परदेशीलाई आउँदैन दसैं : तन कम्पनीको काममा, मन गाउँघरमा

रमेश भारती

Nepal Live

काठमाडौं देशमा यतिबेला दसैंको माहोल छ। स्वदेशमा रहेका नेपालीहरु आफन्तसँग भेटघाट र खानपिनमा मस्त छन्। पूरै देश दसैंको रमझममा रमाइरहेका बेला बाध्यताले वैदेशिक रोजगारीमा सात समुद्रपारि पुगेका नेपालीको मन भने खिन्न छ।

वर्षौंदेखि घरबाहिर बसेकाहरु पनि दसैंमा घर फर्किने गर्दछन्। आफन्तसँग भेटघाट गर्ने, मिठोमसिनो खाने र आफूभन्दा ठूलासँग टीका ग्रहण गरी दसैं मनाउने चलन छ। घर फर्किन नपाउनेले पनि विदेशमै आफ्नै तरिकाले दसैं मनाउने गरेका हुन्छन्।

वैदेशिक रोजगारीमा रहेका नेपाली कामदारले पनि आफू कार्यरत देशमै जम्मा भएर दसैं मनाउने गरेका छन्। विदेशमा साथीभाइ मिलेर दसैं मनाए पनि मन भने स्वदेशमै हुने गरेको उनीहरु बताउँछन्। हाल ४० लाख नेपाली वैदेशिक रोजगारीमा कार्यरत छन्। त्यसमा २० प्रतिशत दसैंका बेला स्वदेश फर्किने गरेका छन्।  

दक्षिण कोरियामा रहेका पाँचथरका प्रेम सिग्देल चाडवाडका बेला गाँउघरको न्यास्रो लाग्ने गरेको बताँउछन्। दुई वर्षअघि कोरिया गएका प्रेमले पनि टीकाका दिन कम्पनीमा छुट्टी मागेर दसैं मनाउने गरेको सामाजिक सञ्जालमार्फत बताए।

'घर जान पाइएन, त्यही भएर साथीभाइ भेला भएर विदेशमै दसैं मनाउने योजना छ,' प्रेमले सुनाए, ‘यसवर्ष दसैंको रौनक धेरै छैन। अघिल्लो वर्ष दसैं मनाएका धेरैजसो साथी यसपटक छुट्टीमा घर फर्केकाले पनि नरमाइलो लागेको छ।’

यसपटक टीकाको दिनभर उनको कम्पनीकै होस्टेलमा दसैं मनाउन छलफल भएरहेको उनले बताए।

मलेसियामा रहेका झापाका दुर्गा काफ्ले पनि सँगै काम गर्ने साथीसँग मिलेर दसैं मनाउने सुरमा छन्।  मलेसियाको पेनांगमा २ वर्षदेखि कार्यरत दुर्गाले टीकाको दिन काम गर्दै आएको कम्पनीसँग छुट्टी बसेर दसैं मनाउने तयारी गरेको बताए।

नेपालमा हुँदा दसैं मनाएको स्मरण गर्दै उनले भने, 'खसी काटिन्थ्यो, सबै एक ठाउँ बसेर टीका लगाइन्थ्यो र परिवार साथीसँगै रमाइलो गरिन्थ्यो।'

लामो समयदेखि घरमा टीका लगाउन नपाए पनि साथीहरुसँगै प्रवासमा बर्सेनि दु:खसुख दसैं मनाउने गरेको उनले बताए। 'अरु बेलाभन्दा दसैंमा गाउँघरको धेरै याद आउँछ। गाउँघर फर्किनेको लर्को लाग्दा म पनि कहिले चाडपर्वमा फर्किऊँझैं लाग्छ तर छुट्टी मिल्दैन,' उनले बाध्यता सुनाए।

शुक्रवार टीका परेकाले मलेसियामामा रहेका प्रायः नेपालीले आइतबार दसैं मनाउने योजना बनाएको झापाका विष्णु काफ्लेले बताए। शुक्रबार कम्पनीमा काम हुने हुँदा बिदा मिल्दैन। 'दसैं मनाउन पनि तिथि आफैं सार्नुपर्छ,' उनले सुनाए, 'परदेशमा मनाउनु मात्रै हो। मन गाउँघरमै पुग्छ। उल्लासमय हुँदैन।’

कतारमा कार्यरत धनकुटाका गौरव घिमिरेलाई यो वर्षको दसैंमा कुनै योजना बनाउन मन लागेको छैन। कम्पनीले छुट्टी दिएर पनि दसैं मनाउन मन छैन। गाउँमा लगाएको पिङ र दसैंमा भेटघाट हुने आफ्न्तको याद भने विदेशमा धेरै आउने गरेको उनले सुनाए। 

साउदीमा रहेका झापाका लिला गिरीलाई भने यो दसैंमा खल्लोपन लागिरहेको छ। 'यस वर्ष नेपाल गएर परिवारसँग दसैं मनाउने तयारीमा थिएँ तर कम्पनीले दसैंछेक छुट्टी कटौती गरेपछि घर गएर दसैं मनाउने सपना तुहियो,' भन्छन्, 'होस्टलमा बसेर दसैं मनाउने योजना समेत काममा जानुपर्ने भएपछि पूरा हुन सकेन।’

वैदेशिक रोजगारीमा रहेका नेपालीहरु मिलेसम्म एकै स्थानमा जम्मा भएर दसैं मनाउने गरेका छन्। कतिपयले दसैंमा भिडियो च्याटमार्फत अग्रजबाट टीका ग्राहण गर्ने गरेका छन्।

'नेपालमा हुँदा दसैंको रौनक बेग्लै हुन्थ्यो तर विदेशमा के चाडबाड भन्न पाउनु र?' काभ्रेका जगत दाहालले भने, 'घरमा हुँदा चाडवाडको महत्व नै बेग्लै। विदेशमा हुँदा सबैको मन अमिलिन्छ चाडबाडमा।'

नेपालीहरु १ सय १० देशमा श्रम अनुमति लिएर जाने गरेका छन् भने व्यक्तिगत तवरले १ सय ७१ देश पुगेका छन्।

प्राप्त प्रतिकृयाहरू

पढ्नै पर्ने