। उनको बुधबार नै पशुपति आर्यघाटमा अन्तिम संस्कार गरिने बताइएको छ।

काठमाडौंको डिल्लीबजारमा जन्मे–हुर्केका डा पाण्डेका पिता जितबहादुर पाँडे नेपाली सेनाका अधिकृत थिए।

तपाईको प्रतिक्रिया

यसमा तपाइको मत


सम्बन्धित समाचार