पोखरामा पर्यटक घुइँचो : स्वदेशी दसैं मनाउन, विदेशी पदयात्रा गर्न

विकास मगर | २०७५ असोज २६ शुक्रबार | Friday, October 12, 2018 ०९:०३:४३ मा प्रकाशित

पोखरा – तालबाराही मन्दिरमा परिवारसँग थिए, बाँकेका सन्देश केसी। एक जना दाइ नाता पर्ने आफन्तको भर्खरै मृत्यु भएकाले उनीहरु यसपालि दसैं मनाउन पाउँदैनन्, त्यसैले यसपटकको दसैं घुमघाममै बिताउने सन्देशले बताए।

_x000D_ _x000D_

‘पहिले पो टीकादक्षिणा, रमाइलो हुन्थ्यो। अहिले जुठो पर्‍यो। त्यसैले परिवारसँग घुम्न आएका हौं,’ केसी भन्छन्।

_x000D_ _x000D_

उनीहरुको दसैं योजना मुस्ताङसम्म पुगेर फर्किने छ।

_x000D_ _x000D_

बुटवलका अतीत पुन पेसाले निजी विद्यालयका शिक्षक हुन्। वर्षभरि विद्यार्थीलाई अक्षर चिनाइरहनुपर्छ। फुर्सद पाउँदैनन्। फुर्सदका दिन पनि स्कुलले छुट्टी दिँदैन। दसैंको लामो बिदाले उनलाई नयाँ ऊर्जा थप्छ। 

_x000D_ _x000D_

यसपटक पुनले आफ्ना सहकर्मीसँग नयाँ दसैं योजना बनाए, घुम्न जाने। योजना त बनाए तर कहाँ भन्ने विषयमा सबैको सल्लाह भयो। मोटरसाइकलबाटै पोखरा घुमेर मुस्ताङ जाने अनि टीकासम्म घर फर्किने। साथीहरुसँग आएका उनी भन्छन्, ‘अरु बेला छुट्टी नै हुँदैन। दसैं हामीजस्ता कामकाजी र घुम्न मन पराउनेका लागि एउटा राम्रो बहाना भएको छ।’ 

_x000D_ _x000D_

विगतका वर्षमा भन्दा यो वर्ष आन्तरिक पर्यटन बढेको पर्यटन व्यवसायी बताउँछन्। यसबेला मनाङ मुस्ताङ जान उत्तम हुने र पोखराबाटै देखिने हिमशृंखला खुल्न थाल्ने भएकाले विदेशी पर्यटक पनि उत्तिकै रहने उनीहरुको भनाइ छ। ‘बाह्य पर्यटक यो बेला धेरै ट्रेकिङमा आउँछन्। आन्तरिक पर्यटकलाई बिदा र मौसम ठिक हुने भएकाले यसबेला चाप बढ्छ,’ पर्यटन व्यवसायीहरु भन्छन्।

_x000D_ _x000D_

_x000D_ _x000D_

ट्रेकिङ एजेन्सी चलाइरहेका प्रेम राई अक्टोबरदेखि नै व्यस्त हुन्छन्। उनलाई यो मौसममा सबैभन्दा बढी युरोपेली ट्रेकिङ गर्न आउने अनुभव छ। ‘अक्टोबरदेखि पश्चिमेलीहरुको बिदा हुन्छ। ठिक यसैबेला नेपालका हिमाल पनि मजाले खुल्छ र मौसम पनि शीतल हुन्छ,’ उनी भन्छन्, ‘विदेशीको चापले आफू त दसैंमा घर नबसेको पनि १५ वर्षभन्दा बढी भयो।'

_x000D_ _x000D_

अन्नपूर्ण, माउन्ट एभरेस्ट, मनास्लु लगायत पदमार्गमा पदयात्रा गर्न धेरै पर्यटक आउने गरेको राईले जानकारी दिए। ‘उनीहरु हिँड्नुका साथै घुम्न नेपाल आउँछन्। यही बेला उनीहरुलाई उत्तम समय हुन्छ।’

_x000D_ _x000D_

अहिले पोखरामा आन्तरिक तथा बाह्य पर्यटकको चापले पर्यटन व्यवसायीलाई भ्याइनभ्याई भएको छ।

_x000D_ _x000D_

_x000D_ _x000D_

नेपालीहरु दसैं बिदा ‘सेलिब्रेसन’ गर्न आउने र विदेशी ट्रेकिङ गर्न आउने पर्यटन व्यवसायीको अनुभव छ। मिट नेपाल टुर्स एन्ड ट्राभल्सका सञ्चालक गोरे गुरुङ भन्छन्, ‘आन्तरिक पर्यटक गाडी बुक गरेर घुम्छन्। बाह्य पर्यटक डाँडाकाँडा हेर्दै पदयात्रा गर्छन्।’ आन्तरिक पर्यटकको बुकिङले गर्दा नै यसपटकको उनको एजेन्सी ‘फुल’ भएको उनी बताउँछन्। 

_x000D_ _x000D_

बाह्य पर्यटकभन्दा आन्तरिक पर्यटक बढी टुरिस्ट गाडीमा घुम्ने भएकाले बेलाबेलामा ट्राफिकले दु:ख दिइरहेको गुरुङको अनुभव छ। भन्छन्, ‘यहाँका ट्राफिकले आन्तरिक पर्यटकलाई पर्यटक नै मान्दैनन्। कतै गयो भने 'टुरिस्ट भनेर नेपाली बोक्छस्' भन्छन् ।’