निर्मला हत्या प्रकरण : एसपी विष्टलाई बर्खास्त गर्न स्पष्टिकरण सोध्दै गृह मन्त्रालय

Nepal Live

काठमाडौं– कन्चनपुरकी बालिका निर्मला पन्तको बलात्कार तथा हत्या प्रकरणमा प्रमाण नस्ट गर्ने कार्यमा संलग्न रहेको आरोप लाग्दै आएका तत्कालीन कन्चनपुर प्रहरी प्रमुख तथा प्रहरी उपरिक्षक(एसपी) डिल्लीराज विष्ट र प्रहरी निरीक्षक जगदीश भट्टराईलाई स्पष्टिकरण सोध्ने तयारी गरेको छ।

बर्खास्त गर्नु अघि आफ्नो कुरा राख्न पाउने प्राकृतिक न्यायको सिद्धान्त अनुसार उनीहरुलाई उक्त प्रकरणमा किन कारबाही नगर्ने भनि स्पष्टिकरण सोध्न लागिएको हो। उनीहरुले दिएको जवाफ चित्तबुझ्दो नभएमा सरकारले पुनः जवाफ माग्ने वा बर्खास्त गर्न कारबाही प्रक्रिया अघि बढाउने छ।

गृह मन्त्रालयले एसपी विष्ट र प्रनि भट्टराईलाई बर्खास्तसम्म गर्नेगरी कारबाही थालेको गृहसचिव प्रेमकुमार राईले पुष्टि गरे।  घटनामा दोषी देखिएका दुवै प्रहरी अधिकारीसँग स्पष्टिकरण सोध्ने तयारी भएको उनले स्वीकारे। अनुसन्धानको नियमित प्रक्रिया अन्तर्गत नै तत्कालीन अवस्थामा कमान्डमा रहेका व्यक्तिलाई किन जिम्मेवारी निर्वाह भएन भनेर सोध्न लागिएको उनले बताए।

‘दुवै प्रहरी अधिकारीमाथि लागेका आरोपको सिलसिलेवार र चित्तबुझ्दो जवाफ खोज्ने छौं, जवाफ नआए बर्खास्तगीसम्मको कारबाही हुनसक्छ।’, राईले भने, ‘विभागीय कारबाहीको प्रक्रिया भने स्पष्टिकरण सोधेपछि प्रक्रियामा जाने छ।’

उनीहरु उक्त घटनामा संलग्न हुन् वा होइनन् तथ्य, तर्क र नियतको परीक्षण हुने उनले स्पष्ट पारे।

बर्खास्तगीको प्रक्रियाबारे उनले सहसचिवहरुको टिमसँग छलफल गरेका थिए। स्पष्टिकरण नसोध्दा अदातलबाट अन्तरिम आदेश लिएर पुन फर्कने सम्भावना हुने भएकाले यस्तो प्रक्रिया अवलम्वन गर्न लागिएको हो।

निलम्बन सिफारिसउपरकाे निर्णय अाज

साे घटनाकाे छानबिनमा लापरबाही गरेको भन्दै प्रहरी प्रधान कार्यालयले प्रहरी उपरीक्षक विष्टलाई निष्कासनको सिफारिस गरेको थियो। प्रहरी महानिरीक्षक सर्वेन्द्र खनालले गत असोज २९ गते प्रहरी उपरीक्षक विष्ट र प्रहरी निरीक्षक जगदीश भट्टराईलाई सेवाबाट निष्कासन गर्न गृह मन्त्रालयसमक्ष पत्राचार गरेको प्रहरी प्रवक्ता शैलेस थापा क्षेत्रीले बताए।

प्रहरी नायब निरीक्षक एवम् प्रवक्ता क्षेत्रीकाअनुसार गृह मन्त्रालयले उक्त सिफारिस उपर आज निर्णय गर्दै छ।

कस्तो हुन्छ बर्खास्तगीको प्रक्रिया?

प्रहरी निरीक्षकदेखि उपरीक्षकसम्मको बर्खास्तगीको अधिकार गृहसचिवमा निहीत हुन्छ। प्रहरी महानिरीक्षकले हस्ताक्षर गरेको कारबाही सिफारिस पत्र अनुसार गृहसचिवले दुई पटकसम्म २४ घन्टे स्पष्टिकरण सोध्न सक्छन्। त्यो स्पष्टिकरण चित्त नबुझे सरकारी सेवामा अयोग्य हुने गरी समेत बर्खास्त गर्ने अधिकार गृहसिचवलाई हुन्छ।

बर्खास्त गर्ने कार्यका लागि गृहसचिवको अध्यक्षतामा समिति गठन हुन सक्छ। सबै प्रक्रिया पूरा हुन ३ देखि ७ दिनसम्म लाग्नसक्छ।

गत साउन १० गते साथीको घरबाट स्कुलको गृहकार्य सकेर घर जाँदै गरेकी १३ वर्षीया निर्मलाको बलात्कारपछि हत्या गरिएको अवस्थामा साउन ११ गते बिहान उखुबारीमा शव भेटिएको थियो। आधा दर्जनभन्दा बढी प्रहरी टोलीले घटनाको छानबिन गरे पनि परिणाम शून्य भएको अवस्थामा सरकारले कन्चनपुरका तत्कालीन प्रहरी प्रमुख विष्टलाई बर्खास्त गर्न प्रक्रिया अघि बढाउन लागेको हो।

घटनास्थलको सुरक्षा नगरेको एवम् प्रमाणहरू नस्ट गरेको आरोप लाग्दै आएको र उनीमाथि अनुसन्धान र कारबाही नभएको भन्दै सरकारको समेत आलोचना भएपछि कारबाही प्रक्रिया थालिएको हो।

गृह मन्त्रालयका सहसिचव हरिप्रसाद मैनालीको संयोजकत्वमा गठित छानबिन समितिले पनि निर्मलाको बलात्कारपछि हत्या भएको घटनाको अनुसन्धानमा प्रहरीले पटक–पटक लापरबाही र हेलचक्र्याइँ गरेको निष्कर्ष निकालेको थियो। उक्त प्रतिवेदनलाई टेकेर प्रहरी अधिकारीमाथि आज स्पष्टिकरण सोधिने गृहले जनाएको छ।

निर्मला हत्या प्रकरणमा लामो समयदेखि प्रगति शुन्य रहेकोले सरकार र गृहमन्त्रीको समेत आलोचना हुँदै आएको छ।

प्राप्त प्रतिकृयाहरू

jange
Eauta abodh abala nari bina karan blatkirit huda Nepal ko nayiek force gumnam vayo yestai ho vane jimwebar sarkar ki Janata.

तपाईको प्रतिक्रिया

यसमा तपाइको मत


सम्बन्धित समाचार