ad

१० वर्ष जेल बसेर छुटेका व्यक्ति लागू औषधसहित पक्राउ

नारायण अधिकारी

Nepal Live

कठमाडौं– लागू औषध मुद्दामा १० वर्ष जेल बसेर छुटेका एक व्यक्तिसहित दुई जनालाई प्रहरीले लागू औषधसहित पक्राउ गरेको छ।

लागू औषध नियन्त्रण व्यूरोबाट खटिएको प्रहरी टोलीले बिहीबार काठमाडौंबाट ५ हजार १ सय २६ एम्पुल लागू औषधसहित दुई जनालाई पक्राउ गरेको हो।

पक्राउ पर्नेमा विराटनगर महानगरपालिका–१५ घर भई काठमाडौं बस्ने ४५ वर्षीय अरुण थापा र भोजपुरको षडानन्द नगरपालिका–११ घर भएका २४ वर्षीय अम्बरबहादुर राई छन्।

पक्राउ परेका अरूण थापा लामो समयदेखि भारतबाट औषधीजन्य मनोद्दिपक पदार्थ काठमाडाैं भित्राई यसको अवैध कारोबारमा सक्रिय रहेको प्रहरीले जनाएको छ।

उनलाई यसभन्दा अघि ब्यूरोले २०६३ असार १ गते ४४ ग्राम खैरो हेरोइन सहित पक्राउ गरेको थियो।

उक्त मुद्दामा उनी १० वर्ष कैद र ८० हजार जरिवाना भई २०७३ साल माघमा महिनामा छुटेका व्यक्ति हुन्।

उनीहरुको साथबाट डाइजापाम, फेनारगन र बु्रफिन गरी ५ हजार १ सय २६ एम्पुल लागू औषध बरामद भएको प्रहरीले जनाएको छ।

प्राप्त प्रतिकृयाहरू

यसमा तपाइको मत


पढ्नै पर्ने