नेपाली धावक निमेषले जिते सिंगापुरमा अवार्ड

Nepal Live

काठमाडौं– नेपाली धावक निमेष गुरुङले सिंगापुरमा अवार्ड जितेका छन्। सिंगापुर पुलिसका जागिरे निमेषले 'सिंगापुर होमटिम स्पोर्टस्‌म्यान अफ दि इयर २०१८' जितेका हुन्। 

२०१४ देखि एथ्लेटिक्समा प्रवेश गरेर सयौं पदक जितिसकेका उनलाई सिंगापुरको गृह मन्त्रालयअन्तर्गतको सुरक्षा निकायतर्फ प्रदान गरिने 'सिंगापुर होमटिम स्पोर्टस्‌म्यान अफ दि इयर' प्रदान गरिएको हो। होम टिमको लागि फुटबल, भलिबल, टेबलटेनिस लगायतका खेलाडीको मनोनय जाने गरेको छ।

सुरक्षा निकायअन्तर्गत रहेका दर्जनौ खेलका खेलाडीलाई पछि पार्दै निमेषले होमटिम अवार्ड हात पारेका हुन्। होमटिमको अवार्ड जित्ने उनी सम्भवत: पहिलो नेपाली खेलाडी हुन्। गत वर्ष होम टिमको अवार्ड टेवल टेनिसका खेलाडीले जितेका थिए। 

'सिंगापुर होमटिम स्पोर्टस्‌म्यान अफ दि इयर जस्तो प्रतिष्ठित अवार्ड जित्दा धेरै खुसी लागेको छ। आगामी दिनमा अझै धेरै राम्रो प्रदर्शन गर्न प्रोत्साहन समेत मिलेको छ,' निमेषले अवार्ड जितेपछि सिंगापुरबाट टेलिफोनमा भने, 'मलाई विश्वभरबाट हौसला प्रदान गर्ने, सहयोग गर्ने तथा मेरो समर्थन गर्ने सबैलाई धन्यवाद दिन चाहान्छु।' 

प्रत्येक वर्ष प्रदान गरिने अवार्ड गत वर्षको प्रदर्शनको आधार दिने गरिएको छ। उनले गत वर्ष अमेरिकामा भएको विश्व पुलिस फायर गेम्समा २ स्वर्ण जितेका थिए। गत अगस्टमा अमेरिकाको लस एन्जलसमा भएको प्रहरीको विश्व च्याम्पियनसिपमा उनले हाफ म्याराथन र १० हजार मिटर दौडमा स्वर्ण जित्दै इतिहास रचेका थिए। 

सिंगापुर पुलिसका जागिरे निमेष सिंगापुरका नाम चलेका नेपाली धावक हुन्। सन् २०१३ देखि दौडिन थालेका उनले त्यहि वर्ष ५ हजार मिटरमा सिंगापुरको २५ वर्ष पुरानो कीर्तिमान भंग गरेका थिए भने १० हजार मिटरको राष्ट्रिय कीर्तिमान पनि भंग गरेका थिए। 

२०१४ देखि हालसम्म उनले ५ दर्जन स्वर्णसहित ३ सयभन्दा बढी पदक जितिसकेका छन्।
 

प्राप्त प्रतिकृयाहरू

Ishwer gurung
Congratulation

तपाईको प्रतिक्रिया

यसमा तपाइको मत


सम्बन्धित समाचार