ad

रोनाल्डोलाई रातो कार्ड र उनको आँसु

नेपाल लाइभ

Nepal Live

काठमाडौं– आक्रामक स्वभावका कारण क्रिस्टियानो रोनाल्डो फेरि विवादमा परेका छन्। यसै सिजन स्पेनिस क्लब रियल म्याड्रिड छाडेर इटालियन महारथी युभेन्ट्समा आबद्ध भएका रोनाल्डो बुधबार राति भएको च्याम्पियन्स लिगको खेलमा रातो कार्ड पाएसँगै विवादमा परेका हुन्। 

पोर्चुगिज स्ट्राइकर रोनाल्डोले रातो कार्ड पाए पनि युभेन्ट्सले समूह 'एच' को खेलमा स्पेनिस क्लब भ्यालेन्सियामाथि २–० को जित हात पारेको छ।

युभेन्ट्सका लागि च्याम्पियन्स लिगमा डेब्यू गरेका रोनाल्डो खेलको २९ मिनेटमा सिधा रातो कार्ड पाउँदै मैदान छाड्न बाध्य भएका थिए। खेलका दौरान रोनाल्डोले भ्यालेन्सियाका डिफेन्डर जेइसन मुरिलोको कपाल तानेपछि रेफ्रीले सिधा रातो कार्ड देखाएका थिए। पास लिने क्रममा भ्यालेन्सियाका डिफेन्डर मुरिलो रोनाल्डोसँग ठोक्किएर लडेका थिए। त्यसपछि फलको अपील गरेका मुरिलोलाई रोनाल्डोले आक्रमक हुँदै कपाल तानेका थिए। रेफ्रीले सहायक रेफ्रीसँग सल्लाह गरेपछि रोनाल्डोलाई रातो कार्ड देखाउने निर्णय गरेका थिए। 

च्याम्पियन्स लिगमा सर्वाधिक गोल गर्ने रोनाल्डोले पाँच पटक च्याम्पियन्स लिगको उपाधि उचाल्ने अवसर पाएका थिए। तर युभेन्ट्सविरुद्धको पहिलो खेलमै रातो कार्ड पाएपछि रोनाल्डो स्तब्ध बनेका थिए। रोनाल्डोले रातो कार्ड पाएपछि १० खेलाडी सीमित बनेको युभेन्टसले दबाबमा आएको थियो। यद्यपी पिजानले २ गोल गर्दै युभेन्ट्सको संकट टारेका थिए। दुवै गोल उनले पेनाल्टीमा गरेका थिए। 

३३ वर्षीय रोनाल्डो म्याड्रिडबाट ९९.२ मिलियन पाउन्ड (१४ अर्ब ४३ करोड रुपैयाँ) मा युभेन्ट्समा ४ वर्षका लागि आबद्ध भएका थिए। रोनाल्डोले रियलबाट ४ सय ३८ खेलमा ४ सय ५० गोल गरेका थिए। रियलका लागि उनले च्याम्पियन्स लिगमा १ सय ५ गोल गरेर कीर्तिमान बनाएका थिए। ला लिगमा भने उनले ३ सय ११ गोल गरे। रियलका लागि उनले १६ उपाधि जिते। उनले रियलका लागि ४४ ह्याट्रिक गरे भने ला लिगामा ३४ ह्याट्रिक गरेका थिए।

रोनाल्डोको आँसु 
इटालियन सिरि एका सुरुवाती ३ खेलमा रोनाल्डोले गोल गर्न नसक्दा उनीमाथि दबाब थपिएको थियो। चौथो खेलमा भने रोनाल्डोले गोल गरेका थिए। सिरि एको सासोउलोविरुद्धको पछिल्लो खेलमा २ गोल गरेपछि उनीमाथि दबाब कम भएको थियो। त्यसको प्रभाव युभेन्ट्सबाट च्याम्पियन्स लिगमा डेब्यू गरेको खेलमा देखियो। सुरुवाती मिनेटमा रोनाल्डोले भ्यालेन्सियालाई दबाबमा राख्न केही मुभ निकालेका थिए। त्यसैले भ्यालेन्सियाका डिफेन्डरले उनलाई बढी निगरानीमा राखे।

२८ मिनेटमा क्रस पास लिने क्रममा रोनाल्डोलाई मुरिलोले रोक्ने प्रयास गरे। त्यसक्रममा मुरिलो लडेका थिए। तर रोनाल्डोले लडेका मुरिलोको कपालमा ताने। त्यसपछि खेल तनावग्रस्त बनेको थियो। विपक्षी खेलाडीले फलको अपील गर्दै रोनाल्डो र युभेन्ट्सका खेलाडीसँग झगडा गर्न उत्रिएका थिए। त्यसपछि रेफ्रीले सहायक रेफीसँग लामो सल्लाह गरेका थिए। सल्लाहपछि रेफ्रीले रातो कार्ड दिए। रातो कार्डको निर्णय रोनाल्डोले विश्वास गर्न सकेनन्। रिसले चुर भएका रोनाल्डो भुईमा हात बजार्दै ढलेका थिए। रोनाल्डो मैदान छाड्ने बेलामा सम्हालिन सकेनन् र आँसु चुहाउदै बाहिर निस्किएका थिए।

च्याम्पियन्स लिगमा १ सय ५४ खेल खेलिसकेका रोनाल्डोले लिगमा पहिलो रातो कार्ड पाए हुन्। अब उनले च्याम्पियन्स लिगको एक खेल गुमाउनेछन् । 

भिडियो :

रोनाल्डोमाथि युभेन्ट्सको विश्वास

युभेन्ट्सले पछिल्लो ७ वर्षदेखि लगातार इटालियन सिरि एको उपाधि जितिरहेको छ। अनुभवी खेलाडीको साथ पाएको युभेन्ट्सले च्याम्पियन्स लिगमा भने सोचे अनुरुप खेल्न सकेको छैन।

प्रशिक्षक मासिमो अलेग्रीले च्याम्पियन्स लिग प्रभाव छाड्न यो सिजन रोनाल्डोलाई भित्राए। किनकी रोनाल्डोले रियललाई म्याड्रिडलाई पछिल्ला उपाधि जिताउन उत्कृष्ट खेलेका थिए। तर पहिलो खेलमा नै उनै रोनाल्डोले रातो कार्ड पाएपछि प्रशिक्षक निराश देखिएका थिए। १० खेलाडीमा सीमित भए पनि युभेन्ट्सले च्याम्पियन्स लिगमा विजयी सुरुवात गर्न सफल भयो।

सन् २०१७ मा फाइनल पुगेको युभेन्ट्सले आगामी खेलमा रोनाल्डोबाट प्रभावशाली प्रदर्शनको अपेक्षा गरेको छ। किनकी युभेन्ट्स सन् १९९६ पछि पहिलो पटक च्याम्पियन्स लिगको उपाधि जित्न चाहान्छ।

युभेन्ट्स र रातो कार्ड 
युभेन्ट्स च्याम्पियन्स लिगमा सबैभन्दा बढी रातो कार्ड पाउने टिम हो। बुधबार रोनाल्डोले पाएको रातो कार्ड युभेन्ट्सले च्याम्पियन्स लिगमा पाएको २६औं  रातो कार्ड हो। युभेन्ट्सका खेलाडीले च्याम्पियन्स लिगको लगातार तेस्रो खेलमा सिधा रातो कार्ड पाए। सन् २००१ पछि युभेन्टसले लगातार कार्ड पाएको यो पहिलो पटक हो।

रातो कार्ड पाए पनि युभेन्ट्सले सन् २०१६ पछि च्याम्पियन्स लिगको पहिलो खेलमा जित हात पारेको हो। पछिल्लो २ सिजन युभेन्ट्स पहिलो खेलमा पराजित भएको थियो।

प्राप्त प्रतिकृयाहरू

यसमा तपाइको मत


पढ्नै पर्ने