ad

नेकपाका २ सय ६३ नेता–कार्यकर्ता पक्राउ

नारायण अधिकारी

Nepal Live

काठमाडौं– नेत्रविक्रम चन्द (विप्लव) नेतृत्वको नेपाल कम्युनिष्ट पार्टी (नेकपा) सँग वार्ताको आह्वान गरेको सरकारले नेकपाका नेता–कार्यकर्ता पक्राउ गर्ने  क्रम भने जारी राखेको छ। 

सरकारले विप्लव, सिके राउतसहित सरकारसँग असन्तुष्ट पक्षसँग वार्ता गर्ने भन्दै सांसद सोमप्रसाद पाण्डेको संयोजकत्वमा समिति गठन गरेको थियो। समितिले गत भदौ २५ गते पत्रकार सम्मलेन गरी विप्लवसहित सबै असन्तुष्ट पक्षलाई वार्तामा आउन आग्रह पनि गर्‍यो। एकातिर आफ्ना नेता कार्यकर्ता पक्राउ गरिरहने र अर्कातिर वार्तामा बोलाउनुको औचित्य नभएको विप्लव नेतृत्वको नेकपाले बताउँदै आएको छ। 

वार्ता टोली गठन भएपछि पनि विप्लव समूहका नेताकार्यकता पक्राउ पर्ने क्रम रोकिएको छैन। पक्राउ परेर सर्वोच्च अदालत छोड्न आदेश दिए पनि प्रहरीले अदालत परिसरबाटै पक्राउ गर्दै विभिन्न जिल्लामा लगेर मुद्दा चलाउँदै आएको छ। नेकपाका प्रवक्ता तथा विप्लवपछिका दोस्रो ठूलो नेता खड्गबहादुर विश्वकर्मा, पोलिटब्यूरो सदस्य पदम राई, किरण राई, उमा भुजेलसहितका नेता अहिले पनि प्रहरी हिरासतमै छन्। 

केही समय चारै वटा सुरक्षा निकायका प्रमुखले गृहमन्त्री रामबहादुर थापा बादललाई अहिले मुख्य सुरक्षा थ्रेट विप्लव समूह रहेको बताएका थिए।  विप्लवले युद्धकालको जस्तो झझल्को दिनेगरी ग्रामीण भेगका विभिन्न ठाउँमा आफ्ना कार्यकर्ता सैन्य तालिमसम्म दिएको रिपोर्ट गृहमन्त्रीसम्म पुगेको थियो। त्यसपछि गृहमन्त्रीले विप्लव समूहलाई कडा निगरानी गर्न र पक्राउ गर्न प्रहरीलाई आदेश दिएका थिए। 

गृहकै आदेशमा प्रहरीले विप्लव पार्टीका नेता कार्यकर्तालाई धमाधम पक्राउ गरिहेको छ। प्रहरीका केन्द्रीय प्रवक्ता शैलेस थापा क्षेत्रीले वैशाखदेखि साउनसम्म विप्लव वार्टीका २ सय ६३ नेता कार्यकर्ता पक्राउ परेको जानकारी दिए। 

सबैभन्दमा बढी प्रहरीले प्रदेश १ बाट विप्लवका नेता कार्यकर्ता पक्राउ गरेको छ। प्रदेश १ बाट प्रहरीले वैशाखमा ५४ जना, जेठमा २० जना, असारमा १० र साउनमा २१ गरी १ सय ५ जनालाई पक्राउ गरेको छ। 

प्रदेश २ बाट भने चार महिनाको अवधिमा जम्मा ५ जना पक्राउ परेका छन्। प्रदेशमा विप्लवको उपस्थिति कमजोर मानिन्छ। 

प्रदेश ३ बाट वैशाखमा १८ जना, जेठमा २१ जना, असारमा ४७ र साउनमा १४ जना गरी १ सय जना पक्राउ परेको प्रहरी प्रधान कार्यालयको तथ्यांक छ। प्रकाण्ड, उमा भुजेल लगायतका पार्टीका ठूला नेता यही प्रदेशबाट पक्राउ परेका थिए।

त्यसैगरी प्रदेश ४ बाट ११ जना पक्राउ परेका छन् भने प्रदेश ५ बाट ७ जना पक्राउ परेका छन्। प्रदेश ६ बाट २१ जना र प्रदेश ७ बाट चार महिनाको अवधिमा १४ जना पक्राउ गरिएको प्रहरी प्रधान कार्यालयले जनाएको छ। वैशाखदेखि साउन महिनाको चार महिनाको अवधिमा जम्मा २ सय ६३ जना नेता कार्यकता पक्राउ परेको हुन्। 

अर्धभूमिगत राजनीतिक गरेको नेकपाका नेता कार्यकर्ता धमाधम पक्राउ पर्न थालेपछि पार्टीका महासचिव विप्लव पनि भूमिगत भएको प्रहरीले जनाएको छ। विप्लवलाई पक्राउ गर्न प्रहरी निगरानी बढाए पनि अहिलेसम्म सकेको छैन। विप्लवले दर्जनौं सिमकार्ड परिवर्तन गर्दै चलाउन थालेकाले प्रहरीले अहिलेसम्म लोकसन समेत पत्ता लगाउन सकेको छैन। विप्लव अहिले भारतमा बसेको हुनसक्ने प्रहरीको अनुमान छ।

विप्लवपछि सुरक्षा थ्रेटको रुपमा प्रहरीले सिके राउत समूह रहेको औंल्याएको छ। तराई मधेश अलग हुनुपर्छ भन्दै अभियान चलाएको सिके राउत समूहका नेता कार्यकर्तालाई पनि प्रहरीले पक्राउ गरेको छ। 

प्रहरीले वैशाखदेखि साउनसम्मको चार महिनाको अवधिमा सिके राउत समूहका १४ जना नेता कार्यकर्ता पक्राउ गरेको छ। प्रहरीले रुपन्देहीबाट ८ जना, बाँकेबाट ३ जना र झापा, बर्दिया र कपिलवस्तुबाट १/१ जना गरी १४ जनालाई पक्राउ गरेको हो।
 

प्राप्त प्रतिकृयाहरू

यसमा तपाइको मत


पढ्नै पर्ने