अवैध रुपमा स्काभेटरको पाटपुर्जा नेपाल भित्र्याउँदै गर्दा २ भारतीय पक्राउ

Nepal Live

बुटवल– भन्सार छलेर नेपाल भित्र्याउँदै गरेका अवैध सामानसहित प्रहरीले शुक्रबार दुई भारतीय नागरिकलाई पक्राउ गरेको छ। 

पक्राउ पर्नेमा भारत झजर जिल्ला अग्रवाल कलोनी–७ का ३१ वर्षीय गौरव गोयल र २८ वर्षीय अंकित गोयल रहेका छन्। राजश्व भन्सार सुरक्षा गुल्मबाट सशस्त्र प्रहरी निरीक्षक सुरज रिजालको नेतृत्वमा खटिएको टोलीले रुपन्देही सिद्धार्थनगर नगरपालिका–१ बेलहियामा चेकजाँच गर्ने क्रममा भारतबाट भन्सार छली नेपालतर्फ ल्याउँदै गरेको स्काभेटरको पार्टस् र त्यसको ढुवानीका लागि प्रयोग गरेको डिएल ११ सिए ८८४१ नम्बरको भारतीय महेन्द्र केयुभी गाडीसहित दुबै जनालाई पक्राउ गरिएको हो। 

पक्राउ गरिएको समानको भन्सार मूल्य १६ लाख २ हजार रुपैयाँ रहेको भैरहवा भन्सार कार्यालयले जनाएको छ।

पछिल्लो एक महिनामा भन्सार छलेर नेपाल भित्र्याइएका करीब ३० लाख रुपैयाँभन्दा बढी मूल्य बराबरका विभिन्न सामग्री बरामद गरेको राजश्व भन्सार सुरक्षा गुल्म रुपन्देहीका प्रमुख, सशस्त्र प्रहरी नायब उपरीक्षक गोविन्द खातीले जानकारी दिए।

पछिल्लो एक महीनामा भन्सार छलेर नेपाल भित्रिएका करीब ६ लाख ७५ हजार रुपैयाँभन्दा बढीको अवैध कुखुरा, कुखुराका चल्ला र मासुसमेत सीमा क्षेत्रमा सशस्त्र प्रहरीले  बरामद गरी नष्ट गरेको उनले जानकारी दिए। उनले सीमा क्षेत्रमा भन्सार छलेर लत्ताकपडा, किराना सामान तथा गाडीको टायर मोटरपार्टस्, मरिच, मरमसला, चिनीलगायत वस्तु अत्यधिक मात्रामा नेपाल भित्रिएको र त्यस्ता सामान नै बरामद हुने गरेको जानकारी पनि उनले दिए। रासस

तपाईको प्रतिक्रिया

यसमा तपाइको मत


सम्बन्धित समाचार